୫୮ ବା ୬୦ ବର୍ଷକୁ ଅବସର ବୟସ ନିର୍ଦ୍ଧାରଣ କରିଛନ୍ତି ସରକାର । ଏବେ ତ ଅନେକ ଲୋକଙ୍କୁ ତା'ର ଢେର ପୂର୍ବରୁ ବାର୍ଦ୍ଧକ୍ୟ ମାଡ଼ି ଆସୁଛି । କିନ୍ତୁ କିଛି ଏମିତି ଲୋକ ବି ଅଛନ୍ତି ଯେଉଁମାନଙ୍କ ପାଇଁ ବୟସ ଏକ ସଂଖ୍ୟା ମାତ୍ର । ୧୦୦ ବର୍ଷ ବୟସରେ ପହଞ୍ଚିଥିଲେ ବି ସେମାନେ କେବଳ ସୁସ୍ଥ ଭାବେ ବଞ୍ଚୁଛନ୍ତି ତାହା ନୁହେଁ ସମାଜ ପାଇଁ ଗଭୀର ଚିନ୍ତା କରନ୍ତି, ଏମାନେ କାଳର କପାଳରେ ଲେଖନ୍ତି ନୂଆ ଅଧ୍ୟାୟ । ଏମିତି ଜଣେ ଆଦର୍ଶ ହେଉଛନ୍ତି ବ୍ରହ୍ମପୁରର ଡାକ୍ତର ପ୍ରଫେସର କେ. ଲକ୍ଷ୍ମୀବାଈ । ଆଉ ମାତ୍ର ୫ ଦିନ ପରେ ତାଙ୍କୁ ଶହେ ବର୍ଷ ପୂରିବ । ଆଉ ସେହି ଦିନ ସେ ନିଜର ଜୀବନବ୍ୟାପୀ ସଞ୍ଚିତ ପୁଞ୍ଜି ୩ କୋଟି ୪୦ ଲକ୍ଷ ଟଙ୍କା ସ୍ବାସ୍ଥ୍ୟ ସେବା ଉଦ୍ଦେଶ୍ୟରେ ଭୁବନେଶ୍ବର ଏମ୍ସକୁ ଦାନ କରିବେ ।

ଆମେରିକାରୁ ନେଇ ଓଡ଼ିଶା । ଯାହାଙ୍କ ହାତରେ ଆରୋଗ୍ୟଲାଭ କରିଛନ୍ତି ଅଗଣିତ ଲୋକ । ଡାକ୍ତରୀ ପେସାକୁ ଯିଏ କରିଥିଲେ ଜୀବନର ବ୍ରତ । ସେହି ମହୀୟସୀ ମହିଳାଙ୍କୁ ଆଉ ମାତ୍ର ୫ ଦିନ ପରେ ପୂରିବ ୧୦୦ ବର୍ଷ । ଯେଉଁ ବୟସରେ ମାଡ଼ି ବସେ ବାର୍ଦ୍ଧକ୍ୟ ଯନ୍ତ୍ରଣା, ନିଜ ସ୍ବାସ୍ଥ୍ୟ ଚିନ୍ତାରେ ମନ ହୋଇଯାଏ ଅବସାଦଗ୍ରସ୍ତ, ସେହି ବୟସରେ ତାଙ୍କ ମନରେ ସମାଜ ଚିନ୍ତା । ଶହେତମ ଜନ୍ମ ଦିନକୁ ସ୍ମରଣୀୟ କରିବାକୁ ଜୀବନବ୍ୟାପୀ ସଞ୍ଚିତ ପୁଞ୍ଜିକୁ ସମାଜ ଉଦ୍ଦେଶ୍ୟରେ କରିବେ ଉତ୍ସର୍ଗ । ଭୁବନେଶ୍ବର ଏମ୍ସକୁ ୩ କୋଟି ୪୦ ଲକ୍ଷ ଟଙ୍କା ଦେବେ ଡାକ୍ତର କେ. ଲକ୍ଷ୍ମୀ ବାଈ । ଏହି ଟଙ୍କାରେ ମହିଳା କର୍କଟ ରୋଗର ଚିକିତ୍ସା ହେବ । ଯେଉଁ ପେସାକୁ କରିଥିଲେ ଜୀବନର ନିଶା, ସେହି ସ୍ୱାସ୍ଥ୍ୟ ସେବାର ବିକାଶରେ ବିନିଯୋଗ ହେବ ଲକ୍ଷ୍ମୀବାଈଙ୍କ ଜୀବନ ବ୍ୟାପୀ ସାଧନାର ଅର୍ଥ । ଏଥିପାଇଁ ଭୁବନେଶ୍ବର ଏମ୍ସ ହସ୍ପିଟାଲ ସହ ସରିଛି ଆଲୋଚନା, କାଗଜପତ୍ର ବି ପ୍ରସ୍ତୁତ ।

୧୯୨୬ ଡିସେମ୍ବର ୫ରେ ଡାକ୍ତର ଲକ୍ଷ୍ମୀବାଈଙ୍କର ଜନ୍ମ । ସେ କଟକ SCB ମେଡିକାଲ କଲେଜର ପ୍ରଥମ ବ୍ୟାଚ୍ ଛାତ୍ରୀ । ୧୯୪୫ରୁ ୧୯୫୦ ଯାଏଁ MBBS ପଢ଼ା ସରିବା ପରେ, ୧୯୫୦ରୁ ସୁନ୍ଦରଗଡ଼ ଜିଲ୍ଲା ହସ୍ପିଟାଲରୁ ଆରମ୍ଭ କରିଥିଲେ ବୃତ୍ତିଗତ ଜୀବନ । ୧୯୮୬ରେ MKCG ମେଡିକାଲରେ ନେଇଥିଲେ ଅବସର । ସ୍ୱାସ୍ଥ୍ୟସେବା ପ୍ରତି ଅବଦାନ ଓ ଉଲ୍ଲେଖନୀୟ କାମ ପାଇଁ ଭାରତଜ୍ୟୋତି ଆଓ୍ବାର୍ଡ, ଇଣ୍ଟରନ୍ୟାସନାଲ ଫ୍ରେଣ୍ଡସିପ୍ ସୋସାଇଟି ଆୱାର୍ଡ ଓ ବେଷ୍ଟ ସିଟିଜେନ ଅଫ ଇଣ୍ଡିଆ ଆୱାର୍ଡରେ ସମ୍ମାନିତ ହୋଇଛନ୍ତି ଡାକ୍ତର ଲଷ୍ମୀବାଈ । ଅବସର ନେବା ପରେ ବ୍ରହ୍ମପୁର ଭାବାନଗରସ୍ଥିତ ଘରେ ରହୁଛନ୍ତି । ଡିସେମ୍ବର ୫ତାରିଖରେ ସେ ଶତବାର୍ଷିବ ପାଳନରେ ନିଜ ଦାନ ସମ୍ପର୍କରେ ଘୋଷଣା କରିବେ । ତାଙ୍କର ଛାତ୍ରୀ ତଥା ରାଜ୍ୟର ଜଣାଶୁଣା ଡାକ୍ତର ପ୍ରଫେସର ପି. ଭାରତୀ ଓ ଭାରତୀ ମିଶ୍ର ତଦାରଖ କରୁଛନ୍ତି ।

ଡାକ୍ତର ଲକ୍ଷ୍ମୀବାଈଙ୍କ ଭଳି ଦାନ କରି ଚର୍ଚ୍ଚାକୁ ଆସିଥିଲେ ଆଉ ଜଣେ ଡାକ୍ତର । ସମ୍ବଲପୁରର ସମାଜସେବୀ ଡାକ୍ତର ନାରାୟଣୀ ପଣ୍ଡା । ବୟସ ୮୭ ବର୍ଷ । ୨୦୨୪ ମସିହାରେ ସେ ରହୁଥିବା ବାସଗୃହକୁ ସମ୍ବଲପୁର ସରକାରୀ ମହିଳା ମହାବିଦ୍ୟାଳୟ ନାଁରେ ଦାନସୂତ୍ରରେ ପ୍ରଦାନ କରିଥିଲେ । ନିଜେ ପାଠ ପଢିଥିବା ଜିଏମ୍ ବିଶ୍ଵବିଦ୍ୟାଳୟ ସମେତ ବହୁ ଶିକ୍ଷାନୁଷ୍ଠାନକୁ ଲକ୍ଷ ଲକ୍ଷ ଟଙ୍କା ବହୁବାର ସେ ଦାନ କରି ସାରିଛନ୍ତି । ଏତିକି ନୁହେଁ ଏତେ ବୟସରେ ସେ ନିରନ୍ତର ଜାରି ରଖିଛନ୍ତି ସେବାକାର୍ଯ୍ୟ । କେବଳ ସେତିକି ନୁହେଁ ବିଭିନ୍ନ ସାମାଜିକ ଓ ଶିକ୍ଷାନୁଷ୍ଠାନ ସମେତ ସ୍ବାସ୍ଥ୍ୟ ବିଭାଗର ବିଭିନ୍ନ କମିଟି ଓ ରୋଟାରୀ କ୍ଲବ୍ ସଦସ୍ୟା ଭାବେ ସେ ପ୍ରତ୍ୟକ୍ଷ କାମ କରୁଛନ୍ତି । ମାନବ ସେବାକୁ ମାଧବ ସେବା ମଣୁଥିବା, ୮୬ ବର୍ଷ ବୟସରେ ସମସ୍ତଙ୍କ ପାଇଁ ଉଦାହରଣ ପାଲଟିଥିବା ଏହି ମହିୟସୀ ମହିଳାଙ୍କ ଅବଦାନର ଭୂୟସୀ ପ୍ରଶଂସା କରିଥିଲେ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।