ପୁରୀ: ମାନୁ ନାହାନ୍ତି କଟକଣା । କେବେ ଶ୍ରୀମନ୍ଦିର ଭିତରକୁ ସ୍ପାଏ କ୍ୟାମେରା ଚଷମା ପିନ୍ଧି ପଶୁଛନ୍ତି ତ କେବେ ମନ୍ଦିର ଉପରେ ଚକ୍କର କାଟୁଛି ଡ୍ରୋନ୍ । ଶୁକ୍ରବାର ଶ୍ରୀମନ୍ଦିର ଉପରେ ଡ୍ରୋନ୍ ଉଡ଼ାଉଥିବା ଜଣଙ୍କୁ ଧରିବା ସହ ଡ୍ରୋନ୍‌କୁ ଜବତ କରିଛି ପୁରୀ ପୋଲିସ ।

ଏଥିସହ ପଢ଼ନ୍ତୁ: ଦୁଇ ଦିନରେ ଦୁଇଥର ଶ୍ରୀମନ୍ଦିର ନିଷିଦ୍ଧାଞ୍ଚଳରେ ଉଡିଲାଣି ଡ୍ରୋନ୍

ପୁରୀ ଏସ୍‌ପି ପ୍ରତୀକ ସିଂହଙ୍କ ନିର୍ଦ୍ଦେଶରେ ସିଂହଦ୍ଵାର ଥାନା ପୋଲିସ ଓ ପୁରୀ ପୋଲିସର ଟିମ୍‌ ଡ୍ରୋନ୍‌ଟିକୁ ଜବତ କରିଛି । ଶନି ମନ୍ଦିର ଗଳିରୁ ଡ୍ରୋନ୍ ଜବତ ସହ ଡ୍ରୋନ୍ ଉଡ଼ାଉଥିବା ଯୁବକଙ୍କୁ ପୋଲିସ ଧରିଛି । ପୋଲିସ ଧରିଥିବା ଯୁବକ ଜଣଙ୍କ ଛତିଶଗଡ଼ର ଦୁର୍ଗା ପ୍ରସାଦ ଯାଦବ । ପୋଲିସ ତାଙ୍କୁ ଅଟକ ରଖି ପଚରାଉଚରା କରୁଛି ।

ସନ୍ଧ୍ୟାରେ ଶ୍ରୀମନ୍ଦିର ପରିକ୍ରମା ପରିସରରେ ଡ୍ରୋନ୍ ଉଡ଼ୁଥିବା ଦେଖିବାକୁ ମିଳିଥିଲା । ପୁରୀ ଏସ୍‌ପିଙ୍କ ନଜର ପଡ଼ିଥିଲା ଡ୍ରୋନ୍ ଉପରେ । ସଙ୍ଗେ ସଙ୍ଗେ ତଦନ୍ତ ସହ କାର୍ଯ୍ୟାନୁଷ୍ଠାନ ନିର୍ଦ୍ଦେଶ ଦେଇଥିଲେ ପୁରୀ ଏସ୍‌ପି ପ୍ରତୀକ ସିଂହ । ଆଉ ସିଂହଦ୍ୱାର ଥାନା ପୋଲିସ ଓ ପୁରୀ ପୋଲିସର ଏକ ବିଶେଷ ଟିମ୍‌ ଡ୍ରୋନ୍ ଜବତ ସହ ଜଣଙ୍କୁ ଅଟକ ରଖିଛି ।

ଏଥିସହ ପଢ଼ନ୍ତୁ: ଶ୍ରୀମନ୍ଦିର ଉପରେ ଡ୍ରୋନ୍ ଦେଖିଲେ ଖସାଇଦେବ ଆଣ୍ଟି ଡ୍ରୋନ୍ ସିଷ୍ଟମ୍

ଶ୍ରୀମନ୍ଦିର ଉପର ଓ ଏହାର ପରିସର ନୋ ଫ୍ଲାଇଂ ଜୋନ୍ ହୋଇଥିବାରୁ ଡ୍ରୋନ୍ ଉଡ଼ାଇବା ନିଷେଧ ଅଟେ । କିନ୍ତୁ ଅନେକ ସମୟରେ ଏହି କଟକଣା ବା ନିୟମକୁ ନ ମାନି ଅନେକ ଡ୍ରୋନ୍ ମନ୍ଦିର ଉପରେ ଉଡ଼ୁଛି । ଏବେ ଧରା ପଡ଼ିଥିବା ଯୁବକଙ୍କ ବିରୋଧରେ ଆଇନ୍ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛି ପୁରୀ ପୋଲିସ ।

ଗତ ମାସରେ ମଧ୍ୟ ଶ୍ରୀମନ୍ଦିର ଉପରେ ଦୁଇ ଦୁଇଥର ଡ୍ରୋନ୍ ଉଡ଼ିଥିଲା । ପ୍ରାୟ ୧୦ ମିନିଟ ଧରି ଶ୍ରୀମନ୍ଦିର ଉପରି ଭାଗରେ ଡ୍ରୋନ୍ ଚକ୍କର କାଟିିଥିଲା । ଶ୍ରୀମନ୍ଦିର ନୀଳଚକ୍ର ଉପରିଭାଗରେ ଡ୍ରୋନ୍ ଉଡ଼ିଥିଲା । ଏକ ଡ୍ରୋନ୍ ଶ୍ରୀମନ୍ଦିର ଉପରେ ବାରମ୍ବାର ପଇଁତରା ମାରିଥିଲା । ସବୁ କଟକଣା ସତ୍ତ୍ୱେ ଚଳିତ ବର୍ଷ ଶ୍ରୀମନ୍ଦିର ନିଷିଦ୍ଧାଞ୍ଚଳରେ ୧୦ରୁ ଅଧିକ ଥର ଉଡ଼ିଲାଣି ଡ୍ରୋନ୍ ।

ବିଗତ ଦେଢ଼ ବର୍ଷ ମଧ୍ୟରେ ଶ୍ରୀମନ୍ଦିର ସୁରକ୍ଷା ବାହିନୀ, ରକ୍ଷକ ଭ୍ୟାନ, ଜେଟିପି ମୁତୟନ ପରେ ବି ଡ୍ରୋନ୍ ବାରମ୍ବାର ଉଡ଼ୁଥିବା ବେଳେ ପୋଲିସକୁ ସେତେଟା ସଫଳତା ମିଳି ପାରୁନି । ପ୍ରତ୍ୟେକ ଥର କେବଳ ଡ୍ରୋନ୍ ଜବତ ଏବଂ ଉଡ଼ାଇଥିବା ବ୍ୟକ୍ତିକୁ ନୋଟିସରେ ସୀମିତ ରହି ଯାଉଛି ପୋଲିସର କାର୍ଯ୍ୟାନୁଷ୍ଠାନ । ଏବେ ଏ ଦିଗରେ ପୋଲିସ ଦୃଢ଼ ପଦକ୍ଷେପ ନେବାକୁ ଦାବି ହେଉଛି ।

Argus News | argus news | Odisha Latest News, Breaking News, Trending News, Live TV