Ganjam Flood Causes / ଗଞ୍ଜାମରେ କାହିଁକି ହେଲା ଭୟଙ୍କର ବନ୍ୟା ? ମୁଖ୍ୟ ଶାସନ ସଚିବ କଲେ ବଡ଼ ଖୁଲାସା

ଗଞ୍ଜାମ ଜିଲ୍ଲାରେ ନିକଟରେ ହୋଇଥିବା ପ୍ରବଳ ବର୍ଷା ଓ ବନ୍ୟା ସ୍ଥିତିକୁ ନେଇ ଉଠିଥିବା ବିଭିନ୍ନ ପ୍ରଶ୍ନର ସ୍ପଷ୍ଟୀକରଣ ରଖିଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ । SRC କାର୍ଯ୍ୟାଳୟରେ ଅନୁଷ୍ଠିତ ଏକ ସମୀକ୍ଷା ବୈଠକ ପରେ ସେ ସାମ୍ବାଦିକ ସମ୍ମିଳନୀରେ ବର୍ଷା, ବନ୍ୟା ଓ ଡ୍ୟାମ୍ ପରିଚାଳନା ସମ୍ପର୍କରେ ସବିଶେଷ ତଥ୍ୟ ରଖିଛନ୍ତି ।
ମୁଖ୍ୟ ଶାସନ ସଚିବଙ୍କ ସୂଚନା ଅନୁଯାୟୀ, ଗଞ୍ଜାମ ଜିଲ୍ଲାର ପାତ୍ରପୁରରେ ମାତ୍ର ଗୋଟିଏ ଦିନରେ ୫୪୬ ମିଲିମିଟର ବର୍ଷା ରେକର୍ଡ ହୋଇଥିଲା। ଏହା ସହ କ୍ରମାଗତ ତିନି ଦିନ ଧରି ଅତ୍ୟଧିକ ବର୍ଷା ହୋଇଥିଲା। ଏହି ବର୍ଷାର ପରିମାଣ ୨୦୧୩ ମସିହାରେ ହୋଇଥିବା ବାତ୍ୟାଜନିତ ବର୍ଷାର ରେକର୍ଡକୁ ମଧ୍ୟ ଟପି ଯାଇଥିଲା । ଫଳରେ ଜିଲ୍ଲାର ବିଭିନ୍ନ ଅଞ୍ଚଳରେ ବନ୍ୟା ସ୍ଥିତି ଗମ୍ଭୀର ହୋଇଥିଲା ।

ଡ୍ୟାମ୍ ପରିଚାଳନା ନେଇ କ'ଣ କହିଲେ ମୁଖ୍ୟ ଶାସନ ସଚିବ ?

ବର୍ଷା ଓ ବନ୍ୟା ସମୟରେ ଜଳଭଣ୍ଡାର ଏବଂ ଡ୍ୟାମ୍ ପରିଚାଳନାକୁ ନେଇ ଉଠିଥିବା ପ୍ରଶ୍ନର ମଧ୍ୟ ଉତ୍ତର ରଖିଛନ୍ତି ଅନୁ ଗର୍ଗ । ତାଙ୍କ କହିବା ଅନୁଯାୟୀ, କ୍ୟାଚମେଣ୍ଟ ଏରିଆରୁ ଆସିଥିବା ଜଳର ମାତ୍ର ୧୦ ପ୍ରତିଶତ ଡ୍ୟାମ୍‌କୁ ଯାଇଥିବାବେଳେ ବାକି ୯୦ ପ୍ରତିଶତ ପାଣି ସିଧାସଳଖ ନଦୀଗୁଡ଼ିକ ଦେଇ ପ୍ରବାହିତ ହୋଇଥିଲା ।
ଡ୍ୟାମ୍‌ର ସୁରକ୍ଷାକୁ ସର୍ବାଧିକ ପ୍ରାଥମିକତା ଦିଆଯାଇଥିଲା । ନିର୍ଦ୍ଧାରିତ ପ୍ରୋଟୋକଲ୍ ଅନୁସାରେ ପର୍ଯ୍ୟାୟକ୍ରମେ ଡ୍ୟାମ୍‌ର ଗେଟ୍‌ଗୁଡ଼ିକ ଖୋଲାଯାଇଥିଲା । ଜଳ ପରିଚାଳନା ସମୟରେ ସମସ୍ତ ସୁରକ୍ଷା ନିୟମ ପାଳନ କରାଯାଇଥିବା ସେ ସ୍ପଷ୍ଟ କରିଛନ୍ତି ।


ବନ୍ୟା ପରେ ତ୍ୱରିତ ପୁନରୁଦ୍ଧାର କାର୍ଯ୍ୟ

ଏହି ପ୍ରାକୃତିକ ବିପର୍ଯ୍ୟୟରେ କୌଣସି ଜୀବନହାନି ଘଟିନଥିବା ସୂଚନା ଦେଇଛନ୍ତି ମୁଖ୍ୟ ଶାସନ ସଚିବ । ଏହା ସହ ବନ୍ୟା ପ୍ରଭାବିତ ଅଞ୍ଚଳରେ ଲୋକଙ୍କ ସମସ୍ୟା ଦୂର କରିବାକୁ ପ୍ରଶାସନ ପକ୍ଷରୁ ତ୍ୱରିତ ପଦକ୍ଷେପ ନିଆଯାଇଛି ।

ପ୍ରଭାବିତ ଅଞ୍ଚଳରେ ବିଦ୍ୟୁତ୍ ସରବରାହ, ପାନୀୟ ଜଳ ଯୋଗାଣ ଏବଂ କ୍ଷତିଗ୍ରସ୍ତ ଭିତ୍ତିଭୂମିର ମରାମତି କାର୍ଯ୍ୟକୁ ଯୁଦ୍ଧକାଳୀନ ଭିତ୍ତିରେ ଶେଷ କରାଯାଇଛି । ଲୋକଙ୍କୁ ଆବଶ୍ୟକୀୟ ସହାୟତା ଓ ରିଲିଫ୍ ଯୋଗାଇଦେବା ପାଇଁ ପ୍ରଶାସନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା ଜାରି ରହିଛି ।

ସାମଗ୍ରିକ ଭାବେ ଗଞ୍ଜାମରେ ହୋଇଥିବା ଅତ୍ୟଧିକ ବର୍ଷା ଏକ ବଡ଼ ଚ୍ୟାଲେଞ୍ଜ ସୃଷ୍ଟି କରିଥିଲା। ତେବେ ପ୍ରଶାସନ ପକ୍ଷରୁ ରିଲିଫ୍ ଓ ପୁନରୁଦ୍ଧାର କାର୍ଯ୍ୟକୁ ଗୁରୁତ୍ୱ ଦିଆଯାଇଥିବା କହିଛନ୍ତି ମୁଖ୍ୟ ଶାସନ ସଚିବ ଅନୁ ଗର୍ଗ ।