Debrigarh Tiger Sighting / ଘଞ୍ଚ ଜଙ୍ଗଲରେ ମହାବଳର ରାଜକୀୟ ଠାଣି, ଦେବ୍ରିଗଡ଼ରେ ପର୍ଯ୍ୟଟକଙ୍କ କ୍ୟାମେରାରେ କଏଦ ବାଘର ଜଲୱା

ଜଙ୍ଗଲରେ ମହାବଳର ରାଜକୀୟ ଠାଣି । କେଉଁଠି ପର୍ଯ୍ୟଟକଙ୍କ ପାଇଁ ରୋମାଞ୍ଚର ଖୋରାକ୍, ତ ଆଉ କେଉଁଠି ଗ୍ରାମବାସୀଙ୍କ ମନରେ ବାଘ ଆତଙ୍କ । ଦେବ୍ରୀଗଡ଼ରେ ପର୍ଯ୍ୟଟକଙ୍କ କ୍ୟାମେରାରେ କଏଦ ହୋଇଛି ମହାବଳର ମୁକ୍ତ ବିଚରଣର ଦୃଶ୍ୟ । ଏମିତିକି ନିଜ ଶିକାରୀ ଅନ୍ଦାଜରେ ସମ୍ବର ହରିଣକୁ ଶିକାର କରିଛି ବାଘ । କିନ୍ତୁ ନୂଆପଡ଼ାରେ ଘରେ ପଶି କୁକୁରକୁ ଟେକିନେଇଛି କଲରାପତରିଆ । ଶିମିଳିପାଳ ପାଦଦେଶରେ ଛେଳି ମୃତ୍ୟୁକୁ ନେଇ ଆତଙ୍କ, ଆଉ କୋରାପୁଟରେ ମହାବଳକୁ ନେଇ ଚର୍ଚ୍ଚା ।

ଦେବ୍ରୀଗଡ଼ ଅଭୟାରଣ୍ୟରେ ସୋମବାର ଅପରାହ୍ନରେ ପର୍ଯ୍ୟଟନ ଅଞ୍ଚଳରେ ବୁଲୁଥିବା ମହାବଳକୁ ଦେଖି ଖୁସିରେ ଆତ୍ମହରା ପର୍ଯ୍ୟଟକ । ୪ଟି ସଫାରି ଗାଡ଼ିରେ ଥିବା ପ୍ରାୟ ୪୦ ଜଣ ପର୍ଯ୍ୟଟକଙ୍କୁ ମିଳିଛି ବିରଳ ଦୃଶ୍ୟର ସାକ୍ଷୀ ହେବାର ସୁଯୋଗ । କେବଳ ବୁଲାବୁଲି ନୁହେଁ, ଜଙ୍ଗଲରେ ନିଜ ଶିକାରୀ ଅନ୍ଦାଜ ମଧ୍ୟ ଦେଖାଇଛି ମହାବଳ । ସନ୍ଧ୍ୟାରେ ଅଭୟାରଣ୍ୟର ମୁଖ୍ୟ ଅଞ୍ଚଳରେ ଏକ ସମ୍ବର ହରିଣକୁ ଶିକାର କରିଛି ।

ତେବେ ଜଙ୍ଗଲର ରାଜାଙ୍କ ସୁରକ୍ଷା ପାଇଁ ବନ ବିଭାଗର ବି କଡ଼ା ପ୍ରସ୍ତୁତି । ହୀରାକୁଦ ଜଳଭଣ୍ଡାର ସହ ଅଭୟାରଣ୍ୟର ପଶ୍ଚିମ ସୀମାରେ ପାଟ୍ରୋଲିଂକୁ କଡ଼ାକଡ଼ି କରାଯାଇ ଶିକାରୀ, ଫାନ୍ଦ କିମ୍ବା ସନ୍ଦେହଜନକ ଗତିବିଧି ଉପରେ ନଜର ରହିଛି । ସୂଚନା ଦେଲେ ୧ ହଜାର ଟଙ୍କା ପୁରସ୍କାର ସହ ସୂଚନାଦାତାଙ୍କ ପରିଚୟ ମଧ୍ୟ ଗୋପନ ରଖାଯିବ ।

ଦେବ୍ରୀଗଡ଼ର ଏହି ରୋମାଞ୍ଚକ ଦୃଶ୍ୟର ଠିକ୍ ବିପରୀତ ଚିତ୍ର ଦେଖିବାକୁ ମିଳିଛି ନୂଆପଡ଼ାରେ । ଏଠି ବାଘ ନୁହେଁ, କଲରାପତରିଆ ଆତଙ୍କରେ ଛାନିଆ ଗ୍ରାମବାସୀ । ଆମାନାରା ସେକ୍ସନର ଭଇସାଦରାହ ଗାଁରେ ଚମନ ଲାଲ ମିର୍ଧାଙ୍କ ଘରେ ପଶି କୁକୁରକୁ ଟେକିନେଇଛି କଲରାପତରିଆ । ଏହି ଘଟଣା ପରେ ପୂରା ଅଞ୍ଚଳରେ ଖେଳିଯାଇଛି ଭୟର ବାତାବରଣ ।

ଶିମିଳିପାଳ ପାଦଦେଶରେ ବି ବାଘକୁ ନେଇ ଆତଙ୍କ । ମୟୂରଭଞ୍ଜ ଜିଲ୍ଲାର ତିଳବାଡ଼ି ଗାଁରେ ଚାରି ଚାରିଟି ଛେଳିଙ୍କୁ ବାଘ ମାରିଥିବା ସନ୍ଦେହ କରୁଛି ବନ ବିଭାଗ । କୋରାପୁଟରେ ବି ମହାବଳକୁ ନେଇ ଚର୍ଚ୍ଚା । ମରିଚମାଳ ଗ୍ରାମାଞ୍ଚଳ ଓ ଆଖପାଖ ଜଙ୍ଗଲରେ ମହାବଳ ବୁଲୁଥିବା ନେଇ ସୋସିଆଲ୍ ମିଡିଆରେ କିଛି ଫଟୋ ଭାଇରାଲ ପରେ ଏହାର ସତ୍ୟତା ଯାଞ୍ଚ କରୁଛି ବନ ବିଭାଗ ।

ଜଙ୍ଗଲ ତା'ର ଘର... ଶିକାର ତା'ର ପ୍ରକୃତି... ଆଉ ଜଙ୍ଗଲର ସନ୍ତୁଳନ ପାଇଁ ମହାବଳର ଉପସ୍ଥିତି ବି ଜରୁରୀ । କିନ୍ତୁ ଯେତେବେଳେ ଜଙ୍ଗଲ ଓ ଜନବସତିର ସୀମା ସଙ୍କୁଚିତ ହୁଏ, ସେତେବେଳେ ମଣିଷ ଓ ବନ୍ୟଜନ୍ତୁଙ୍କ ମଧ୍ୟରେ ସଂଘର୍ଷ ବଢ଼େ । ତେବେ ପ୍ରଶ୍ନ ଏତିକି... ଜଙ୍ଗଲର ରାଜା ଜଙ୍ଗଲରେ ସୁରକ୍ଷିତ ରହିବ ତ ? ଆଉ ଜଙ୍ଗଲ ପାଖରେ ରହୁଥିବା ମଣିଷର ଜୀବନ ଓ ଜୀବିକା ସୁରକ୍ଷିତ ରହିବ ତ ?