ଅର୍ଗସ ବ୍ୟୁରୋ: ଅନୁଗୋଳରେ ମୋତିଆ ବିନ୍ଦୁ ଅପରେସନରେ ଚରମ ଅବହେଳାର ଫଳ ଭୋଗୁଛନ୍ତି ବୟସ୍କ ରୋଗୀ । କାହାକୁ ଠିକ୍‌ସେ ଦେଖାଯାଉନି ତ ଆଉ କାହା ଆଖିରେ ସମସ୍ୟା ଦେଖାଦେଇଛି । ସହରରେ ଥିବା ପ୍ରଧାନ ଆଇ କ୍ଲିନିକରେ ଆଖି ଅପରେଶନର ପରେ ରୋଗୀଙ୍କ ଆଖିକୁ ଆଉ ଦେଖା ଯାଇନଥିଲା I ଫଳରେ ଅନେକ ରୋଗୀ ଦୃଷ୍ଟି ଶକ୍ତି ଚାଲିଯିବା ଭୟରେ କଟକ ଓ ଭୁବନେଶ୍ବରରେ ଚିକିତ୍ସା କରାଇ ଆଂଶିକ ଦେଖିପାରିଥିଲେ I ଖବର ପ୍ରସାରଣ ପରେ ଜିଲ୍ଲାପାଳ ଏହାର୍ ତଦନ୍ତ କରିବାକୁ CDMOଙ୍କୁ ନିର୍ଦ୍ଦେଶ ଦେବାପରେ CDMO ଘରୋଇ କ୍ଲିନିକରେ ତଦନ୍ତ କରିବା ସହିତ କ୍ଲିନିକକୁ ସିଲ୍‌ କରିଥିଲେ I ଏଠି ପ୍ରଶ୍ନ ଉଠୁଛି, ସହର ମଝିରେ ଏତେ ସଂଖ୍ୟାରେ ଘରୋଇ କ୍ଲିନିକ୍ ଆଉ ଲାବୋରୋଟୋରୀ ଖୋଲିଛି ହେଲେ ଏଥିପ୍ରତି ସ୍ବାସ୍ଥ୍ୟ ବିଭାଗର ନଜର ଅଛି ତ । ଘରୋଇ ନର୍ସିଂ ହୋମ୍‌ରେ ଆଖି ଅପରେସନ କରିବାକୁ ଅନୁମତି ଦେଲା କିଏ । ସେପଟେ ଘଟଣାକୁ ଅନେକ ଦିନ ବିତିଯାଇଥିଲେ ବି ଜିଲ୍ଲା ସ୍ବାସ୍ଥ୍ୟ ପ୍ରଶାସନ ତଦନ୍ତ ରିପୋର୍ଟ ରାଜ୍ୟକୁ ପଠାଇ ଚୁପ୍ ବସିଛି I ଘଟଣାର ପୁନଃ ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି ରାଜ୍ୟ ସ୍ବାସ୍ଥ୍ୟ ବିଭାଗର ଯୁଗ୍ମ ସଚିବ I

ଗତ ଜୁନ୍ 20 ତାରିଖରେ ପ୍ରଧାନ ଆଇ କ୍ଲିନିକରେ 13 ଜଣ ରୋଗୀ ତାଙ୍କର ଆଖି ଅପରେସନ କରାଇଥିଲେ I ଆଇ କେୟାର ମାଲିକ ଡାକ୍ତର ଚନ୍ଦ୍ର ଶେଖର ପ୍ରଧାନ ଓ ଡାକ୍ତର ବିଶ୍ବଜିତ୍ ଦେଓ ଅପରେସନ କରାଇଥିଲେ । କିନ୍ତୁ ଅପରେସନର ଗୋଟିଏ ଦିନ ପରେ ରୋଗୀଙ୍କ ମୁଣ୍ଡ ବିନ୍ଧିବା ସହିତ ଆଖିରେ ଯନ୍ତ୍ରଣା ହୋଇଥିଲା । ପରେ ସେମାନଙ୍କୁ ବୁର୍ଲା ପଠାଇ ଦିଆଯାଇଥିଲା । ସେଠାରେ ବି ଉନ୍ନତ ଚିକିତ୍ସା ନ ମିଳିବାରୁ ଅନେକ ରୋଗୀ କଟକ ଆଉ ଭୁବନେଶ୍ବର ଯାଇ ଚିକିତ୍ସା କରାଇଛନ୍ତି I ଘଟଣାରେ ପ୍ରଧାନ ଆଇ କ୍ଲିନିକର ମାଲିକ ମୁହଁ ଖୋଲି ନଥିବା ବେଳେ ଅପରେଶନର କରିଥିବା ଡାକ୍ତର ବିଶ୍ବଜିତ ଦେ ଆମ କ୍ୟାମେରା ଦେଖି ଲୁଚିବା ସହିତ କିଛି କହିବେ ନାହିଁ ବୋଲି କହିଛନ୍ତି ।

ଡାକ୍ତରଙ୍କ ଚରମ ଅବହେଳାରୁ ଦୃଷ୍ଟିଶକ୍ତି ହରାଇଥିବା ରୋଗୀ ପାଇଁ କିଏ ଦାୟୀ ରହିବ । ସେପଟେ ସହରରେ ଥିବା ଅନେକ ଘରୋଇ କ୍ଲିନିକ୍ ବିନା ପଞ୍ଜୀକରଣରେ ଚାଲୁଥିବା ବେଳେ ଏ ଦିଗରେ ସ୍ବାସ୍ଥ୍ୟ ବିଭାଗ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more