ଭୁବନେଶ୍ୱର: ଖଣ୍ଡଗିରି ଯାତ୍ରାକୁ ବଢ଼ିଲା ବିବାଦ । ଖଣ୍ଡଗିରି ଯାତ୍ରାରେ ଡବଲ ସୋ ନେଇ ଥାନାରେ ଫେରାଦ ହେଲା ଯାତ୍ରା କମିଟି । ସେଭେନ୍ ନାଇଟ ସୋ ରେ ଦୁଇଟି ଯାତ୍ରା କମିଟି ଡବଲ ସୋ କରିବା ନେଇ ଟିକେଟ ବିକ୍ରି ପରେ ବାକି 4 ଟି ଯାତ୍ରା କମିଟି ଖଣ୍ଡଗିରି ଥାନାର ଦ୍ୱାରସ୍ଥ ହୋଇଛନ୍ତି ।

ପୋଲିସ ଓ ବିଏମସିର ଗାଇଡ ଲାଇନ ଅନୁସାରେ କୌଣସି ଯାତ୍ରା କମିଟି ଯାତ୍ରା ପାର୍ଟିକୁ ଡବଲ ସୋ ପାଇଁ ଅନୁମତି ଦେଇ ପାରିବେ ନାହିଁ । ହେଲେ ମହତାବ ଯାତ୍ରା କମିଟି ଓ ଇନ୍ଦିରା ଯାତ୍ରା କମିଟି ଏହି ନିୟମ ଭଙ୍ଗ କରିଥିବା ଅଭିଯୋଗ ଆଣିଛନ୍ତି ସାଇ ନୀଳାଦ୍ରି, ସନାତନ, ମା ମଙ୍ଗଳା ଓ ଜୟଦୂର୍ଗା ଯାତ୍ରା କମିଟି ।

ପୋଲିସ କମିଶନର, ସ୍ଥାନୀୟ ଏ. ସି .ପି ଓ ବିଏମସିର ଅଧିକାରୀ ଡବଲ ସୋ କରିବା ନେଇ କଟକଣା ଜାରି କରିଥିବାବେଳେ କାହିଁକି ଏହାକୁ ବାଟବଣା କରାଯାଉଛି ବୋଲି ପ୍ରଶ୍ନ ଉଠାଇଛନ୍ତି 4ଟି ଯାତ୍ରା କମିଟି । ଖଣ୍ଡଗିରିରେ ସାଧୁସନ୍ଥ ମାନଙ୍କର ଭିଡ ଜମୁଛି, ଶ୍ରଦ୍ଧାଳୁ ଆସୁଛନ୍ତି, ବ୍ୟବସାୟ ଜମୁଛି , ଏକ୍ରାମ ମହୋତ୍ସବ ଚାଲିଛି । ଯଦି ସନ୍ଧ୍ୟା 6 ରୁ ରାତି 12 ଯାଏଁ ସୋ ଚାଲିବ ତେବେ ଟ୍ରାଫିକ ଜାମ ହେବ । ଲୋକମାନେ ହଇରାଣ ହେବେ । ଯାହାକୁ ନେଇ କଟକଣା ଜାରି କରାଯାଇଥିଲା ।

କିନ୍ତୁ ମହତାବ ଯାତ୍ରା କମିଟିରେ ତୁଳସୀ ଗଣନାଟ୍ୟ, ଇନ୍ଦିରା ଯାତ୍ରା କମିଟିରେ ଶିବାନୀ ଗଣନାଟ୍ୟ ଡବଲ ସୋ ଆଜି ଠାରୁ କରିବା ନେଇ ବିବାଦ ଉପୁଜିଛି । ଆଜି 'ସେଭେନ ନାଇଟ ସୋ' ରେ ମା ମଙ୍ଗଳାରେ ସ୍ଵର୍ଣ୍ଣ ମହଲ, ସାଇ ନୀଳାଦ୍ରିରେ ରଙ୍ଗ ମହଲ, ସନାତନରେ ସୂର୍ଯ୍ୟ ମନ୍ଦିର ଓ ଜୟ ଦୂର୍ଗାରେ ସ୍ବପ୍ନ ମହଲ ଅପେରା ପଡ଼ିଛି ।

ଆହୁରି ପଢନ୍ତୁ ଓଡିଶା ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV