Nrusingha Sahu Son Arrested / ପୂର୍ବତନ ବିଜେଡି ମନ୍ତ୍ରୀଙ୍କ ପୁଅ ଗିରଫ, ଠକେଇ ଅଭିଯୋଗରେ ନୟାପଲ୍ଲୀ ଘରୁ ବାନ୍ଧିଲା ପୋଲିସ

ବନ୍ଧାହେଲେ ପୂର୍ବତନ ମନ୍ତ୍ରୀଙ୍କ ପୁଅ । ପୂର୍ବତନ ବିଜେଡି ମନ୍ତ୍ରୀ ନୃସିଂହ ସାହୁଙ୍କ ପୁଅ ଅଜିତ ସାହୁଙ୍କୁ ପୋଲିସ ଗିରଫ କରିଛି । ଭୁବନେଶ୍ୱର ନୟାପଲ୍ଲୀସ୍ଥିତ ତାଙ୍କ ଘରୁ ପୋଲିସ ଅଜିତଙ୍କୁ ଗିରଫ କରିଥିବା ଜଣାପଡ଼ିଛି ।

ତ୍ରିଶୁଳିଆ ନିକଟରେ ଜମି ଦେବାକୁ କହି ଠକେଇ କରିଥିବା ନେଇ ଅଜିତଙ୍କ ବିରୋଧରେ ଅଭିଯୋଗ ରହିଛି । ଅଭିଯୋଗ ଅନୁସାରେ, ସାଂସଦ ସୁଜିତ କୁମାରଙ୍କ ସମେତ ମୋଟ ୩ ଜଣଙ୍କୁ ଜମି ଦେବାର ପ୍ରତିଶ୍ରୁତି ଦେଇ ଠକେଇ କରାଯାଇଥିବା ଅଭିଯୋଗ ହୋଇଛି ।

ଏହି ଘଟଣାକୁ ନେଇ ଅଜିତଙ୍କ ବିରୋଧରେ ଦିଲ୍ଲୀର ପଟିଆଲା ହାଉସ୍ କୋର୍ଟରେ ମାମଲା ହୋଇଥିଲା। ଏହା ସହ ଭୁବନେଶ୍ୱର ଇନ୍‌ଫୋସିଟି ଥାନାରେ ମଧ୍ୟ ତାଙ୍କ ବିରୋଧରେ ଅଭିଯୋଗ ରହିଥିଲା ।

ସୂଚନା ଅନୁସାରେ, ୨୦୨୪ ମସିହାରେ ସାଂସଦ ସୁଜିତ କୁମାର ଦିଲ୍ଲୀର ତୁଗଲକ୍ ରୋଡ୍ ଥାନାରେ ଏନେଇ ଅଭିଯୋଗ କରିଥିଲେ । ଅଭିଯୋଗ ପରେ ପୋଲିସ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ।

ମାମଲାରେ ଅଜିତଙ୍କୁ ପଟିଆଲା ହାଉସ୍ କୋର୍ଟ ପଳାତକ ଘୋଷଣା କରିଥିବା ମଧ୍ୟ ସୂଚନା ମିଳିଛି । ଦୀର୍ଘଦିନ ଧରି ପୋଲିସ ତାଙ୍କୁ ଖୋଜୁଥିବା ବେଳେ ଶେଷରେ ଭୁବନେଶ୍ୱର ନୟାପଲ୍ଲୀସ୍ଥିତ ଘରୁ ଗିରଫ କରାଯାଇଛି । ଏବେ ଏହି ଠକେଇ ମାମଲାରେ ଅଜିତଙ୍କୁ ପୋଲିସ ପଚରାଉଚରା କରିବା ସହ ଘଟଣାର ଅନ୍ୟାନ୍ୟ ଦିଗ ନେଇ ତଦନ୍ତ ଜାରି ରଖିଛି ।