ବୁଧବାର ଅନୁଗୁଳ ଜିଲ୍ଲା ଗସ୍ତରେ ଯାଇ ବିଭିନ୍ନ ଉନ୍ନୟନ ମୂଳକ କାର୍ଯ୍ୟରେ ଯୋଗ ଦେଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେ ଅନୁଗୁଳ ଜିଲ୍ଲାର ବନରପାଳ ଓ କଣିହାଁ ବ୍ଲକରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟର ଉଦଘାଟନ ଓ ଶିଳାନ୍ୟାସ କରିଛନ୍ତି । ପ୍ରଥମେ ଢେଙ୍କାନାଳ ଜିଲ୍ଲାର ବିଭିନ୍ନ ଉନ୍ନୟନ ମୂଳକ କାର୍ଯ୍ୟରେ ଯୋଗ ଦେବା ପରେ ଅନୁଗୁଳରେ ପହଞ୍ଚିଥିଲେ କେନ୍ଦ୍ରମନ୍ତ୍ରୀ । ଅନୁଗୁଳର ବନରପାଳ ବ୍ଲକ ଜୋରାଗାଡ଼ିଆ ଗ୍ରାମରେ ମହୀଧରପୁରଠାରୁ ସନ୍ତ୍ରୀ ଛକ ପର୍ଯ୍ୟନ୍ତ ସୋଲାର ଷ୍ଟ୍ରିଟ ଲାଇଟ ପ୍ରକଳ୍ପ ସହ ବିଭିନ୍ନ ଉନ୍ନୟନମୂଳକ କାର୍ଯ୍ୟର ଶୁଭ ଉଦଘାଟନ କରିଛନ୍ତି ।

ସେହିପରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କଣିହାଁରେ ପ୍ରଜାମଣ୍ଡଳ ଭବନର ଭୂମିପୂଜନ କରିବା ସହ ପବିତ୍ର ମୋହନ ଉଚ୍ଚ ବିଦ୍ୟାଳୟର ବିଭିନ୍ନ ପ୍ରକଳ୍ପର ଭୂମିପୂଜନ ଓ ଉଦଘାଟନ କରିଛନ୍ତି । ଏଥିସହ କଣିହାଁରେ ଟିକିରା ନଦୀ ଉପରେ ଏକ ବ୍ରିଜର ମଧ୍ୟ ଶୁଭ ଉଦଘାଟନ କରିଛନ୍ତି । ଏହି ବ୍ରିଜଟି ଜିଲ୍ଲା ଖଣିଜ ପାଣ୍ଠିରୁ ନିର୍ମାଣ ହୋଇଛି । ଏହାର କାର୍ଯ୍ୟ ବର୍ଷକ ତଳୁ ଶେଷ ହୋଇଥିଲେ ମଧ୍ୟ ପଟାଖମଣ ପଟୁ ପେଲର ଆପ୍ରୋଚ୍ ରୋଡ଼ ନିର୍ମାଣରେ ସମସ୍ୟା ଦେଖାଦେଇଛି । ରାସ୍ତାଟି ଏକ ଘରୋଇ ମାଲିକାନାରେ ଥିବା ଜମି ଦେଇ ଯାଉଥିବାରୁ ଆପ୍ରୋଚ୍ ରୋଡ୍ ନିର୍ମାଣରେ ପ୍ରତିବନ୍ଧକ ସାଜିଛି ।

ଆଉ ଏହା ଜାଣିବା ପରେ କେନ୍ଦ୍ରମନ୍ତ୍ରୀ ବାଇକ୍‌ରେ ଅନୁଗୁଳ ଜିଲ୍ଲାପାଳ ଅଦାଲ ଏମ୍. ଅଖତରଙ୍କୁ ବସାଇ ପ୍ରାୟ ୫ ଶହ ମିଟର ଦୂର ସିଧା ପଟଖମଣ ଗ୍ରାମରେ ପହଞ୍ଚିଥିଲେ । ଆଉ ଜମି ମାଲିକ ମହେଶ୍ବର ସାହୁଙ୍କୁ ଡକାଇଥିଲେ । କେନ୍ଦ୍ରମନ୍ତ୍ରୀ ଜମି ମାଲିକଙ୍କ ସହ ରାସ୍ତା ସମସ୍ୟା ପ୍ରସଙ୍ଗରେ ଆଲୋଚନା କରିବା ସହ ଉପଯୁକ୍ତ କ୍ଷତିପୂରଣ ବଦଳରେ ଜମି ହସ୍ତାନ୍ତର କରିବାକୁ ବୁଝାସୁଝା କରିଥିବା ଜଣାପଡ଼ିଛି । ରାସ୍ତା ପାର୍ଶ୍ବରେ ଡ୍ରେନ୍ ନିର୍ମାଣ ଓ ଆଲୋକୀକରଣ ବ୍ୟବସ୍ଥା କରିବାକୁ ଧର୍ମେନ୍ଦ୍ର ପ୍ରଧାନ ଜିଲ୍ଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ

Argus News | argus news | Odisha Latest News, Breaking News, Trending News, Live TV