କଟକ ସର୍କଲ ଖଣି ବିଭାଗର ଡେପୁଟି ଡାଇରେକ୍ଟର ଦେବବ୍ରତ ମହାନ୍ତିଙ୍କ ଘରୁ ନଗଦ 4କୋଟି ରୁ ଅଧିକ ଟଙ୍କା ମିଳିବା ଘଟଣା ସାମ୍ନାକୁ ଆସିଲା ଚାଞ୍ଚଲ୍ୟକର ତଥ୍ୟ । ସହିଦନଗର ଅଞ୍ଚଳରେ ଏକ ବିଳାସ ଆପାର୍ଟମେଣ୍ଟରେ ଫ୍ଲାଟ କିଣିବାକୁ ଦେବବ୍ରତ ଟଙ୍କା ରଖିଥିଲେ । 5 କୋଟି ଟଙ୍କାରେ ଏହି ଫ୍ଲାଟ୍ ଫାଇନାଲ ହୋଇଥିଲା । ସେଥିପାଇଁ ଦେବବ୍ରତ ବିଲଡରଙ୍କୁ 1କୋଟି ଟଙ୍କା ଆଗୁଆ ଦେଇଥିଲେ । ସେପଟେ ଘରେ ଏତେ ଟଙ୍କା ରଖିବା ପଛର ରହସ୍ୟ ଖୋଜୁଛି ଭିଜିଲାନ୍ସ । ସେନେଇ ପ୍ରକ୍ରିୟା ଆରମ୍ଭ କରିଛି ଭିଜିଲାନ୍ସ । ସେପଟେ ପଡୋଶୀ ମାନେ କହିଛନ୍ତି କେବେ ଘରର କବାଟ ଖୋଲା ରଖନ୍ତି ନାହିଁ ଦେବବ୍ରତ । କଳା ଟଙ୍କା ଠୁଳ କରିବାରେ ମାହିର ଥିଲେ । ଟଙ୍କା ସବୁକୁ ନିଜ ଶୋଇବା ଘର ଗଦି ତଳେ ରଖୁଥିଲେ।
ଗତ 25 ତାରିଖରେ ଭିଜିଲାନ୍ସ ଜାଲରେ ପଡ଼ିଥିଲେ କଟକ ସର୍କଲର ଖଣି ଉପନିର୍ଦ୍ଦେଶକ ଦେବବ୍ରତ ମହାନ୍ତି। ଓଡ଼ିଶା ଭିଜିଲାନ୍ସ ତାଙ୍କୁ ଗିରଫ କରିଛି । ତାଙ୍କ ଘରୁ ୪ କୋଟି ଟଙ୍କା ଜବତ କରିଥିଲା ଭିଜିଲାନ୍ସ। ଏଥିସହ ତାଙ୍କ ଅଫିସ୍ ଡ୍ରୟରରୁ ୧ ଲକ୍ଷ ୨୦ ହଜାର ଟଙ୍କା ଜବତ ହୋଇଥିଲା। ଖାଲି ଟଙ୍କା ନୁହେଁ ବିପୁଳ ସୁନା ମଧ୍ୟ ଜବତ କରିଛନ୍ତି ଭିଜିଲାନ୍ସ ଅଧିକାରୀ । ପାଖାପାଖି ୧୩୦ ଗ୍ରାମ୍‌ ସୁନା ମିଳିଥିଲା ବାବୁଙ୍କ ଘରୁ । ଭୁବନେଶ୍ବର ପାହାଳରେ ୨୪ ଶହ ବର୍ଗଫୁଟର ଏକ ଦୁଇ ମହଲା ଘର ମଧ୍ୟ ରହିଛି।

ମାସିକ ୮ ହଜାର ଟଙ୍କା ଦରମାରେ ୨୦୦୪ରେ ସରକାରୀ ଚାକିରିରେ ଯୋଗ ଦେଇଥିଲେ ଦେବବ୍ରତ। ବଲାଙ୍ଗୀରରେ ଜୁନିୟର ମାଇନିଂ ଅଫିସର ଭାବେ ଚାକିରି ଆରମ୍ଭ କରିଥିଲେ । ଚଳିତବର୍ଷ ଜାନୁଆରୀ ୭ରେ କଟକରେ ଡେପୁଟି ଡାଇରେକ୍ଟର ମାଇନ୍ସ ଭାବେ ଯୋଗ ଦେଇଥିଲେ । କଟକ, କେନ୍ଦ୍ରାପଡ଼ା, ପୁରୀ ଓ ଦଶପଲାର ମେଜର ଓ ମାଇନର ମିନେରାଲ ବାବୁଙ୍କ ଅଧୀନରେ ଥିଲା । ୨୦୨୮ ମେ'ରେ ନେଇଥାନ୍ତେ ଅବସର ହେଲେ ତା ପୂର୍ବରୁ ଲାଞ୍ଚ ମାମଲାରେ ଜେଲ ହାଜତକୁ ଯାଇଛନ୍ତି ଦେବବ୍ରତ।

ଭିଜିଲାନ୍ସ ଚଢ଼ାଉରେ ଆଜିଯାଏଁ ଜବତ ହୋଇଥିବା ନଗଦ ଟଙ୍କାର ସର୍ବକାଳୀନ ରେକର୍ଡ । ପୂର୍ବରୁ ଏକଜିକ୍ୟୁଟିଭ୍ ଇଞ୍ଜିନିୟର କାର୍ତ୍ତିକେଶ୍ବର ରାଉଳଙ୍କଠାରୁ ୩ କୋଟି ୪୧ ଲକ୍ଷ ୬୬ ହଜାର ୨୮୦ ଟଙ୍କା, ନବରଙ୍ଗପୁରର ଅତିରିକ୍ତ ଉପ ଜିଲ୍ଲାପାଳ ପ୍ରଶାନ୍ତ କୁମାର ରାଉତଙ୍କ ଘରୁ ୩ କୋଟି ୧୨ ଲକ୍ଷ ୩୦ ହଜାର ୮୦୦ଟଙ୍କା, RW ବିଭାଗ ମୁଖ୍ୟ ଯନ୍ତ୍ରୀ, ବୈକୁଣ୍ଠ ନାଥ ଷଡଙ୍ଗୀଙ୍କ ଘରୁ ୨କୋଟି ୫୬ଲକ୍ଷ ଟଙ୍କା, ମାଲକାନଗିରି ଜଳସମ୍ପଦ ବିଭାଗ ପିଡି ଶାନ୍ତନୁ ମହାପାତ୍ରଙ୍କ ୨ କୋଟି ୮ ଲକ୍ଷ ଟଙ୍କା ଓ ଖଣି ବିଭାଗ ଅତିରିକ୍ତ ନିର୍ଦ୍ଦେଶକ ଉମେଶ ଚନ୍ଦ୍ର ଜେନାଙ୍କ ବିଭିନ୍ନ ଠିକଣାରେ ଚଢ଼ାଉ କରି ୧ କୋଟି ୬୪ ଲକ୍ଷ ନଗଦ ଟଙ୍କା ଜବତ କରିଥିଲା ଭିଜିଲାନ୍ସ । ସ୍ବାଭାବିକ ଭାବେ ସନ୍ଦେହ ହେଉଛି, ସରକାରୀ ପଦପଦବୀର ଦୁରୂପଯୋଗ କରି ନିଜସ୍ବ ବ୍ୟାଙ୍କ ବାଲାନ୍ସ ବଢ଼ାଇଛନ୍ତି ଏହି ବଡ଼ ବାବୁ ।

ଏଥିସହ ପଢ଼ନ୍ତୁ: ଦେବବ୍ରତ ମହାନ୍ତିଙ୍କୁ ରିମାଣ୍ଡରେ ଆଣିବ ଭିଜିଲାନ୍ସ, ଇଡି ମାଗିଲା ତଥ୍ୟ