ଯାଜପୁର: ମୃତବ୍ୟକ୍ତିଙ୍କ ନାମରେ ଉଠା ଯାଇଛି କୃଷି ଋଣ । ମୃତ୍ୟୁର 108 ଦିନ ପରେ ସମ୍ପୃକ୍ତ ମୃତକଙ୍କ ନାମରେ ଉଠାଯାଇଛି କୃଷି ଋଣ । ଯାହାକୁ ବିରୋଧ କରି ପ୍ରାଥମିକ କୃଷି ସମବାୟ ସମିତି ସମ୍ମୁଖରେ ଧାରଣାରେ ବସିଛନ୍ତି ବୋର୍ଡ ସଦସ୍ୟ ଓ ସ୍ଥାନୀୟ ଚାଷୀ । ଏଭଳି ଘଟଣା ଦେଖିବାକୁ ମିଳିଛି ଯାଜପୁର ଜିଲ୍ଲା ଦଶରଥପୁର ବ୍ଲକ ଅନ୍ତର୍ଗତ ପାଲଟପୁର ପ୍ରାଥମିକ କୃଷି ସମବାୟ ସମିତିରେ ।  

ଅଭିଯୋଗ ମୁତାବକ ବଡକୁଆଁଲ ଗ୍ରାମର ପଞ୍ଚାନନ ମଲ୍ଲିକ ନାମକ ଜଣେ ଚାଷୀଙ୍କର 12 ଜୁନ 2023 ମସିହାରେ ମୃତ୍ୟୁ ଘଟିଥିଲା ।  27 ସେପ୍ଟେମ୍ବର 2023 ମସିହାରେ ତାଙ୍କ ନାମରେ କଟକ କେନ୍ଦ୍ରୀୟ ସମବାୟ ବ୍ୟାଙ୍କରୁ ତାଙ୍କର ଜାଲ ଦସ୍ତଖତ କରି ଚେକ ମଧ୍ୟ୍ୟମରେ 11500 ଟଙ୍କା ଋଣ ଉଠା ଯାଇଥିଲା । ଯାହା ବିଷୟରେ ପଞ୍ଚାନନ ମଲ୍ଲିକଙ୍କ ପରିବାର ପାଖରେ ଏହାର କୌଣସି ଖବର ନାହିଁ । କେବଳ ପଞ୍ଚାନନ ମଲ୍ଲିକ ନୁହଁନ୍ତି ଏମିତି ଅନେକ ଚାଷୀଙ୍କ ନାମରେ ଋଣ ଉଠାଇଛନ୍ତି ସମବାୟ ସମିତିର ସଭାପତି ଓ ସମ୍ପାଦକ । 

ଏହା ଛଡା ଚାଷୀମାନଙ୍କ ଠାରୁ ଋଣ କରାଇ ଦେବାପାଇଁ ନେଉଛନ୍ତି ମୋଟା ଅଙ୍କର ଅର୍ଥ । ତେଣୁ ଏହାର ସଠିକ ତଦନ୍ତ କରାଯାଇ ଦୁର୍ନୀତି କରିଥିବା ଅଧିକାରୀଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୋର୍ଡ ସଦସ୍ୟ ଓ ସ୍ଥାନୀୟ ଚାଷୀମାନେ ଦାବି କରିଛନ୍ତି ।

ଆହୁରି ପଢନ୍ତୁ ଓଡିଶା ଖବର...