ଅର୍ଗସ ବ୍ୟୁରୋ: ନୟାଗଡ ଜିଲ୍ଲା ରଣପୁର ବ୍ଲକରେ ଶାଗମାଛ ଦରରେ ବିକ୍ରି ହେଉଛି ଗେଣ୍ଡୁଫୁଲ । ଲାଭ ମିଳିବା ତ ଦୂରର କଥା ଗେଣ୍ଡୁଫୁଲ ଚାଷରୁ ଚାଷୀଙ୍କୁ ମୂଳଧନ ମିଳୁ ନ ଥିବା ଅଭିଯୋଗ ହୋଇଛି । ଶୀତଳ ଭଣ୍ଡାର ନଥିବାରୁ ଅମଳ ଫୁଲକୁ ସଂରକ୍ଷଣ କରିବାରେ ଅସୁବିଧାର ସମ୍ମୁଖୀନ ହେଉଛନ୍ତି ଚାଷୀ । ସେପଟେ ରଣପୁର ଉଦ୍ୟାନ ବିଭାଗର ଉଦାସୀନତା ଚାଷୀଙ୍କ ସମସ୍ୟାକୁ ବଢାଇଦେଉଛି ।

କ୍ଷେତରେ ଏକର ଏକର ଗେଣ୍ଡୁ ଫୁଲର ସମ୍ଭାର । ଯିଏ ସେହି ବାଟ ଦେଇ ଯାଉଛି ଫୁଲ ବଗିଚାର ସୌନ୍ଦର୍ଯ୍ୟ ଉପଭୋଗ କରିବା ସହ ଫୁଲ କିଣିବାକୁ ଅଟକି ଯାଉଛି । ନୟାଗଡ ଜିଲ୍ଲା ରଣପୁର ବ୍ଲକ ବଜ୍ରକୋଟ ଗାଁର ୨୦ଟି ପରିବାର ଗେଣ୍ଡୁଫୁଲ ଚାଷ ଉପରେ ନିର୍ଭର କରି ପରିବାର ପ୍ରତିପୋଷଣ କରିଥାନ୍ତି । କିନ୍ତୁ ଓଡିଶାରେ ଚାରା ମିଳୁ ନ ଥିବାରୁ ସେମାନେ କଲିକତାରୁ ଚାରା ଆଣି ରଣପୁରରେ ଚାଷ କରିବାକୁ ବାଧ୍ୟ ହେଉଛନ୍ତି । ଦିନେ କି ଦୁଇ ଦିନ ନୁହେଁ ଦୀର୍ଘ ୨୦ ବର୍ଷ ହେବ ଚାରା ପାଇଁ ଅସୁବିଧାର ସମ୍ମୁଖୀନ ହେଉଛନ୍ତି ଗେଣ୍ଡୁଫୁଲ ଚାଷୀ । କେବଳ ଚାରା ସମସ୍ୟା ନୁହେଁ ସରକାରୀ ପ୍ରୋତ୍ସାହନ ଅଭାବରୁ ଗେଣ୍ଡୁଫୁଲ ଚାଷ ପ୍ରତି ମୁହଁ ଫେରାଉଛନ୍ତି ଚାଷୀ। 

ଅମଳ ହେଉଥିବା ଏକର ଏକର ଫସଲକୁ ଦୀର୍ଘ ଦିନ ଧରି ସୁରକ୍ଷା ଦେବା ଚାଷୀଙ୍କ ପାଇଁ ଚ୍ୟାଲେଞ୍ଜ ପାଲଟିଛି । ଶୀତଳ ଭଣ୍ଡାର ନ ଥିବାରୁ ବର୍ଷା ଓ କୁହୁଡି ଦାଉରୁ ଫୁଲକୁ ସୁରକ୍ଷା ଦେବା ଅସମ୍ଭବ ହୋଇ ପଡିଛି । ଧାର କରଜ କରି ଗେଣ୍ଡୁଫୁଲ ଚାଷ କରିଥିବା ଚାଷୀକୁ ବିଭିନ୍ନ ସମୟରେ କ୍ଷତି ସହିବାକୁ ପଡୁଛି। ଫୁଲ ଚାଷରୁ ଲାଭ ମିଳିବା ତ ଦୂରର କଥା ଅନେକ ସମୟରେ ଚାଷରେ ଖଟାଯାଇଥିବା ମୂଳଧନ ମିଳୁନଥିବା ଅଭିଯୋଗ ହୋଇଛି ।

ସେପଟେ ରଣପୁର ଉଦ୍ୟାନ ବିଭାଗ ଚାଷୀଙ୍କ ସମସ୍ୟା ପ୍ରତି ଆଖିବୁଜି ଦେଇଥିବା ଅଭିଯୋଗ ହୋଇଛି । କୃଷି ଅଧିକାରୀ ନା କାର୍ଯ୍ୟାଳୟକୁ ଆସୁଛନ୍ତି ନା ଚାଷୀଙ୍କ ଦୁର୍ଦ୍ଦଶାରେ ଛିଡା ହେଉଛନ୍ତି ।

ଅଧିକ ପଢ଼ନ୍ତୁ ଓଡ଼ିଶା ଖବର