ଗଞ୍ଜାମ: ବନ୍ୟା ପାଣିରେ ବୁଡ଼ିଛି ଘରଦ୍ୱାର, ସଞ୍ଚିତ ଖାଦ୍ୟ । ଚୂଡ଼ା-ବିସ୍କୁଟ୍ ଖାଇ ବିତୁଛି ବନ୍ୟା ପ୍ରଭାବିତଙ୍କ ଦିନ । ଗଞ୍ଜାମରେ ବନ୍ୟା ସ୍ଥିତି ଏବେ ବି ଗମ୍ଭୀର ରହିଛି । ଗିଡ଼ିପାବାଲିରେ ଉଦ୍ଧାରକାର୍ଯ୍ୟ ଜାରି ଥିବାବେଳେ ନିଖୋଜ ୧୨ ଜଣଙ୍କ ସନ୍ଧାନ ପାଇଁ କନ୍ଧମାଳ ପଟୁ ଉଦ୍ଧାରକାରୀ ଦଳ ପହଞ୍ଚୁଛନ୍ତି । ନଦୀଗୁଡ଼ିକରେ ଜଳସ୍ତର କମୁଥିଲେ ବି ବିପଦ ସଙ୍କେତ ଉପରେ ପ୍ରବାହିତ ହେଉଛି। ପ୍ରଭାବିତ ୭୩ଟି ଗାଁ ମଧ୍ୟରୁ ଏବେ ୩ଟି ଗାଁରେ ପାଣି ରହିଛି । ୫୬ ହଜାର ୫୧ ଜଣଙ୍କୁ ସ୍ଥାନାନ୍ତର କରାଯାଇଛି । ୩୭୦ଟି ସ୍ଥାନରେ ରନ୍ଧା ଖାଦ୍ୟ ଦିଆଯାଉଛି। ବନ୍ୟା ପାଣିରେ ଛାରଖାର ହୋଇଛି ବ୍ୟବସାୟ । ଗାମୁଣ୍ଡି ନୂଆସାହିରେ ଘର ତଳୁ ମାଟି ବୋହି ନେଇଛି ପ୍ରଖର ବନ୍ୟା ସ୍ରୋତ। ଭୁଶୁଡ଼ିବା ଆଶଙ୍କାରେ ଟଳମଳ ହେଉଛି ଅନେକ କୋଠା ଘର ।
- ସର୍ବସ୍ଵ ହରାଇଛନ୍ତି ବନ୍ୟା ପ୍ରଭାବିତ
ଗଞ୍ଜାମରେ ବନ୍ୟା ସ୍ଥିତି ଏବେ ବି ଗମ୍ଭୀର ରହିଛି। ଗିଡ଼ିପାବାଲିରେ ଉଦ୍ଧାରକାର୍ଯ୍ୟ ଜାରି ଥିବା ବେଳେ ନିଖୋଜ ୧୨ ଜଣଙ୍କ ସନ୍ଧାନ ଜାରି ରହିଛି । ନଦୀଗୁଡ଼ିକରେ ଜଳସ୍ତର କମୁଥିଲେ ବି ବିପଦ ସଙ୍କେତ ଉପରେ ପ୍ରବାହିତ ହେଉଛି। ପ୍ରଭାବିତ ୭୩ଟି ଗାଁ ମଧ୍ୟରୁ ଏବେ ୩ଟି ଗାଁରେ ପାଣି ରହିଛି। ୫୬ ହଜାର ୫୧ ଜଣଙ୍କୁ ସ୍ଥାନାନ୍ତର କରାଯାଇଛି । ୩୭୦ଟି ସ୍ଥାନରେ ରନ୍ଧା ଖାଦ୍ୟ ଦିଆଯାଉଛି। ଆଗକୁ ପୁଣି ବାତ୍ୟା ଓ ବର୍ଷା ସମ୍ଭାବନା ଥିବାରୁ ୧୫-୨୦ ଦିନ ପାଇଁ ଖାଦ୍ୟ ସାମଗ୍ରୀ ଗଚ୍ଛିତ ରଖାଯାଉଥିବା କହିଛନ୍ତି ଜିଲ୍ଲାପାଳ । ହିଞ୍ଜିଳି-ଭଞ୍ଜନଗର ସହ ମୁଖ୍ୟ ରାସ୍ତାଗୁଡ଼ିକର ମରାମତି ଚାଲିଛି। ଟାଟା ପାୱାର ପକ୍ଷରୁ ପ୍ରାୟ ସବୁ ବ୍ଲକରେ ବିଦ୍ୟୁତ ସଂଯୋଗ ହୋଇସାରିଛି, ବାକି ସ୍ଥାନରେ ସନ୍ଧ୍ୟା ସୁଦ୍ଧା ବିଦ୍ୟୁତ ଯୋଗାଇ ଦିଆଯିବ । ଜିଲ୍ଲାରେ ୨ ତାରିଖ ପର୍ଯ୍ୟନ୍ତ ସ୍କୁଲଗୁଡ଼ିକୁ ଛୁଟି ଘୋଷଣା କରାଯାଇଛି।
- ମୁଣ୍ଡରେ ହାତ ଦେଇ ବସିଛି ଚାଷୀ
ଜମି ହୋଇଛି ବାଲିଚର । ଚାଷ ଜମି ଉପରେ ମାଡିଯାଇଛି ୫ଫୁଟର ବାଲି। ଏବେ ନିଜ କ୍ଷେତକୁ ଖୋଜି ପାଉନାହାନ୍ତୀ ଚାଷୀ। ଅମଳ ସମୟରେ ଧାନ ସହ ପନିପରିବା ଚାଷ ବୁଡ଼ି ଯାଇଥିବାରୁ ସୋରଡା ବ୍ଲକର ଗୋପାଳପୁର ଶାସନ ପଞ୍ଚାୟତ ତତାବାଲି ଓ ଲକ୍ଷ୍ମୀପୁର ଗ୍ରାମର ଚାଷୀଙ୍କ ମୁଣ୍ଡରେ ଚଡକ ପଡ଼ିଛି।
- ସଞ୍ଚିତ ୧୪ ଚାଉଳ ବସ୍ତା ନଷ୍ଟ
ଗଞ୍ଜାମ ଜିଲ୍ଲା ଧରାକୋଟ ବ୍ଲକ ଦସମାଇଲି ଗ୍ରାମରେ ବନ୍ୟାର କରାଳ ରୂପ ଦେଖିବାକୁ ମିଳିଛି । ଗାଁର ବୁଲି ଗଉଡଙ୍କ ସଞ୍ଚିତ ୧୪ ବସ୍ତା ଚାଉଳ ନଷ୍ଟ ହେବା ପରେ ଦୀର୍ଘ ୪ ଦିନ ହେବ ୫ ପ୍ରାଣୀ କୁଟୁମ୍ବ କେବଳ ଚୂଡ଼ା ଓ ବିସ୍କୁଟ ଖାଇ ଜୀବନ ବଞ୍ଚାଉଛନ୍ତି । କେବଳ ବୁଲି ନୁହଁନ୍ତି, ଦସମାଇଲ ଗ୍ରାମର ୩୦ରୁ ଊର୍ଦ୍ଧ୍ୱ ପରିବାରର ଶହେ କ୍ୱିଣ୍ଟାଲରୁ ଉର୍ଦ୍ଧ୍ୱ ଚାଉଳ ବନ୍ୟା ପାଣିରେ ବତୁରି ଯାଇଛି । ଏବେ ବତୁରି ଯାଇଥିବା ଚାଉଳ ବସ୍ତାକୁ ରାସ୍ତାକଡ଼ରେ ଶୁଖାଉଛନ୍ତି ବନ୍ୟା ବିପନ୍ନ ।
- ଅଧା ଦାମରେ ମିଳୁଛି ଚପଲ-କପଡ଼ା
ସେପଟେ ଶେରଗଡ଼ ଅଞ୍ଚଳରେ ବନ୍ୟା ବିଭୀଷିକା ଭିତରେ ସାମ୍ନାକୁ ଆସିଛି ରୋଚକ ଚିତ୍ର। ଶେରଗଡ଼ ମୁଖ୍ୟ ବଜାରରେ ଏବେ ଅଧା ଦାମ୍ରେ ମିଳୁଛି ଚପଲ ଓ ପୋଷାକ। ଦୋକାନରେ ବନ୍ୟା ପାଣି ପଶି ସାମଗ୍ରୀ ନଷ୍ଟ ହୋଇଯାଇଥିବାରୁ, କ୍ଷତି ଭରଣା ପାଇଁ ୫୦ ପ୍ରତିଶତ ରିହାତିରେ ସାମଗ୍ରୀ ବିକ୍ରି କରୁଛନ୍ତି ବ୍ୟବସାୟୀ। ଯାହାକୁ କିଣିବା ପାଇଁ ଦୋକାନ ସମ୍ମୁଖରେ ଗ୍ରାହକଙ୍କ ଲମ୍ବା ଲାଇନ୍ ଦେଖିବାକୁ ମିଳିଛି। ବନ୍ୟାର ପ୍ରକୋପରୁ ବାଦ୍ ପଡ଼ିନାହାନ୍ତି ବହି ବ୍ୟବସାୟୀ। ଦୋକାନରେ କାଦୁଅ ପାଣି ପଶିଯିବାରୁ ଶହ ଶହ ଟଙ୍କାର ବହି ଓଦା ହୋଇ ସଢ଼ିଯାଇଛି। ବିକ୍ରି ଅଯୋଗ୍ୟ ହୋଇପଡ଼ିଥିବାରୁ ଦୁଃଖରେ ବହିଗୁଡ଼ିକୁ ରାସ୍ତାକୁ ଫିଙ୍ଗିବାକୁ ବାଧ୍ୟ ହୋଇଛନ୍ତି ବ୍ୟବସାୟୀ।
ବନ୍ୟା ଜଳରେ ଭାସିଯାଇଛି ଭଞ୍ଜନଗର ମଶାଣିସାହି ଗାଁ। କେନାଲ କୂଳରେ ଶହ ଶହ ବର୍ଷ ଧରି ଘର କରି ରହିଥିବା ୧୯ଟି ପରିବାରର ୫୦ରୁ ଉର୍ଦ୍ଧ୍ୱ ଲୋକ ସମ୍ପୂର୍ଣ୍ଣ ବେସାହାରା ହୋଇପଡ଼ିଛନ୍ତି। ବନ୍ୟାର ପ୍ରଖର ସ୍ରୋତରେ ସବୁକିଛି ଧୋଇଯିବା ପରେ ପାଣି ଛାଡ଼ିବା ପରେ ନିଜ ନିଜ ସାମଗ୍ରୀ ସାଉଣ୍ଟିବାରେ ବ୍ୟସ୍ତ ଅଛନ୍ତି ବିପନ୍ନ। ସେହିପରି ଭଞ୍ଜନଗର ଗାମୁଣ୍ଡି ନୂଆସାହି ଗାଁରେ ମଧ୍ୟ ପ୍ରକୃତି ରଚିଛି ତାଣ୍ଡବ। ଗାଁ ଭିତରେ ସୁସୁ ଗର୍ଜନ କରି ବନ୍ୟା ପାଣି ପଶିବା ପରେ କୋଠା ଘର ତଳୁ ମାଟି ବୋହି ନେଇଛି। ଫଳରେ ଗାଁର ବହୁ କୋଠା ଘର ବିପଦସଙ୍କୁଳ ଅବସ୍ଥାରେ ରହିଛି । କେତେବେଳେ ଘର ଭୁଶୁଡ଼ି ପଡ଼ିବ, ସେହି ଭୟରେ ଦିନ କାଟୁଛନ୍ତି ଗ୍ରାମବାସୀ।
ପଢନ୍ତୁ ଏହି ଖବର: ବଙ୍ଗୋପସାଗରରେ ସୃଷ୍ଟି ହେଲା ବାତ୍ୟା ‘ମୁରାସୁ’, ଜାଣନ୍ତୁ କେଉଁଠି କରିବ ଲ୍ୟାଣ୍ଡଫଲ୍ଗଞ୍ଜାମରେ ବନ୍ୟାର ବିଭୀଷିକା ପରେ ଅସରନ୍ତି ଲୋକଙ୍କ ଦୁଃଖ । ପ୍ରଳୟଙ୍କରୀ ବନ୍ୟା ଜଳରେ ବୁଡ଼ିଯାଇଛି ଘରଦ୍ୱାର, ଛାରଖାର ହୋଇଯାଇଛି ବହୁ ପରିବାରର ସ୍ୱପ୍ନ। ଲୋକଙ୍କ ଆଖିରୁ ଲୁହ ଶୁଖୁନଥିବା ବେଳେ ବ୍ୟବସାୟୀଙ୍କ ଦୁଃଖ କହିଲେ ନ ସରେ।
