ସାବାଡ ହେବେ ଅମାନିଆ ବାର୍‌ ମାଲିକ । ନିର୍ଦ୍ଦିଷ୍ଟ ସମୟରୁ ଅଧିକ ରାତି ଯାଏ ବାର୍‌ ଖୋଲିଲେ ହେବ ଆକ୍ସନ । ସତ୍ୟବିହାର ନୋ ଲିମିଟି ଏୟାରରେ ଅଗ୍ନିକାଣ୍ଡ ପରେ ଆକ୍ସନ ମୋଡରେ ଅବକାରୀ ବିଭାଗ । ରାଜଧାନୀର ୧୫୦ରୁ ଅଧିକ ବାର୍ ଓ ପବ୍‌ରେ ରେଡ୍‌ କରିଛି ବିଭାଗ । ଭୁବନେଶ୍ବରରେ ଥିବା ସମସ୍ତ ବାର୍ ଓ ରେଷ୍ଟୁରାଣ୍ଟ ଗୁଡ଼ିକୁ ଦିଆଯାଇଥିବା ଗାଇଡ୍‌ଲାଇନ୍ ସଠିକ୍ ଭାବେ ପାଳନ କରାଯାଉଛି ନା ନାହିଁ ତାହାର ତଦାରଖ କରାଯାଇଛି ।

ଅଧିକ ପଢ଼ନ୍ତୁ: ନବୀନଙ୍କୁ ଉପମୁଖ୍ୟମନ୍ତ୍ରୀଙ୍କ କଟାକ୍ଷ, ବିଧାନସଭାକୁ ଆସିଲେନି କାହିଁକି ?

ସେପଟେ ଶନିବାର ୭ଟି ଟିମ୍ ଦ୍ଵାରା ଚଢାଉ ସମୟରେ ଅବକାରୀ ଟିମ୍ ଉପରେ ଆକ୍ରମଣ ହୋଇଥିଲା । ଆଉ ଏହି ଘଟଣାରେ ଏବେ ଚନ୍ଦ୍ରଶେଖର ଥାନା ପୋଲିସ୍‌ ୩ ଜଣଙ୍କୁ ଅଟକ ରଖି ଖୋଳତାଡ଼ ଜାରି ରଖିଛି । ଅବକାରୀ ବିଭାଗର ଅଧିକାରୀ ରେଡ୍‌ ସାରି ରୋମୀୟ ଲେନରୁ ବାହାରୁ ଥିବା ବେଳେ କିଛି ନିଶାଶକ୍ତ ଯୁବକ ଅବକାରୀ ବିଭାଗ ଗାଡି ଓ ପୋଲିସକୁ ବିୟର ବୋତଲରେ ଆକ୍ରମଣ କରିଥିଲେ । ଏନେଇ ଅବକାରୀ ବିଭାଗ ପକ୍ଷରୁ ଥାନାରେ ମାମଲା ରୁଜୁ କରାଯାଇଛି । ଯେଉଁମାନେ ଅବକାରୀ ନିୟମକୁ ଅଣଦେଖା କରି ବିଳମ୍ବିତ ରାତି ଯାଏ ବାର ଖୋଲୁଥିଲେ ସେମାନଙ୍କୁ କଡ଼ା ଚେତାବନୀ ଦେଇଛି ଅବକାରୀ ବିଭାଗ ।

ସୂଚନା ଅନୁସାରେ, ୨ ଦିନ ତଳେ ସତ୍ୟବିହାର ଠାରେ ' ନୋ ଲିମିଟ ଏୟାର' ନାମକ ରେଷ୍ଟୁରାଣ୍ଟରେ ଘଟିଥିଲା ଭୟାବହ ଅଗ୍ନିକାଣ୍ଡ । ବିନା ଲାଇସେନ୍ସରେ ସେଠାରେ ମଦ ପିଇ ଯୁବପୀଢ଼ି ମାତାଲ ହେଉଥିବା ନେଇ ମିଳିଥିଲା ପ୍ରମାଣ । ଅବକାରୀ କମିଶନରଙ୍କ ନିର୍ଦ୍ଦେଶକ୍ରମେ ଏହି ଘଟଣାର ଚାଲିଛି ଉଚ୍ଚସ୍ତରୀୟ ତଦନ୍ତ । ସେପଟେ ଆଗକୁ ଆଗକୁ ବଡ଼ଦିନ, ଜିରୋ ନାଇଟ, ନୂଆବର୍ଷ ଥିବାରୁ ବାର ଓ ପବରେ ଭିଡ଼ ଜମିବା ଆରମ୍ଭ ହୋଇଛି । ବର୍ତ୍ତମାନ ସୁଦ୍ଧା ୧୨ଟା ରାତି ପର୍ଯ୍ୟନ୍ତ ଖୋଲିବା ନେଇ ଅନୁମତି ଥିବା ବେଳେ ଆବେଦନ ମୁତାବକ ଫେଷ୍ଟିବାଲ ସମୟରେ ଏହାକୁ ଦେଢ଼ ଘଣ୍ଟା ବୃଦ୍ଧି କରାଯିବାର ନିୟମ ରହିଛି । ଖିଲାପକାରୀଙ୍କୁ ଜଗିବା ପାଇଁ ଅବକାରୀ ବିଭାଗ ପକ୍ଷରୁ ୫ଟି ଟିମ୍‌ ସହରରେ ପାଇଁତରା ମାରୁଥିବା କହିଛନ୍ତି ଅବକାରୀ ସୁପରିଟେଣ୍ଡେଣ୍ଟ ।

କେବଳ ବାର କିମ୍ବା ପବ୍‌ ନୁହେଁ, ନୂଆବର୍ଷ ପୂର୍ବରୁ ବସ୍ତି, ଢ଼ାବା ମାନଙ୍କରେ ମଧ୍ୟ ନିଶା ସିଣ୍ଡିକେଟ ଚାଲୁଥିବା ନେଇ ଖବର ମିଳିଛି। ସେମାନେ ମଧ୍ୟ ଫ୍ଲାଇଁ ସ୍କ୍ବାର୍ଡ ସ୍କାନରରେ ରହିଛନ୍ତି ।