School Student Safety / ଖେଳ ଛୁଟି ବେଳେ ଡାକୁଥିଲେ; ପଞ୍ଚମ ଶ୍ରେଣୀ ଛାତ୍ରୀଙ୍କ ଉପରେ ଶିକ୍ଷକଙ୍କ ଖରାପ ଦୃଷ୍ଟି

ବାଲେଶ୍ଵର: ଗୁରୁ ଶିଷ୍ୟ ସମ୍ପର୍କରେ ପୁଣି ଲାଗିଛି କଳଙ୍କ । ବାଲେଶ୍ଵର ଜିଲ୍ଲା ଚାନ୍ଦିପୁର ଥାନା ଅନ୍ତର୍ଗତ ରଣସାହି ପଞ୍ଚାୟତର ଜୟନଗର ସରକାରୀ ପ୍ରାଥମିକ ବିଦ୍ୟାଳୟରେ ଘଟିଛି ଅଭାବନୀୟ ଘଟଣା । ପଞ୍ଚମ ଶ୍ରେଣୀର ଜଣେ ନାବାଳିକା ଛାତ୍ରୀଙ୍କୁ ଅସଦାଚରଣ କରିବା ଅଭିଯୋଗରେ ଜଣେ ଶିକ୍ଷକଙ୍କୁ କାବୁ କରି ପୋଲିସ ଜିମା ଦେଇଛନ୍ତି ଗ୍ରାମବାସୀ । ଖେଳ ଛୁଟିରେ ଡାକି ବାରମ୍ବାର ଛାତ୍ରୀ ଜଣକୁ ଶିକ୍ଷକ ଅସଦାଚରଣ କରୁଥିବା ଅଭିଯୋଗ ହୋଇଆସୁଥିଲା । 

• ଖେଳ ଛୁଟି ବେଳେ ଡାକୁଥିଲେ

ଶିକ୍ଷାନୁଷ୍ଠାନ ପାଲଟିଛି ଅସୁରକ୍ଷିତ । ଦୀର୍ଘ ଦିନ ହେବ ଖେଳ ଛୁଟି ସମୟରେ ପଞ୍ଚମ ଶ୍ରେଣୀର ନାବାଳିକା ଛାତ୍ରୀଙ୍କୁ କ୍ଲାସରୁମକୁ ଡାକି ଅସଦାଚରଣ ଓ 'ବ୍ୟାଡ୍ ଟଚ୍' କରିଆସୁଥିଲେ । ଏ ସମ୍ପର୍କରେ ଛାତ୍ରୀ ଜଣକ ନିଜ ପରିବାର ଲୋକଙ୍କୁ ଜଣାଇବା ପରେ ଗ୍ରାମବାସୀ ଓ ଅଭିଭାବକମାନେ ବାରମ୍ବାର ଏହାକୁ ନେଇ ପ୍ରତିବାଦ କରିଥିଲେ । ମାତ୍ର ଅଭିଯୁକ୍ତ ଶିକ୍ଷକଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇନଥିଲା । ଅଭିଯୋଗ ଆସିବା ସତ୍ତ୍ଵେ ଶିକ୍ଷକ ଜଣକ ନିଜ ହରକତ ଛାଡ଼ିନଥିଲେ । 

• ଏମିତି ଧରାପଡ଼ିଲେ ଶିକ୍ଷକ

ଶେଷରେ ଆଜି ଖେଳ ଛୁଟି ସମୟରେ ଶିକ୍ଷକ ଜଣକ ପୁଣି ସମାନ କାଣ୍ଡ ଭିଆଉଥିବା ବେଳେ ଗ୍ରାମବାସୀ ଓ ଅଭିଭାବକମାନେ ତାଙ୍କୁ ରେଡ୍‌ହାଣ୍ଡେଡ୍‌ ଧରିଥିଲେ । ଉତ୍ତ୍ୟକ୍ତ ଲୋକମାନେ ଅଭିଯୁକ୍ତ ଶିକ୍ଷକଙ୍କୁ ନିରଧୁମ ଛେଚିବା ପରେ ଚାନ୍ଦିପୁର ଥାନା ପୋଲିସକୁ ଜିମା ଦେଇଛନ୍ତି । ପୀଡ଼ିତା ଛାତ୍ରୀଙ୍କ ଅଭିଭାବକଙ୍କ ଏତଲା ଭିତ୍ତିରେ ପୋଲିସ ଶିକ୍ଷକଙ୍କୁ ଥାନାରେ ଅଟକ ରଖି ତଦନ୍ତ ଆରମ୍ଭ କରିଛି । ନାବାଳିକା ଯୌନ ନିର୍ଯାତନା ମାମଲା ହୋଇଥିବାରୁ ଅଭିଯୁକ୍ତଙ୍କ ବିରୋଧରେ ପୋକ୍ସୋ (POCSO) ଆଇନ ଅଧୀନରେ କଠୋର କାର୍ଯ୍ୟାନୁଷ୍ଠାନ ନେବା ସହ ନିଲମ୍ବନ ପାଇଁ ଦାବି ଜୋର୍ ଧରିଛି । ଅଭିଯୁକ୍ତ ଶିକ୍ଷକଙ୍କ ବିରୁଦ୍ଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଅଭିଭାବକ ଓ ଗ୍ରାମବାସୀ ଦାବି କରିଛନ୍ତି । 

ପଢନ୍ତୁ ଏହି ଖବର: ଗୁରୁ ନାଁରେ କଳଙ୍କ; ଟ୍ୟୁସନ ବାହାନାରେ ହୋଟେଲରେ ରଖି ଛାତ୍ରଙ୍କୁ ଯୌନ ନିର୍ଯାତନା

• ଛାତ୍ର ବି ଅସଦାଚରଣ ଶିକାର ହୋଇଥିଲେ

କିଛି ଦିନ ପୂର୍ବରୁ ବରଗଡ ବରଡୋଲରୁ ଆସିଥିଲା ଏପରି ଅଭିଯୋଗ । ଦଶମ ଶ୍ରେଣୀର ଛାତ୍ରଙ୍କୁ ଟ୍ୟୁସନ୍ ପଢାଇବା ବାହାନାରେ ଯୌନ ନିର୍ଯାତନା ଦିଆଯାଇଥିବା ଅଭିଯୋଗ କରିଥିଲେ ପରିବାର ଲୋକେ । ଅଭିଯୁକ୍ତ ଶିକ୍ଷକ ଜଣକ ଛାତ୍ରଙ୍କୁ ହୋଟେଲକୁ ନେଇ ନିର୍ଯାତନା ଦେଇଥିଲେ । ବରଡୋଲରେ ଥିବା ଏକ ଘରୋଇ କଲେଜର ପ୍ରିନ୍ସିପାଲ୍ ଦେବଦତ୍ତ ପ୍ରଧାନ ଏଭଳି କାଣ୍ଡ ଭିଆଇଥିଲେ । ଏହାପରେ ଏବେ ପରିବାର ଲୋକେ ପୋଲିସ ନିକଟରେ ଅଭିଯୋଗ କରିଥିଲେ ।