Durga Puja Immersion / ଆଜି ମେଲାଣି ନେବେ ମା', ଭସାଣି ପାଇଁ ଟ୍ବିନ୍‌ ସିଟିରେ ବ୍ୟାପକ ପ୍ରସ୍ତୁତି; ସୋସିଆଲ ମିଡିଆ ଉପରେ କଡ଼ା ନଜର

ଶେଷ ହୋଇଛି ଜଗତଜନୀନ ମା' ଦୁର୍ଗାଙ୍କ ନବଦିନାତ୍ମକ ପୂଜା । ଆଜି ଧରାପୃଷ୍ଠରୁ ବିଦାୟ ନେବେ ଦେବୀ ଦୁର୍ଗା । ଭୁବନେଶ୍ୱର-କଟକରେ ମାଆଙ୍କ ବିସର୍ଜନ ପାଇଁ ନଦୀରେ ଅସ୍ଥାୟୀ ପୋଖରୀ ନିର୍ମାଣ କରାଯାଇଛି । ଦୁର୍ଗାପୂଜା ଭସାଣି ଶୋଭାଯାତ୍ରା ଓ ମୂର୍ତ୍ତି ବିସର୍ଜନକୁ ଶାନ୍ତିପୂର୍ଣ୍ଣ ଓ ସୁରକ୍ଷିତ କରିବା ପାଇଁ କେନ୍ଦ୍ରାଞ୍ଚଳ ପୋଲିସ ପକ୍ଷରୁ ବ୍ୟାପକ ପ୍ରସ୍ତୁତି କରାଯାଇଛି । କେନ୍ଦ୍ରାଞ୍ଚଳ ଆଇଜିପି ଡ. ସତ୍ୟଜିତ ନାୟକଙ୍କ ନିର୍ଦ୍ଦେଶକ୍ରମେ ୭ଟି ଜିଲ୍ଲାରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି ।

କେନ୍ଦ୍ରାଞ୍ଚଳ ଅଧୀନରେ ଥିବା କଟକ, ପୁରୀ, ଖୋର୍ଦ୍ଧା, କେନ୍ଦ୍ରାପଡ଼ା, ନୟାଗଡ଼, ଯାଜପୁର ଓ ଜଗତସିଂହପୁର ଏହି ୭ଟି ଜିଲ୍ଲାର ମୋଟ ୧ ହଜାର ୩ ଶହ ୮୯ଟି ପୂଜା ମଣ୍ଡପ ପାଇଁ ୫୬ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଛି । ଏଥର ଭସାଣି ଶୋଭାଯାତ୍ରାରେ ଡିଜେ ସଙ୍ଗୀତ ଉପରେ ସମ୍ପୂର୍ଣ୍ଣ ନିଷେଧାଦେଶ ଜାରି କରାଯାଇଛି । କେବଳ ଢୋଲ ଓ ପାରମ୍ପରିକ ବାଦ୍ୟ ବ୍ୟବହାର କରିବାକୁ ଅନୁମତି ଦିଆଯାଇଛି । ଯଦି କେହି ଏହି ନିୟମ ଭାଙ୍ଗେ ତେବେ ସେମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।

ସେହିପରି ସମ୍ବେଦନଶୀଳ ଅଞ୍ଚଳ, ଟ୍ରାଫିକ୍ ନିୟନ୍ତ୍ରଣ ଏବଂ ବିସର୍ଜନ ଘାଟଗୁଡ଼ିକରେ ସ୍ୱତନ୍ତ୍ର ପୋଲିସ ନଜର ରଖିବ । ଏହା ସହ ସୋସିଆଲ ମିଡିଆରେ ଗୁଜବ ଓ ଉତ୍ତେଜନାମୂଳକ ପୋଷ୍ଟ ଉପରେ କଡ଼ା ନଜର ରଖାଯାଉଛି । କୌଣସି ଗୁଜବ ସେୟାର ନକରିବାକୁ ଏବଂ ଜରୁରୀକାଳୀନ ପରିସ୍ଥିତିରେ ୧୧୨ ମାଧ୍ୟମରେ ଯୋଗାଯୋଗ କରିବାକୁ ଆଇଜିପି ନିବେଦନ କରିଛନ୍ତି । ଶାନ୍ତି ଓ ସାମ୍ପ୍ରଦାୟିକ ସଦ୍ଭାବ ବଜାୟ ରଖି ଭସାଣି ପାଳନ କରିବାକୁ ପୋଲିସ ପ୍ରଶାସନ ପକ୍ଷରୁ ସବୁ ନାଗରିକଙ୍କୁ ଆହ୍ୱାନ ଦିଆଯାଇଛି ।

ଭଷାଣି ଶୋଭାଯାତ୍ରା ପାଇଁ କଟକ ସହରରେ ବ୍ୟାପକ ବ୍ୟବସ୍ଥା କରାଯାଇଛି । ଦେବୀଗଡ଼ାରେ କଟକ ମହାନଗର ନିଗମ ପକ୍ଷରୁ ୩ଟି ଅସ୍ଥାୟୀ ପୋଖରୀ ନିର୍ମାଣ କରାଯାଇଛି । ସୁରକ୍ଷା ଦୃଷ୍ଟିରୁ ସହରରେ ୬୨ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯିବ । ହାୱଡ଼ା ମଟର ଛକରୁ ଗୌରୀ ଶଙ୍କର ପାର୍କ ପର୍ଯ୍ୟନ୍ତ କଡ଼ା ସୁରକ୍ଷା ବ୍ୟବସ୍ଥା ରହିବ । ପ୍ରତ୍ୟେକ ଚାନ୍ଦି ମେଢ଼ରେ ୪ ଜଣ ବନ୍ଧୁକଧାରୀ ପୋଲିସ ନିୟୋଜିତ ରହିବେ ।

ସେହିପରି ଭୁବନେଶ୍ୱରର କୁଆଖାଇ ଓ ଦୟା ନଦୀପଠାରେ ମଧ୍ୟ ଅସ୍ଥାୟୀ ପୋଖରୀ ନିର୍ମାଣ କରାଯାଇଛି । ଭସାଣି ସମୟରେ ଜନଗହଳି ଓ ଜରୁରୀକାଳୀନ ପରିସ୍ଥିତିକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥାକୁ ଆହୁରି କଡ଼ାକଡ଼ି କରିଛି ଓଡ଼ିଶା ଅଗ୍ନିଶମ ଓ ଜରୁରୀକାଳୀନ ସେବା ବିଭାଗ । ଭୁବନେଶ୍ୱରର ଲିଙ୍ଗିପୁର, ବାଙ୍କୁଆଳ, ପଳାଶୁଣୀ ଏବଂ ହଂସପାଳ ଭଳି ଗୁରୁତ୍ୱପୂର୍ଣ୍ଣ ସ୍ଥାନ ସହ କଟକର ଦେବୀଗଡ଼ଠାରେ ୨ଟି ସ୍ୱତନ୍ତ୍ର ଅଗ୍ନିଶମ ୟୁନିଟ୍ ମୁତୟନ କରାଯାଇଛି ।