କକ୍ରୋଜ୍ ଜନତା ପାର୍ଟି ନାଁରେ ମାତିଛନ୍ତି ସାଇବର ଠକ । ଆପ୍ଲିକେସନ୍‌ ତିଆରି କରି ଲୋକଙ୍କୁ ପଠାଉଛନ୍ତି ଜଏନ ରିକ୍ୟୁଏଷ୍ଟ ଲିଙ୍କ୍ । ଆଉ କ୍ଲିକ୍‌ କରିବା କ୍ଷଣି ମୋବାଇଲ ହ୍ୟାକ୍‌ ଆଉ ତା ପରେ ଆକାଉଣ୍ଟ ହେଉଛି ଖାଲି । ୪ ଜଣିଆ ସାଇବର ଠକଙ୍କୁ ବାନ୍ଧିଲା ସାଇବର ଥାନା ପୋଲିସ ।

ଗୋଟିଏ କ୍ଲିକ୍‌ରେ ଖାଲି ହେଇଯାଉଛି ଆକାଉଣ୍ଟ । ଦୂରରେ ବସି ଆପଣଙ୍କ ଆକାଉଣ୍ଟରୁ ଟଙ୍କା ଗାଏବ କରି ଦେଉଛନ୍ତି ସାଇବର ଠକ । ଏମିତି ୪ ଜଣିଆ ସାଇବର ଠକଙ୍କୁ ଗିରଫ କରିଛି ସାଇବର ଥାନା ପୋଲିସ । ଗିରଫ ଅଭିଯୁକ୍ତମାନେ ହେଲେ ଆୟନ ନନ୍ଦୀ, ଆଲାଉଦିନ ଆନସାରି, ଅଭିଷେକ କୁମାର ଦାସ ଏବଂ ବୀରେନ୍ଦ୍ର କୁମାର ଦାସ । ଏମାନଙ୍କ ଘର ଝାଡ଼ଖଣ୍ଡ ଓ ପଶ୍ଚିମବଙ୍ଗରେ । ଏହି ଗ୍ୟାଙ୍ଗ ଓଡ଼ିଶା ସମେତ ବିଭିନ୍ନ ରାଜ୍ୟର ଲୋକମାନଙ୍କୁ କୋଟି କୋଟି ଟଙ୍କା ଠକେଇ କରିଥିବା ତଦନ୍ତରୁ ଜାଣିବାକୁ ପାଇଛି ପୋଲିସ ।

ଗିରଫ ସାଇବର ଠକମାନଙ୍କ ଶିକ୍ଷାଗତ ଯୋଗ୍ୟତା ପ୍ଲସ-୨ । ହେଲେ ଏମାନେ ବିଭିନ୍ନ ଆପ୍ଲିକେସନ ଏବଂ APK ଫାଇଲ ବନାଇବାରେ ଥିଲେ ମାହିର । RTO ଚାଲାଣ ନାଁରେ ଟେଲିଗ୍ରାମରେ ଲୋକଙ୍କୁ APK ଫାଇଲ ପଠାଉଥିଲେ । ୨୦୨୪ ମସିହାରେ ଜଣେ ଅବସରପ୍ରାପ୍ତ ସରକାରୀ ଅଧିକାରୀଙ୍କ ୫ ଲକ୍ଷରୁ ଅଧିକ ଟଙ୍କା ଠକେଇ ନେଇ ସାଇବର ଥାନାରେ ଦ୍ବାରସ୍ଥ ହୋଇଥିଲେ । ସାଇବର ଥାନା ପୋଲିସ ତଦନ୍ତ କରୁଥିବା ବେଳେ ୪ ଅଭିଯୁକ୍ତଙ୍କ ସମ୍ପୃକ୍ତି ସାମ୍ନାକୁ ଆସିଥିଲା । ଏମାନେ ଠକେଇ ଟଙ୍କାକୁ ଗିପ୍ଟ କାର୍ଡ ଜରିଆରେ କନଭର୍ଟ କରି ଟଙ୍କା ବିଭିନ୍ନ ଜାଗାରେ ବିନିଯୋଗ କରୁଥିଲେ ।

ଏହି ଗ୍ୟାଙ୍ଗରେ ଆଉ କେତେ ଜଣ ସଦସ୍ୟ ଅଛନ୍ତି ? କେତେ ଲୋକଙ୍କୁ ଚୁନା ଲଗାଇଛି ଏହି ଗ୍ୟାଙ୍ଗ ? ଏ ତଥ୍ୟ ଜାଣିବା ପାଇଁ ଗିରଫ ଠକମାନଙ୍କୁ ରିମାଣ୍ଡରେ ଆଣି ଖୋଳତାଡ଼ କରିପାରେ ସାଇବର ଥାନା ପୋଲିସ ।