ଅର୍ଗସ ବ୍ୟୁରୋ : ରାଜ୍ୟ ସରକାରଙ୍କ ବିକାଶ କେବଳ କାଗଜ କଲମରେ ସୀମିତ । ଅନୁଦାନ ଆସୁଛି, କିନ୍ତୁ ବିକାଶମୂଳକ କାମରେ ଲାଗୁନି । କେବଳ ଫଳକ ଓ ବୁକଲେଟରେ ସୀମିତ ହୋଇ ରହିଯାଉଛି ନବୀନଙ୍କ ବିକାଶ । ଏ ହେଉଛି, ରାଜଧାନୀ ଉପକଣ୍ଠ ବାଲିପାଟଣା ବ୍ଲକ ସୋମଣା ପଞ୍ଚାୟତ କୁଦସାହିର ୧୭ ନଂ ୱାର୍ଡ । ଏଠି ୩ ଲକ୍ଷ ଟଙ୍କାର ଘର ହେବ ବୋଲି ଫଳକ ମରାଗଲା । 

ପରେ ପଞ୍ଚାୟତ ତରଫରୁ ମିଳୁଥିବା ପଞ୍ଚାୟତ ବିକାଶର ବୁକଲେଟରେ ଘର ମଧ୍ୟ ହେଇଗଲା । ହେଲେ ବାସ୍ତବରେ, ନା ଘର ଅଛି ନା ଘର ତିଆରି ପାଇଁ କୌଣସି ଉଦ୍ୟମ କରାଯାଇଛି । କେବଳ ପ୍ରଚାର କରି ଚୁପ ରହିଛନ୍ତି ରାଜ୍ୟ ସରକାର । ଏଠି ପ୍ରଶ୍ନ ଉଠୁଛି, ଗାଁର ବିକାଶ ପାଇଁ ଆସିଥିବା ଅର୍ଥ ଗଲା କୁଆଡ଼େ ? କେବଳ ଏତିକିରେ ସରିନି ଏ ଗାଁର ଦୁଃଖ । ଗାଁକୁ ଯିବାକୁ ଭଲ ରାସ୍ତା ଖଣ୍ଡେ ନାହିଁ, ପିଇବା ପାଣିର ନ କହିଲେ ଭଲ । ଗାଁର ପୋଖରୀ ବ୍ୟବହାର ଯୋଗ୍ୟ ବି ନାହିଁ । 

ମହିଳା ମାନଙ୍କ ପାଖରେ କୌଣସି ଆତ୍ମ ନିର୍ଭର ରୋଜଗାର ପନ୍ଥା ବି ନାହିଁ । ହେଲେ ଏତେ ସବୁ ଅସୁବିଧା ଶୁଣୁଛି କିଏ । ବଞ୍ଚିତ ହୋଇଥିବା ୱାର୍ଡର ସମସ୍ତ ଗ୍ରାମବାସୀ ବିଡିଓଙ୍କୁ ଲିଖିତ ଅଭିଯୋଗ କରିଛନ୍ତି । ଯଦି ଅନୁଦାନ ଟଙ୍କା ଲୋକଙ୍କୁ ନ ମିଳେ ତାହେଲେ ଆଗାମୀ ନିର୍ବାଚନରେ ଭୋଟ୍‌ ବର୍ଜନର ଚେତାବନୀ ମଧ୍ୟ ଦେଇଛନ୍ତି  । ସେପଟେ ଏନେଇ ଆମେ ବିଡିଓଙ୍କର ପ୍ରତିକ୍ରିୟା ନେବାକୁ ଚେଷ୍ଟା କରିଥିଲୁ । କିନ୍ତୁ ସେ କ୍ୟାମେରା ସାମ୍ନାରେ କିଛି କହିବାକୁ ମନା କରିଦେଇଥିଲେ । ସରକାର ଦେଉଥିବା ଅନୁଦାନକୁ କିଏ କରିଛି ଚଳୁ ? ଅନୁଦାନରୁ ବଞ୍ଚିତ ଗ୍ରାମବାସୀଙ୍କ ହକ୍‌ର ଅଧିକାର କେବେ ମିଳୁଛି ତାହା ଦେଖୁବାକୁ ଅପେକ୍ଷା ।