ଆସିଲା ନୂଆ EV ନୀତି, ଇଲେକ୍ଟ୍ରିକ୍ କାର କିଣିଲେ ମିଳିବ ଦେଢ଼ ଲକ୍ଷ ଟଙ୍କା ପ୍ରୋତ୍ସାହନ
Key Points
ଓଡ଼ିଶା EV ପଲିସି ପାଇଁ ଚିଠା ପ୍ରସ୍ତାବ। ୨୦୩୬ ସୁଦ୍ଧା ୭୦% ଓ ୨୦୪୭ ସୁଦ୍ଧା ୮୦% ଇଭି ଭେଇକିଲ୍ ଗଡ଼ିବା ଲକ୍ଷ୍ୟ ରଖାଯାଇଛି ।
ଓଡ଼ିଶା EV ପଲିସି ପାଇଁ ଚିଠା ପ୍ରସ୍ତାବ । ଓଡ଼ିଶା ଇଲେକଟ୍ରିକ୍ ଭେଇକିଲ୍ ପଲିସି-୨୦୨୫ ପାଇଁ ଆସିଲା ଚିଠା ପ୍ରସ୍ତାବ । ରାଜ୍ୟ ବାଣିଜ୍ୟ ଓ ପରିବହନ ବିଭାଗ ପକ୍ଷରୁ ଆସିଛି ଚିଠା ପ୍ରସ୍ତାବ । ୨୦୨୧ EV ପଲିସି ଅନୁସାରେ ୪ ବର୍ଷରେ ୨୦% ଇଭି ଲକ୍ଷ୍ୟ ଧାର୍ଯ୍ୟ ରହିଥିଲା । କିନ୍ତୁ ସରକାରୀ ପ୍ରୋତ୍ସାହନ ସତ୍ତ୍ବେ ମାତ୍ର ୯% ଇଭି ଗାଡ଼ି ରାସ୍ତାରେ ଗଡ଼ିଛି ।
ତେବେ ଓଡ଼ିଶାକୁ ଦେଶର ମଡେଲ୍ ଷ୍ଟେଟ୍ କରିବା ପାଇଁ ପ୍ରସ୍ତୁତ ହୋଇଛି ଡ୍ରାଫ୍ଟ । ୨୦୩୬ ସୁଦ୍ଧା ୭୦% ଓ ୨୦୪୭ ସୁଦ୍ଧା ୮୦% ଇଭି ଭେଇକିଲ୍ ଗଡ଼ିବା ଲକ୍ଷ୍ୟ ରଖାଯାଇଛି । ବିଜ୍ଞପ୍ତି ପ୍ରକାଶଠାରୁ ୨୦୩୦ ଡିସେମ୍ବର ୩୧ ଯାଏଁ ପଲିସି ବଳବତ୍ତର ରହିବ । ଶିକ୍ଷାନୁଷ୍ଠାନଗୁଡ଼ିକୁ ମଧ୍ୟ ୧୨ ମାସ ଭିତରେ ଇଭି ଗାଡ଼ି ଆପଣାଇବାକୁ ପରାମର୍ଶ ଦିଆଯାଇଛି । ସ୍ବାସ୍ଥ୍ୟ ଓ ଗୃହ ବିଭାଗକୁ ମଧ୍ୟ ବର୍ଷକ ଭିତରେ ଇଭି ଗାଡ଼ି ପାଇଁ ପରାମର୍ଶ ସହ ୩୦ ଦିନ ଭିତରେ ମତାମତ ଦେବାକୁ ଆହ୍ବାନ କରିଛନ୍ତି ରାଜ୍ୟ ସରକାର ।
ସେହିଭଳି ଇଭି କିଣାରେ ମିଳୁଥିବା ସବସିଡି ପ୍ରଦାନରେ ସ୍ବଚ୍ଛତା ଆଣିବାକୁ ସରକାର କିଛି ସଂଶୋଧନ ଆଣିଛନ୍ତି । ଇଭି କିଣାରେ ହେଉଥିବା ଜାଲିଆତିକୁ ରୋକିବାକୁ ସରକାର ନୂଆ ବ୍ୟବସ୍ଥା ଲାଗୁ କରିବେ । ଏଣିକି ଓଡ଼ିଶାର ସ୍ଥାୟୀ ବାସିନ୍ଦା ହୋଇ ନଥିଲେ, ଇଭି ଗାଡ଼ି କିଣାରେ ସବସିଡି ମିଳିବନି । ଏମିତିକି ଇଭି ଗାଡ଼ିକୁ ୫ ବର୍ଷ ଯାଏ ଅନ୍ୟ କାହାରିକୁ ବିକି କରି ହେବନି । ସେହିପରି ବ୍ୟବସାୟିକ ଗାଡ଼ିର ମାଲିକାନା ମଧୟ ୫ ବର୍ଷ ଯାଏ ବଦଳାଇ ହେବନି ।
