ଶାନ୍ତିସ୍ତୂପ ନିକଟସ୍ଥ ଧଉଳି ଚାରୁକଳା ମହାବିଦ୍ୟାଳୟରେ “ଆର୍ଟିଷ୍ଟ ମିଟ୍” କାର୍ଯ୍ୟକ୍ରମ ଉତ୍ସାହର ସହ ଆୟୋଜିତ ହୋଇଥିଲା । ଏହି କାର୍ଯ୍ୟକ୍ରମରେ ମଣିପୁରର ପ୍ରସିଦ୍ଧ ଶିଳ୍ପୀ ଲିଏସନ୍ଥେମ ଈଶ୍ୱରଙ୍କ ସହିତ ଏକ କଳା ଚର୍ଚ୍ଚା ଅନୁଷ୍ଠିତ ହୋଇଥିଲା ।

ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇଥିବା ରାଷ୍ଟ୍ରୀୟ ଲଳିତ କଳା ଏକାଡେମୀର କ୍ଷେତ୍ରୀୟ ସଚିବ ରାମକୃଷ୍ଣ ବେଦାଲା ଅତିଥି ଶିଳ୍ପୀଙ୍କ ପରିଚୟ ଦେବା ସହିତ ମଣିପୁରର କଳା ଓ ସଂସ୍କୃତି ସମ୍ପର୍କରେ ସୂଚନା ପ୍ରଦାନ କରିଥିଲେ । ସେହିପରି ସମ୍ମାନିତ ଅତିଥି ଭାବେ ଶିଳ୍ପୀଗୁରୁ ବିଜୟ କୁମାର ପରିଡ଼ା ଯୋଗଦେଇଥିଲେ । ମହାବିଦ୍ୟାଳୟର ଅଧ୍ୟକ୍ଷ ଓ ଆନ୍ତର୍ଜାତୀୟ ଖ୍ୟାତିସମ୍ପନ୍ନ ଚିତ୍ରଶିଳ୍ପୀ ଡ. ପଞ୍ଚାନନ୍ ସାମଲ ଅତିଥିମାନଙ୍କୁ ସ୍ୱାଗତ ଜଣାଇଥିଲେ ।

ପରେ ଶିଳ୍ପୀ ଲିଏସନ୍ଥେମ ଈଶ୍ୱର ନିଜ କଳା ଯାତ୍ରା ବିଷୟରେ ଅଭିଜ୍ଞତା ସେୟାର କରିଥିଲେ ଓ ପିପିଟି ମାଧ୍ୟମରେ ନିଜ କଳାକୃତିଗୁଡ଼ିକୁ ପ୍ରଦର୍ଶନ କରିଥିଲେ । ତାଙ୍କ ଚିତ୍ରମାନଙ୍କରେ ମଣିପୁରର ସାମ୍ପ୍ରତିକ ଘଟଣାବଳୀକୁ ମାନବୀୟ ଆବେଗ, ବ୍ୟଥା ଓ ବେଦନାର ଗଭୀର ଅଭିବ୍ୟକ୍ତି ସହିତ ଚିତ୍ରିତ କରାଯାଇଥିଲା, ଯାହା ସମସ୍ତଙ୍କୁ ମନ୍ତ୍ରମୁଗ୍ଧ କରିଦେଇଥିଲା । ଏହି ଅବସରରେ ଅତିଥି ଶିଳ୍ପୀଙ୍କୁ ସମ୍ମାନିତ କରାଯାଇଥିଲା ଓ ଅନସୁୟା ଓଝାଙ୍କୁ ମଧ୍ୟ ସମ୍ବର୍ଦ୍ଧନା ଜଣାଇଥିଲା ।

ଏହି ଅବସରରେ ଶିଳ୍ପୀଙ୍କୁ ସମ୍ବର୍ଦ୍ଧିତ କରିବା ସହିତ ଅନସୁୟା ଓଝାଙ୍କୁ ସମ୍ବର୍ଦ୍ଧିତ କରାଯାଇଥିଲା । ମହାବିଦ୍ୟାଳୟର ଉପାଧ୍ୟକ୍ଷ ଚନ୍ଦନ କୁମାର ସାମଲ, ଅଧ୍ୟାପକ ରାମଶଙ୍କର ସାହୁ, ଭୂପତି ଭୂଷଣ ପଣ୍ଡା, ସୋଫିଆ ୟସ୍ମିନ, ରାଜେନ୍ଦ୍ର ବର୍ମା, ଲକ୍ଷ୍ମୀଧର ସ୍ୱାଇଁ, ଶିଳ୍ପୀ ସୁଶାନ୍ତ କୁମାର ସିଂ ସାମନ୍ତ, ଦିଲ୍ଲୀପ କୁମାର ସାହୁ, ମାନସ ମହାରଥୀ, ରାଜୀବ ଦେ ଓ ସୁଲୋଚନା ମହାରଣା ପ୍ରମୁଖ ଶିଳ୍ପୀଙ୍କ ସହିତ ଆଲୋଚନା କରିଥିଲେ । ମହାବିଦ୍ୟାଳୟର ଛାତ୍ରଛାତ୍ରୀମାନେ ଶିଳ୍ପୀଙ୍କ ଜୀବନୀ ଓ ତାଙ୍କ ଚିତ୍ର ଶୈଳୀ ବିଷୟରେ ପଚାରି ବୁଝିଥିଲେ । ଏହି 'ଆର୍ଟିଷ୍ଟ ମିଟ୍' କାର୍ଯ୍ୟକ୍ରମ ଛାତ୍ରଛାତ୍ରୀମାନଙ୍କ ପାଇଁ ବେଶ୍ ଶିକ୍ଷଣୀୟ ଥିଲା ।