ଅର୍ଗସ ବ୍ୟୁରୋ: ଧାନ କିଣା ପାଇଁ ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ହୋଇଛି ବଡ଼ ନିଷ୍ପତି । ଏବେ ଥରେ ହିଁ ଧାନର ମାନ ଯାଞ୍ଚ କରାଯିବ । କଟନୀ ଛଟନୀ ବନ୍ଦ କରିବା ପାଇଁ ରାଜ୍ୟ ସରକାରଙ୍କ ବଡ଼ ପଦକ୍ଷେପ । ଧାନ ମାନ ନିର୍ଦ୍ଧାରଣ ଏବଂ ଧାନରୁ ଅଗାଡି ଅଲଗା କରିବା ପାଇଁ ଅନଲାଇଜର ମେସିନ ମଣ୍ଡିରେ ଲଗାଯାଇଛି । ଆଗରୁ ଦୁଇଥର ହେଉଥିଲା ଧାନର କ୍ବାଲିଟି ଟେଷ୍ଟ । ଯାହାଦ୍ବାରା କଟନୀ ଛଟନୀର ଶିକାର ହେଉଥିଲେ ଚାଷୀ । ସେହିପରି ଧାନ ବିକ୍ରି ବେଳେ ସିଲ ହେବ ପଡୋଶୀ ରାଜ୍ୟ ସୀମା । ବାହାର ରାଜ୍ୟର ଚାଷୀ ଓଡ଼ିଶାରେ ବିକି ପାରିବେନି ଧାନ । ଛତିଶଗଡ଼, ଝାରଖଣ୍ଡ ଏବଂ ପଶ୍ଚିମବଙ୍ଗ ରାଜ୍ୟର ସୀମାରେ ଚେକିଂ କଡାକଡି ହେବ । ବଡ କଥା ହେଲା ଜିଲ୍ଲାପାଳ ବଢାଇ ପାରିବେ ଚାଷୀଙ୍କ ଟୋକନ ସୀମା । ସେଥିପାଇଁ ଜିଲ୍ଲାପାଳଙ୍କୁ ଅଧିକୃତ କ୍ଷମତା ଦିଆଯିବ । 

ସେହିପରି ବର୍ଷାରେ ଚାଷୀଙ୍କ ଧାନ ଓଦା ନହେବା ପାଇଁ ମଣ୍ଡି ଗୁଡିକରେ ନିର୍ମାଣ ହେବ ଗୋଦାମ ଗୃହ । ଚାଷୀଙ୍କ ପାଇଁ ବି ସମସ୍ତ ପ୍ରକାର ସୁବିଧା ସୁଯୋଗ କରାଯିବ । ସବୁ ମଣ୍ଡି ଗୁଡିକର ଆଧୁନିକିରଣ ପାଇଁ 550 କୋଟି ଖର୍ଚ୍ଚ କରିବେ ସରକାର । ଧାନ କିଣା ପାଇଁ ପ୍ରତି ଦୁଇରୁ ତିନୋଟି ଜିଲ୍ଲା ଦାୟିତ୍ବରେ ରହିବେ ଜଣେ ଲେଖାଏଁ ମନ୍ତ୍ରୀ । ପ୍ରତି ମଣ୍ଡିରେ ରହିବେ ଜଣେ ଲେଖାଏଁ ପ୍ରାଧିକୃତ ଅଧିକାରୀ । ତାଙ୍କ କାମ ରହିବ ଧାନ ବିକ୍ରି ଠିକ ହେଉଛି କି ନାହିଁ ଦେଖିବେ । କିଛି ଧାନ ମଣ୍ଡିକୁ ନେଇ ଗୋଟିଏ ଗୋଟିଏ ଜୋନ ତିଆରି ହେବ । ପ୍ରତି ଜୋନରେ ଜଣେ ଲେଖାଏଁ ସୁପରଭାଇଜର ରହିବେ । ଯୋଗାଣ, ସମବାୟ, ପୋଲିସ ପ୍ରଶାସନ ଓ ଜିଲ୍ଳା ପ୍ରଶାସନର ଅଧିକାରୀ ମାନେ ଦାୟିତ୍ବରେ ରହିବେ । ଆବଶ୍ୟକ ପଡିଲେ ପଞ୍ଚାୟତିରାଜ ବିଭାଗର ଅଧିକାରୀ ମାନଙ୍କୁ ମଧ୍ୟ ନିୟୋଜିତ କରାଯିବ । 

ଗତ ବର୍ଷ 58 ଲକ୍ଷ କ୍ବିଣ୍ଟାଲ ଧାନ କିଣା ହୋଇଥିଲା କିନ୍ତୁ ସେତେବେଳେ ଓଡିଶା ଚାଷୀ ବାହାରେ ଧାନ ବିକୁଥିଲେ । କିନ୍ତୁ ଏଠି ଅଧିକ ଦର ଯୋଗୁଁ ଚାଷୀ ଉତ୍ସାହର ସହ ଧାନ ବିକିବେ । ଚଳିତ ଥର 80 ଲକ୍ଷ କ୍ବିଣ୍ଟାଲ ଧାନ କିଣିବାକୁ ରାଜ୍ୟ ସରକାର ପ୍ରସ୍ତୁତ ହେଉଛନ୍ତି ।

ଇନପୁଟ ସବସିଡ ଆକାରରେ ଧାନର ସର୍ବନିମ୍ନ ସହାୟକ ମୂଲ୍ୟ ଉପରେ 800 ଟଙ୍କା ଅଧିକ ଦିଆଯିବ । ଅର୍ଥାତ କ୍ବିଣ୍ଟାଲ ପିଛା 3100 ଟଙ୍କାରେ ଧାନ କିଣିବେ ବିଜେପି ସରକାର । ଧାନ ଓଜନ ପାଇଁ ଆଧୁନିକ ମେସିନ ବ୍ୟବସ୍ଥା କରାଯାଇଛି । ଆଜି ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ବସିଥିବା ଧାନ କ୍ରୟ କମିଟି ବୈଠକରେ ଏନେଇ ନିଷ୍ପତ୍ତି ହୋଇଛି । ବୈଠକରେ ଦୁଇ ଉପମୁଖ୍ୟମନ୍ତ୍ରୀ, ସମବାୟ ମନ୍ତ୍ରୀ, ଯୋଗାଣ ମନ୍ତ୍ରୀ, ରାଜସ୍ବ ମନ୍ତ୍ରୀଙ୍କ ସମେତ ମୁଖ୍ୟ ଶାସନ ସଚିବ ଏବଂ ବିଭାଗୀୟ ସଚିବ ମାନେ ଉପସ୍ଥିତ ଥିଲେ । ଏହାସହ ସବୁ ଜିଲ୍ଲାର ଜିଲ୍ଲାପାଳ ମାନଙ୍କ ସହ ଅନ୍ୟ ଅଧିକାରୀ ମାନେ ମଧ୍ୟ ଭିସି ଜରିଆରେ ସାମିଲ ହୋଇଥିଲେ। 

ଅଧିକ ପଢ଼ନ୍ତୁ ଓଡ଼ିଶା ଖବର