ଭୁବନେଶ୍ୱର:  ଓଡ଼ିଶା ରାଜନୀତିରେ ଗୋଟିଏ ଯୁଗର ଅବସାନ । ପରଲୋକରେ ବିଜେଡିର ବରିଷ୍ଠ ନେତା ଦାମୋଦର ରାଉତ । ୭ ଥର ବିଧାୟକ ଓ ୭ରୁ ଅଧିକ ବିଭାଗରେ ମନ୍ତ୍ରୀ ଥିଲେ ଦାମ । ଦାମଙ୍କ ବିୟୋଗରେ ରାଷ୍ଟ୍ରପତି, ମୁଖ୍ୟମନ୍ତ୍ରୀ ଓ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଶୋକ ପ୍ରକାଶ କରିଛନ୍ତି । ଭୁବନେଶ୍ବରରୁ ପାରାଦୀପ, ଅନ୍ତିମ ଦର୍ଶନ କରି ଶ୍ରଦ୍ଧାଞ୍ଜଳି ଦେଇଛନ୍ତି ବହୁ ବିଶିଷ୍ଟ ନେତା ଓ ଜନତା ।

ରାଜନୀତି କ୍ଷେତ୍ରରେ ଗୋଟିଏ ଯୁଗର ଅବସାନ । ଆଉ ନାହାଁନ୍ତି ଓଡ଼ିଶା ରାଜନୀତିର ମହାନାୟକ ଦାମୋଦର ରାଉତ । 83 ବର୍ଷ ବୟସରେ ଭୁବନେଶ୍ବରର ଘରୋଇ ହସ୍ପିଟାଲରେ ତାଙ୍କର ପରଲୋକ ଘଟିଛି । ଦୀର୍ଘ ଦିନ ଧରି କିଡନୀ ଜନିତ ସମସ୍ୟାରେ ଯୁଝି ହେଉଥିଲେ ଦାମ ରାଉତ । ଗତକାଲି ହୃଦଘାତ ଯୋଗୁଁ ମେଡିକାଲରେ ଭର୍ତ୍ତି ହୋଇଥିଲେ ।
ଦାମ ରାଉତଙ୍କ ବିୟୋଗରେ ବିଭିନ୍ନ ମହଲରେ ଗଭୀର ଶୋକ ପ୍ରକାଶ ପାଇଛି । ଟ୍ବିଟ୍ କରି ରାଷ୍ଟ୍ରପତି ଦ୍ରୌପଦୀ ମୁର୍ମୁ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ବହୁ ବିଶିଷ୍ଟ ନେତା ଦାମଙ୍କ ଅମର ଆତ୍ମାର ସଦଗତି କାମନା କରିଛନ୍ତି । ବିଧାନସଭାରେ ଦାମ ରାଉତଙ୍କୁ ଗାର୍ଡ ଅଫ୍ ଅନର୍ ଦିଆଯାଇଥିଲା । ମୁଖ୍ୟମନ୍ତ୍ରୀଙ୍କ ସମେତ ବହୁ ରାଜନେତା ଦାମଙ୍କ ଅନ୍ତିମ ଦର୍ଶନ ସହ ଶ୍ରଦ୍ଧାଞ୍ଜଳି ଦେଇଥିଲେ । 

1942 ମସିହା ଜୁଲାଇ 2 ତାରିଖରେ ଜନ୍ମଗ୍ରହଣ କରିଥିଲେ ଦାମୋଦର ରାଉତ । ବିଜୁ ବାବୁଙ୍କ ପରାମର୍ଶରେ ଚାକିରି ଛାଡ଼ି ରାଜନୀତିରେ ଯୋଗଦେଇଥିଲେ । ପ୍ରଥମେ ଜନତା ଦଳ ଓ ପରେ ବିଜେଡିରୁ ବିଧାୟକ ଭାବେ ନିର୍ବାଚିତ ହେବା ସହ ବିଜେଡି ସରକାରରେ ମନ୍ତ୍ରୀ ଭାବେ ଦୀର୍ଘ ଦିନ ଧରି ମନ୍ତ୍ରୀ ଭାବେ କାର୍ଯ୍ୟଭାର ସମ୍ଭାଳିଥିଲେ । 7 ଥର ବିଧାୟକ ଭାବେ ନିର୍ବାଚିତ ହୋଇଥିଲେ ଦାମୋଦର । 5 ଥର ଏରସମା, 2 ଥର ପାରାଦୀପରୁ ଲଢ଼ି ଜିତିଥିଲେ ।  1977ରେ ପ୍ରଥମେ ବିଧାନସଭାକୁ ନିର୍ବାଚିତ ହୋଇଥିଲେ । ଜନତା ପାର୍ଟି ଟିକେଟ୍‌ରେ ବାଲିକୁଦା-ଏରସମା ଆସନରୁ ବିଧାୟକ ହୋଇଥିଲେ ।

1980ରେ ଜନତା ଦଳ ସେକୁଲାରରୁ ଜିତି 2ୟ ଥର ବିଧାନସଭା ଆସିଥିଲେ । କୃଷି, ପଞ୍ଚାୟତିରାଜ, ସ୍ବାସ୍ଥ୍ୟ, ସମବାୟ ପରି 7ରୁ ଉର୍ଦ୍ଧ୍ବ ବିଭାଗର ମନ୍ତ୍ରୀ ଥିଲେ । ସୂଚନା ଓ ଲୋକସମ୍ପର୍କ ଏବଂ ମହିଳା ଓ ଶିଶୁ ବିଭାଗର ମନ୍ତ୍ରୀ ଥିଲେ । 2017ରେ ଦାମଙ୍କୁ ଦଳରୁ ବହିଷ୍କାର କରିଥିଲା ବିଜେଡି । 2018 ମାର୍ଚ୍ଚରେ ବିଜେପିରେ ମିଶି ବାଲିକୁଦାରୁ ଲଢ଼ି ହାରିଥିଲେ । ଗତ ଜାନୁଆରୀରେ ବିଜେଡି ତାଙ୍କ ଉପରୁ ବହିଷ୍କାର ଆଦେଶ ଉଠାଇଥିଲା । ବିଧାନସଭାର ବିଭିନ୍ନ ଗୁରୁତ୍ବପୂର୍ଣ୍ଣ କମିଟିରେ ସ୍ଥାନ ପାଇଥିଲେ । ଦାମୋଦର ରାଉତ ଦକ୍ଷ ରାଜନେତା ଭାବେ ଯେତିକି ଜଣାଶୁଣା, ରୋକ୍‌ଠୋକ୍ କଥା ପାଇଁ ସେତିକି ଚର୍ଚ୍ଚିତ ଥିଲେ । ତାଙ୍କର ବିୟୋଗ ରାଜ୍ୟ ରାଜନୀତିରେ ଏକ ଅପୂରଣୀୟ କ୍ଷତି । 

ଅଧିକ ପଢନ୍ତୁ ଓଡ଼ିଶା ଖବର