ଭୁବନେଶ୍ଵର: ଆଜି ପବିତ୍ର ଗଣେଶ ଚତୁର୍ଥୀ । ଅଗ୍ରପୂଜ୍ୟଙ୍କ ଆରାଧନା ଲାଗି ଚଳଚଞ୍ଚଳ ପଲ୍ଲିରୁ ଦିଲ୍ଲୀ । ଶ୍ରୀଗଣେଶଙ୍କ ଆବାହନ ଲାଗି ସବୁଠି ଅତ୍ୟନ୍ତ ଉତ୍ସାହ ଓ ଭକ୍ତିମୟ ପରିବେଶ । ସକାଳୁ ସକାଳୁ ବିଭିନ୍ନ ପୂଜା ମଣ୍ଡପ, ଶିକ୍ଷାନୁଷ୍ଠାନ ଏବଂ ଘରେ ଘରେ ସାଜସଜ୍ଜା ଆରମ୍ଭ ହୋଇଗଲାଣି । ବିଦ୍ୟାଳୟଗୁଡ଼ିକରେ ଜମିବାରେ ଲାଗିଛି ଛାତ୍ରଛାତ୍ରୀଙ୍କ ଭିଡ଼ । ଛକ ଛକରେ ସୁଉଚ୍ଚ ପେଣ୍ଡାଲ ସାଙ୍ଗକୁ ଆକର୍ଷଣୀୟ ଆଲୋକମାଳା ଓ ସୁସଜ୍ଜିତ ତୋରଣରେ ଶୋଭା ପାଉଛନ୍ତି ଗଜାନନ । ଚଳିତ ବର୍ଷ ରାଜଧାନୀ ଭୁବନେଶ୍ବରରେ ବିଭିନ୍ନ ଥିମରେ ପେଣ୍ଡାଲ ସଜ୍ଜା ହୋଇଥିବା ଦେଖିବାକୁ ମିଳିଛି । ଶାନ୍ତିଶୃଙ୍ଖଳା ରକ୍ଷା ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
- ମତ୍ସ୍ୟ ଉପରେ ବିରାଜମାନ ଶ୍ରୀଗଣେଶ
ଚଳିତ ବର୍ଷ ଭୁବନେଶ୍ଵରରେ ଗଣେଶ ପୂଜାକୁ ନେଇ ସ୍ବତନ୍ତ୍ର ପ୍ରସ୍ତୁତି ଦେଖିବାକୁ ମିଳିଛି । ବିଜେବି ନଗର କ୍ୟାରମ୍ ଫିଲ୍ଡ ୟୁର୍ଥ କ୍ଲବ ପକ୍ଷରୁ ବେଶ୍ ଜାକଜମକରେ ଗଜାନନଙ୍କ ପୂଜା ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ମତ୍ସ୍ୟ ଉପରେ ବିରାଜମାନ ହୋଇଛନ୍ତି ଶ୍ରୀଗଣେଶ । ଗଜାନନଙ୍କର ୫୩ ଫୁଟ ଉଚ୍ଚତା ବିଶିଷ୍ଟ ବିରାଟ ମୂର୍ତ୍ତି କଲିକତାର କାରିଗରଙ୍କ ଦ୍ବାରା ନିର୍ମିତ ହୋଇଛି । ପ୍ରାୟ ୩୦ ଜଣ କାରିଗର ଦେଢ଼ମାସ ଧରି ୬୫ ଫୁଟ ଉଚ୍ଚତା ବିଶିଷ୍ଟ ଏକ ନିଆରା ଆକର୍ଷଣୀୟ ତୋରଣ ତିଆରି କରିଛନ୍ତି । ଗଣେଶ ପୂଜା ପାଇଁ ପ୍ରାୟ ୪୭ ଲକ୍ଷ ଟଙ୍କା ବଜେଟ ଖର୍ଚ୍ଚ ହୋଇଛି ବୋଲି କ୍ୟାରମ୍ ଫିଲ୍ଡ ୟୁର୍ଥ କ୍ଲବ ପକ୍ଷରୁ କୁହାଯାଇଛି ।
- ହାତରେ ମୂର୍ତ୍ତି ଧରି ସ୍କୁଲରେ ପହଞ୍ଚିଲେ ଛାତ୍ରଛାତ୍ରୀ
ୟୁନିଟ୍-୮ ସ୍ଥିତ ସରସ୍ୱତୀ ଶିଶୁ ବିଦ୍ୟା ମନ୍ଦିରରେ ନିଆରା ଢଙ୍ଗରେ ପାଳିତ ହୋଇଛି ଗଣେଶ ପୂଜା । ଶତାଧିକ ଛାତ୍ରଛାତ୍ରୀ ହାତରେ ଗଣେଶଙ୍କ ମୂର୍ତ୍ତି ଓ ପୂଜା ସାମଗ୍ରୀ ଧରି ବିଦ୍ୟାଳୟରେ ପହଞ୍ଚିଛନ୍ତି । ଘରୁ ଆସିବା ସମୟରେ ପିଲାମାନେ ନିଜ ନିଜ ଗଣେଶ ମୂର୍ତ୍ତି ସହ ପୂଜା ପାଇଁ ଆବଶ୍ୟକ ସମସ୍ତ ସାମଗ୍ରୀ ନେଇ ଆସିଥିଲେ । ବିଦ୍ୟାଳୟ ପରିସରରେ ସମସ୍ତେ ଧାଡ଼ିରେ ବସି ଏକାଠି ମନ୍ତ୍ରପାଠ କରିବା ସହ ଗଣେଶଙ୍କ ପୂଜାର୍ଚ୍ଚନା କରିଥିଲେ । ଛାତ୍ରଛାତ୍ରୀଙ୍କ ମନରେ ପୂଜାପାଠ ଓ ଆଧ୍ୟାତ୍ମିକତା ପ୍ରତି ଆଗ୍ରହ ବଢ଼ାଇବା ସହ ପାରମ୍ପରିକ ପରମ୍ପରା ସହ ସେମାନଙ୍କୁ ଯୋଡ଼ିବା ଉଦ୍ଦେଶ୍ୟରେ ବିଦ୍ୟାଳୟ ପକ୍ଷରୁ ଏଭଳି ନିଆରା ପ୍ରୟାସ କରାଯାଇଥିବା କୁହାଯାଇଛି ।
- କାନ୍ତାରା ମନ୍ଦିର ଶୈଳୀରେ ତୋରଣ
ଭୁବନେଶ୍ୱର ସହୀଦ କ୍ଳବ୍ ପକ୍ଷରୁ କର୍ଣ୍ଣାଟକର କାନ୍ତାରା ମନ୍ଦିର ଶୈଳୀରେ ନିର୍ମିତ ହୋଇଛି ଆକର୍ଷଣୀୟ ତୋରଣ । ୧୩ ଫୁଟ ଉଚ୍ଚତା ବିଶିଷ୍ଟ ଗଣେଶଙ୍କୁ ପୂଜା କରାଯିବ । ପ୍ରାୟ ୨୮ ଦିନ ଧରି କଲିକତାରୁ ଆସିଥିବା ୩୫ ଜଣ କାରିଗର ଏହି ତୋରଣ ଓ ମୂର୍ତ୍ତି ତିଆରିରେ ଲାଗିଛନ୍ତି । ହୁଗୁଳାପତ୍ର, ତାଳପତ୍ର, ଆଖୁ, ବାଉଁଶ ଆଦି ବ୍ୟବହାର କରି ଏହି ତୋରଣ ତିଆରି କରାଯାଇଛି । ଏହା ପରିବେଶ ପାଇଁ ବେଶ ଉପଯୋଗୀ ରହିଛି । ପ୍ରାୟ ତୋରଣ ତିଆରି ପାଇଁ ୭ ଲକ୍ଷ ଟଙ୍କା ବ୍ୟୟ କରାଯାଇଛି ।
ପଢନ୍ତୁ ଏହି ଖବର: ଗଣେଶ ଚତୁର୍ଥୀରେ କେମିତି କଟିବ ଆପଣଙ୍କ ଦିନ ? ପଢନ୍ତୁ ଆଜିର ରାଶିଫଳ- ଗଜାନନଙ୍କ ପାଇଁ ନୂଆସାହିରେ ୭୦ ଫୁଟ୍ ଉଚ୍ଚ ତୋରଣ
ଭୁବନେଶ୍ୱର ନୂଆସାହି ଶ୍ରୀଶ୍ରୀଆଖଣ୍ଡଳମଣି ସେବା ସଂସଦ ପକ୍ଷରୁ ୪୧ ବର୍ଷ ଧରି ହୋଇଆସୁଛି ଗଜାନନଙ୍କ ପୂଜା । ଚଳିତ ବର୍ଷ ବିରାଟକାୟ ରାଜକୁମାର ଗଣେଶ ମୂର୍ତ୍ତି ନିର୍ମାଣ କରାଯାଇଛି । ଏହା ନିର୍ମାଣ କରିବାକୁ ଦୀର୍ଘ ୨ ମାସ ହେଲା ଖୋର୍ଦ୍ଧାର ୬ ଜଣ କାରିଗର ମୂର୍ତ୍ତି ତିଆରି ଲାଗିଥିଲେ । ଅବିକଳ ଇଣ୍ଡିଆ ଗେଟ୍ ଭଳି ଆକର୍ଷଣୀୟ ତୋରଣ ସହ ଓଡ଼ିଆ ଅସ୍ମିତାର ଝଲକ ଦେଖିବାକୁ ମିଳିଛି । ଏହି ତୋରଣ ଉଚ୍ଚତା ପ୍ରାୟ ୭୦ ଫୁଟ୍ ଥିବା ସୂଚନା ମିଳିଛି ।
