ଅର୍ଗସ ବ୍ୟୁରୋ: ଛେଣ୍ଡିପଦା ପାତ୍ରପଡ଼ା ଗଡ଼ମଣ୍ଡଳରେ ବିଜୟ ସଂକଳ୍ପ ସମାବେଶରେ ସାମିଲ ହୋଇ ସାଧାରଣ ସଭାକୁ ସମ୍ବୋଧନ କରି ଏହା କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଓଡ଼ିଶା, ଅନୁଗୁଳ ଓ ଛେଣ୍ଡିପଦାକୁ ବନେଇବା ପାଇଁ ରାଜମିସ୍ତ୍ରୀ ହେବାକୁ ସେ କହିଛନ୍ତି । ଓଡ଼ିଆ ଲୋକଙ୍କ କଥାକୁ ମୋଦିଙ୍କ ପାଖରେ ପହଞ୍ଚାଇବାକୁ ଡାକ ପିଅନ ହୋଇଛି ବୋଲି କହିଛନ୍ତି କେନ୍ଦ୍ରମନ୍ତ୍ରୀ ।

ବିଜୟ ସଂକଳ୍ପ ସମାବେଶରେ ଯୋଗ ଦେବା ସହ ବିଜେପି କରିଥିଲା ଶକ୍ତି ପ୍ରଦର୍ଶନ । ବିଶାଳ ରୋଡ୍ ସୋ' କରିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ହଜାର ହଜାର ସମର୍ଥକ ତାଙ୍କ ରୋଡ୍‌ ସୋରେ ସାମିଲ ହୋଇଥିଲେ । ପରେ ପରେ କୋଶଳାଠାରୁ ବିଶାଳ ବାଇକ ଶୋଭାଯାତ୍ରା କରି ଶକ୍ତି ପ୍ରଦର୍ଶନ କରିଥିଲେ ।

ବିଜୟ ସଂକଳ୍ପ ସମାବେଶରେ କାର୍ଯ୍ୟକ୍ରମରେ ବିଜେଡି ସରକାରର ଅପାରଗତା ନେଇ ବର୍ଷିଥିଲେ କେନ୍ଦ୍ରମନ୍ତ୍ରୀ । ରାଜ୍ୟରେ ଠିକାଦାରମାନଙ୍କୁ ପୋଷିବାକୁ ଯୋଜନା କରାଯାଉଥିବା ବେଳେ, ମାଆ ମାନଙ୍କ ପାଇଁ ପିଇବା ପାଣିର ବ୍ୟବସ୍ଥା ହେଉନି । ୨୫ ବର୍ଷର ଶାସନରେ ପିଇବା ପାଣି ସହ ବିପର୍ଯ୍ୟସ୍ତ ସ୍ବାସ୍ଥ୍ୟସେବା ନେଇ ବି ବର୍ଷିବା ସହ ଏ ସରକାରର ଏକ୍ସପାରୀ ହୋଇଯାଇଛି ବୋଲି କହିଥିଲେ କେନ୍ଦ୍ରମନ୍ତ୍ରୀ ।

କୋଶଳା ରାମଚଣ୍ଡୀ ମନ୍ଦିର ଦର୍ଶନ ଏବଂ ଛେଣ୍ଡିପଦା ଜଗନ୍ନାଥ ମନ୍ଦିର ଯାଇ ଆଶୀର୍ବାଦ ନେଇଥିଲେ କେନ୍ଦ୍ରମନ୍ତ୍ରୀ । କୋଶଳାଠାରେ ଦଳୀୟ କାର୍ଯ୍ୟାଳୟ ଉଦଘାଟନ କରିଥିଲେ । କେନ୍ଦ୍ରମନ୍ତ୍ରୀ ଏବଂ ଛେଣ୍ଡିପଦା ବିଜେପି ବିଧାୟକ ପ୍ରାର୍ଥୀ ଅଗସ୍ତି ବେହେରାଙ୍କ ଉପସ୍ଥିତରେ ବିଜୟ ସଂକଳ୍ପ ସମାବେଶରେ ବିଜେପିରେ ସାମିଲ ହୋଇଥିଲେ ଶହ ଶହ ବିଜେଡି ଓ କଂଗ୍ରେସ କର୍ମୀ ।

ଆହୁରି ପଢନ୍ତୁ ଓଡିଶା ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV