ଦୋଷୀଙ୍କୁ ତୁରନ୍ତ ଗିରଫ କର: ଉପମୁଖ୍ୟମନ୍ତ୍ରୀ

ପୁଣି ଆଉ ଜଣେ ଛାତ୍ରୀ ପୋଡ଼ିଯିବା ଘଟଣା ରାଜ୍ୟରେ ଚହଳ ସୃଷ୍ଟି କରିଛି। ନିମାପଡ଼ା ବଳଙ୍ଗାରେ ଦୁର୍ବୃତ୍ତଙ୍କ ଆକ୍ରମଣରେ ନାବାଳିକା ପୋଡ଼ିଯିବା ଘଟଣା । ୫ ଜଣଙ୍କୁ ଉଠାଇ ଆଣିଛି ପୋଲିସ। ଘଟଣାସ୍ଥଳରେ ପହଞ୍ଚି ଛାନଭିନ କରୁଛି ପୋଲିସ ଟିମ୍ । ପୁରୀ ଏସପି ପିନାକ ମିଶ୍ର ମଧ୍ୟ ଘଟଣା ସ୍ଥଳରେ ପହଞ୍ଚିଛନ୍ତି । ଏପଟେ ପୀଡ଼ିତା ନାବାଳିକାଙ୍କୁ ଭୁବନେଶ୍ବର ଏମ୍ସରେ ଭର୍ତ୍ତି କରାଯାଇଛି । ତାଙ୍କର ସମସ୍ତ ଚିକିତ୍ସା ଖର୍ଚ୍ଚ ରାଜ୍ୟ ସରକାର ବହନ କରିବେ ବୋଲି ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

ନିମାପଡ଼ା ବଳଙ୍ଗାରେ ନାବାଳିକାକୁ ଜାଳିଦେବା ଘଟଣାରେ ଆକ୍ସନ୍ ମୋଡରେ ରାଜ୍ୟ ସରକାର। ଦୋଷୀଙ୍କୁ ତୁରନ୍ତ ଗିରଫ କରିବାକୁ ପୋଲିସକୁ ନିର୍ଦ୍ଦେଶ ଦେଲେ ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । ସେ କହିଛନ୍ତି ଦୋଷୀଙ୍କ ବିରୋଧରେ ନିଆଯିବ କଡ଼ା କାର୍ଯ୍ୟାନୁଷ୍ଠାନ। ଏମ୍ସରେ ନାବାଳିକାର ଚିକିତ୍ସା ଖର୍ଚ୍ଚ ବହନ କରିବେ ରାଜ୍ୟ ସରକାର । ଏମ୍ସ ଯାଇ ପୀଡ଼ିତାଙ୍କୁ ଭେଟିବେ ଉପମୁଖ୍ୟମନ୍ତ୍ରୀ ।

ଆଜି ସକାଳେ ନିମାପଡ଼ା ବଳଙ୍ଗା ବାଇଆବର ଅଞ୍ଚଳରେ ଏହି ଘଟଣା ଘଟିଛି । ନାବାଳିକା ଜଣକ ଚାଲି ଚାଲି ସାଙ୍ଗ ଘରକୁ ଯାଉଥିବାବେଳେ ତାଙ୍କୁ ରାସ୍ତାରେ ଅଟକାଇଥିଲେ କେତେକ ଦୁର୍ବୃତ୍ତ। ତା ଦେହରେ ନିଆଁ ଲଗାଇ ଦେଇଥିଲେ। ଝିଅଟିର ହାତ, ଗୋଡ଼, ଦେହର କିଛି ଅଂଶ ପୋଡ଼ିଯାଇଛି । ନାବାଳିକାଙ୍କ ଶରୀରର ୭୦ % ପୋଡ଼ିଯାଇଥିବା ଜଣାପଡ଼ିଛି। ରାଜ୍ୟବାସୀଙ୍କ ମନରୁ ବାଲେଶ୍ୱର ଘଟଣା ଲିଭିନଥିବାବେଳେ ପୁଣି ଆଉ ଏକ ଘଟଣା ଦେଖିବାକୁ ମିଳୁଛି। ଯାହାକୁ ନେଇ ଚିନ୍ତାପ୍ରକଟ କରୁଛନ୍ତି ରାଜ୍ୟବାସୀ। ସେପଟେ ବାଲେଶ୍ବର ଫକୀର ମୋହନ କଲେଜ ଛାତ୍ରୀ ମୃତ୍ୟୁ ଘଟଣାରେ କ୍ରାଇମବ୍ରାଞ୍ଚ ବି ତଦନ୍ତ କରୁଛି । ମୃତ ଛାତ୍ରୀଙ୍କ ସହପାଠୀ କଶିଶ୍ ଦାସ କଣ କହିଲେ କ୍ରାଇମବ୍ରାଞ୍ଚକୁ।