ପୁରୀ: ଭାରତର ସବୁ ବଡ଼ ମନ୍ଦିରରେ ଦର୍ଶନ ପରେ ଭକ୍ତଙ୍କ ପାଇଁ ରହିଛି ମାଗଣା ପ୍ରସାଦର ବ୍ୟବସ୍ଥା । ଏବେ ପୁରୀ ଶ୍ରୀମନ୍ଦିରରେ ଏହା ବ୍ୟବସ୍ଥା ଲାଗୁ ହେବ । ଭକ୍ତର ଭାବାବେଗକୁ ଦୃଷ୍ଟିରେ ରଖି ସରକାର ନେଇଛନ୍ତି ବଡ଼ ନିଷ୍ପତ୍ତି । ନିଶୁଳ୍କ ମହାପ୍ରସାଦ ବିତରଣ ପାଇଁ ଅଣ୍ଟା ଭିଡ଼ିଛନ୍ତି । ଏହାକୁ କିଭଳି ଦୀର୍ଘ ସ୍ଥାୟୀ କରାଯିବ ସେନେଇ ମଧ୍ୟ ରୂପରେଖ ପ୍ରସ୍ତୁତ କରାଯାଉଛି । ମହାପ୍ରସାଦ ଟିକିଏ ପାଇଲେ ଭକ୍ତର ମାନସିକ ଶାନ୍ତି ସହ ଆନ୍ତରିକ ଉଦବେଳନକୁ ପୂର୍ଣ୍ଣ କରିବା ପାଇଁ ପ୍ରୟାସ ଜାରି ରହିଛି ବୋଲି କହିଛନ୍ତି ଆଇନ ମନ୍ତ୍ରୀ । ଏହାସହିତ ଏ ବ୍ୟବସ୍ଥା ଅଧାରୁ ବନ୍ଦ ନହୋଇ ଆଗକୁ କିପରି ବଳବତ୍ତର ରହିବ ସେନେଇ ଆନୁସଙ୍ଗିକ ବ୍ୟବସ୍ଥା କରାଯାଉଛି ବୋଲି ସେ କହିଛନ୍ତି ।

୨୦୧୭ରେ ଏହି ବ୍ୟବସ୍ଥା ଲାଗୁ କରାଯାଇଥିଲା । ଏଥିପ୍ରତି ଜନ ସମର୍ଥନ ବଢିବାରୁ ବୃହତ୍ ଆକାରରେ କରିବା ପାଇଁ ନିଷ୍ପତ୍ତି ନେଇ ଶେଷଥର ପାଇଁ ୨୦୧୮-୧୯ ରେ ଦେଢ଼ କୋଟି ଟଙ୍କାର ବ୍ୟୟ ବରାଦ କରାଯାଇଥିଲା । ପ୍ରାୟ ପ୍ରତ୍ୟକ ଦିନ ଚାରି ହାଣ୍ଡି କାନିକା ନିଶୁଳ୍କ ବଣ୍ଟା ଯାଉଥିବା ବେଳେ ଅଳ୍ପ କେଇଦିନ ପରେ ଏହାକୁ ଆଗକୁ ନେଇପାରିନଥିଲେ ତତ୍କାଳୀନ ବିଜେଡି ସରକାର । ପୁଣିଥରେ ଏଇ ବ୍ୟବସ୍ଥା ପ୍ରଚଳନ ହେଲେ ସମସ୍ତେ ଉପକୃତ ହେବେ ବୋଲି ବିଭିନ୍ନ ମହଲରେ ମତ ପ୍ରକାଶ ପାଇଛି ।

ଏହି ଯୋଜନାକୁ ଲାଗୁ କରିବାକୁ ହେଲେ ଦୀର୍ଘ କାଳୀନ ବ୍ୟବସ୍ଥା ସହ ମହାପ୍ରସାଦ ବଣ୍ଟନ ସ୍ଥାନରେ ଭକ୍ତଙ୍କ ଭିଡ଼ର ଶୃଙ୍ଖଳା ଏବଂ ଅନ୍ୟାନ୍ୟ ଦିଗ ପ୍ରତି ଧ୍ୟାନ ଦେବାକୁ ପଡ଼ିବ ।

ଆହୁରି ପଢନ୍ତୁ ଓଡିଶା ଖବର...

Argus News | argus news | Odisha Latest News, Breaking News, Trending News, Live TV