Dana Majhi / ୧୦ ବର୍ଷ ପରେ ପୁଣି ଚର୍ଚ୍ଚାରେ ଦାନ ମାଝୀ, ଥାନାର ହେଲେ ଦ୍ଵାରସ୍ଥ

ପାଟଣାଗଡ଼ (ବଲାଙ୍ଗିର): ସେଦିନ ରାସ୍ତାରେ ସ୍ତ୍ରୀର ଶବକୁ କାନ୍ଧେଇ ଚାଲୁଥିଲେ ଦାନ ମାଝୀ । ସାଙ୍ଗରେ ଥିଲା ୧୨ ବର୍ଷର ଝିଅ । କଳାହାଣ୍ଡିର ସେଇ ଲୋମଟାଙ୍କୁରା ଦୃଶ୍ୟ ଆଜି ବି ମନକୁ ବିଚଳିତ କରେ । ଇତିମଧ୍ୟରେ ସେହି ଘଟଣାକୁ ୧୦ ବର୍ଷ ବିତିଲାଣି । ଗରିବର କୁଡ଼ିଆ ଘରୁ ବାହାରି ବଦଳି ଗଲାଣି ଦାନ ମାଝୀଙ୍କ ଜୀବନ ।

କିନ୍ତୁ ଘଟଣାର ୧୦ ବର୍ଷ ପରେ ବି ଦାନ ମାଝୀଙ୍କୁ ନେଇ ଚର୍ଚ୍ଚା ଥମିନି । ସେଦିନ ଦାନ ମାଝୀ ସ୍ତ୍ରୀର ଶବକୁ ବୋହି ଚର୍ଚ୍ଚାକୁ ଆସିଥିଲେ । ଆଉ ଆଜି ଥାନାର ଦ୍ଵାରସ୍ଥ ହୋଇ ପୁଣି ଥରେ ଚର୍ଚ୍ଚିତ ହୋଇଛନ୍ତି । ବର୍ଷ ବଦଳିଛି, ସ୍ଥାନ ବଦଳିଛି କିନ୍ତୁ ସେ ଦିନର ସେ ଘଟଣାକୁ ଆଜି ବି ଭୁଲି ପାରିନାହାନ୍ତି ଦାନ ମାଝୀ ।

ଏଥିସହ ପଢ଼ନ୍ତୁ: ଲଗାଣ ବର୍ଷାରେ ବେହାଲ ରାଜ୍ୟର ଅନେକ ଅଞ୍ଚଳ, ପୂର୍ବରୁ ପଶ୍ଚିମ ସବୁଠି ଜଳବନ୍ଦୀ ସ୍ଥିତି 

ଏବେ ଦାନ ମାଝୀ ଅଭିଯୋଗ କରିଛନ୍ତି ଯେ, "ମୋ ବିନା ଅନୁମତିରେ ଏକ କ୍ଷୁଦ୍ର ଫିଲ୍ମ କରାଯାଇଛି । ଯେଉଁଥିରେ ୧୦ ବର୍ଷ ତଳେ ମୁଁ ଅଙ୍ଗେ ନିଭାଇଥିବା ଘଟଣା ଓ ଦୁର୍ଦ୍ଦଶାକୁ ଚିତ୍ରଣ କରାଯାଇଛି । ଯାହା ମୋତେ ଆଘାତ ଦେଇଛି ।"

ଏନେଇ ଦାନ ମାଝୀ ସୋମବାର ପାଟଣାଗଡ଼ରେ ତାଙ୍କ ଓକିଲଙ୍କ ସହ ପହଞ୍ଚିଛନ୍ତି । ପ୍ରଥମେ କୋର୍ଟକୁ ଯାଇ ଓକିଲଙ୍କ ସହ ଆଲୋଚନା କରିବା ପରେ ଥାନାରେ ଏତଲା ଦେଇଛନ୍ତି ଦାନ ମାଝୀ । ସମ୍ବଲପୁରୀ ଫିଲ୍ମ ପ୍ରଯୋଜକ ମନୋଜ ବାଗଙ୍କ ନାଁରେ ଦାନ ମାଝୀ ପାଟଣାଗଡ଼ ଥାନାରେ ଏତଲା ଦେଇଛନ୍ତି ।

ଏତଲା ନେଇ ଦାନ ମାଝୀଙ୍କ ଓକିଲ କହିଛନ୍ତି, "ଦାନ ମାଝୀଙ୍କ ସହ ଯାହା ଘଟିଛି ତାକୁ ନେଇ ଆମେ ଦାନ ମାଝୀ ଦି ଟ୍ରାଜିକ୍ ଇନ୍ସିଡେଣ୍ଟ ନାମକ ସିନେମା କରିଛୁ । ଯାହା ଶୀଘ୍ର ମୁକ୍ତିଲାଭ କରିବାକୁ ଯାଉଛି । କିନ୍ତୁ ଏବେ ସମ୍ବଲପୁରର ଜଣେ ବ୍ୟକ୍ତି ୩୫ ମିନିଟ୍‌ରେ ଡକ୍ୟୁମେଣ୍ଟାରି ତିଆରି କରି ବିଭିନ୍ନ ଫେଷ୍ଟିଭାଲ୍‌କୁ ପଠାଇଛନ୍ତି ।"

ଏଥିସହ ପଢ଼ନ୍ତୁ: ଭୀମ ଭୋଇ ମେଡିକାଲ କଲେଜରେ ଅସ୍ତ୍ରୋପଚାର, ଛାତିରୁ ବାହାରିଲା କୋଦାଳ 

ସେ ଆହୁରି କହିଛନ୍ତି, "ଆମେ କାମ କରିଥିବା ସିନେମାରୁ ୪୦୦ରୁ ଅଧିକ ଲୋକ କାମ କରିଛନ୍ତି । ଅନେକ ପରିଶ୍ରମ କରିଛୁ । ଦାନ ମାଝୀଙ୍କ ସହ ଓଡ଼ିଶାର ଅନ୍ୟ ଘଟଣା ମଧ୍ୟ ଚିତ୍ରଣ କରିଛୁ । ୩୫ ମିନିଟ୍‌ର ଫିଲ୍ମ ପାଇଁ ସେ ଦାନ ମାଝୀଙ୍କ ଠାରୁ କୌଣସି ଅନୁମତି ନେଇ ନାହାନ୍ତି ।"

ଏନେଇ ଦାନ ମାଝୀ ପାଟଣାଗଡ଼ ଥାନାର ଦ୍ଵାରସ୍ଥ ହୋଇ ଏତଲା ଦେଇଛନ୍ତି । ସମ୍ବଲପୁରୀ ଫିଲ୍ମ ପ୍ରଯୋଜକ ମନୋଜ ବାଗଙ୍କ ନାଁରେ ପାଟଣାଗଡ଼ ଥାନାରେ ଏତଲା ଦେଇଛନ୍ତି ଦାନ ମାଝୀ । ତେବେ ଦାନ ମାଝୀ ଆଣିଥିବା ଅଭିଯୋଗ ନେଇ ମନୋଜ ବାଗଙ୍କ ପ୍ରତିକ୍ରିୟା ମିଳିପାରି ନାହିଁ ।