ପରିବର୍ତ୍ତନ ସହ ଓଡ଼ିଆ ଅସ୍ମିତାଙ୍କୁ ସୁରକ୍ଷା ଦେବା ପାଇଁ ଧର୍ମେନ୍ଦ୍ରଙ୍କ ଆହ୍ୱାନ
ଅର୍ଗସ ବ୍ୟୁରୋ: ଅନୁଗୁଳ ଜିଲ୍ଲା ଆଠମଲ୍ଲିକରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପାୱାର୍ ସୋ । ଶହ ଶହ କର୍ମୀ ଓ ନେତାଙ୍କୁ ନେଇ ବିଶାଳ ରୋଡ୍ ସୋ କରି ବିପୁଳ ଜନ ସମର୍ଥନ ଜୁଟାଇଛନ୍ତି କେନ୍ଦ୍ରମନ୍ତ୍ରୀ । ପରେ ଜନସଭାରେ ଯୋଗଦେଇ ନରେନ୍ଦ୍ର ମୋଦିଙ୍କୁ ତୃତୀୟ ଥର ପ୍ରଧାନମନ୍ତ୍ରୀ ଓ ଓଡ଼ିଶାରେ ବିଜେପି ସରକାର ପାଇଁ ଭୋଟ୍ ଭିକ୍ଷା କରିଛନ୍ତି । ଗତକାଲି ପିଏମ୍ କହିଥିବା ଓଡ଼ିଆ ଅସ୍ମିତା କଥା ଦୋହରାଇଛନ୍ତି ଧର୍ମେନ୍ଦ୍ର । ଭିଡିଓରେ ରହୁଛନ୍ତି ମୁଖ୍ୟମନ୍ତ୍ରୀ, ଗୁମାସ୍ତାଙ୍କ ହାତରେ ରିମୋଟ୍ କଣ୍ଟ୍ରୋଲ୍ । ଆମ ପଇସାରେ ଦରମା ପାଉଥିବା ଲୋକ ଆଜି ଆମକୁ ନାଲି ଆଖି ଦେଖାଉଛି । ଗଣତନ୍ତ୍ରରେ ଏ କଂସ, ରାବଣ ରୂପୀ ଲୋକଙ୍କ ଭୋଟ୍ ନଦେଇ ପରାଜୟ କରିବାକୁ ପଡିବ କହି କଡ଼ା ଭର୍ତ୍ସନା କରିଛନ୍ତି କେନ୍ଦ୍ରମନ୍ତ୍ରୀ ।
ଏଥର ବିଜେଡିର ଖେଳ ଶେଷ, ଏହାପରେ ନରେନ୍ଦ୍ର ମୋଦିଙ୍କ ବିଜୟ ହେବ ବୋଲି ଆହ୍ବାନ ଦେଇଛନ୍ତି ଧର୍ମେନ୍ଦ୍ର । ସେ କହିଛନ୍ତି, ଆଠମଲ୍ଲିକବାସୀ ଲଢେଇ କରି ବିଜେଡିକୁ ଜିତାଇଥିଲେ । ହେଲେ ଜମିକୁ ପାଣି ମାଡିଲାନି କି ଗାଁରେ ପାଣି ପହଞ୍ଚିଲାନି । ଶିକ୍ଷକ ନାହାନ୍ତି କି ଡାକ୍ତର ନାହାନ୍ତି, ରୋଜଗାର ନାହିଁ । 25 ବର୍ଷରେ ବି 1 ନଂ ରାଜ୍ୟ କହୁଥିବା ଲୋକମାନେ ଏସବୁ କରାଇ ପାରିଲେ ନାହିଁ । ଏଠି କେବଳ ଓଡ଼ିଆଙ୍କୁ ଲୁଟି ପକେଟ୍ ଗରମ କରାଯାଉଛି । ଏଇଟାକୁ ପରିବର୍ତ୍ତନ କରିବାର ସମୟ ଆସିଛି ବୋଲି କହିଛନ୍ତି ଧର୍ମେନ୍ଦ୍ର ।
ଜନସଭାକୁ ଯିବା ପୂର୍ବରୁ ଆଠମଲ୍ଲିକ ତିଳେଶ୍ବରଠାରେ ମା' ପଥରପୁଞ୍ଜି ମନ୍ଦିରରେ ଦେବୀଙ୍କ ଆରାଧନା କରିବା ସହ ଅଞ୍ଚଳବାସୀଙ୍କ ଉତ୍ତରୋତ୍ତର ଉନ୍ନତି ଓ ସମାଜର କଲ୍ୟାଣ କାମନା କରିଥିଲେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।
ଅଧିକ ପଢ଼ନ୍ତୁ ଓଡିଶା ଖବର:
