Rescue Operation / ଗଞ୍ଜାମ ଗିଡ଼ିପାବାଲିରେ ଚାଲିଛି ରେସ୍କ୍ୟୁ ଅପରେସନ... ଏବେ ବି ୧୨ ନିଖୋଜ

ଗଞ୍ଜାମ ଗିଡ଼ିପାବାଲି ଭୟଙ୍କର ଭୂସ୍ଖଳନରେ ଏବେବି ୧୨ ନିଖୋଜ... ସନ୍ଧାନ ପାଇଁ ନିୟୋଜିତ ନୌସେନାର ଲାଇଫ୍ ଡିଟେକ୍ସନ୍ ହେଲିକପ୍ଟର । ରେସକ୍ୟୁ ବେଳେ ୫ ଫୁଟର ମାଟି କାଦୁଅ ସାଜୁଛି ବାଧକ । ତଥାପି ଜାରି ରହିଛି ଉଦ୍ଧାର କାର୍ଯ୍ୟ । ସହଯୋଗ କରୁଛି ରେଳ ବିଭାଗ ।

ଗଞ୍ଜାମ ଗିଡ଼ିପାବଳିରେ ନିଖୋଜ ୧୨ ଜଣଙ୍କ ସନ୍ଧାନ ଜାରି ରଖିଛନ୍ତି ଉଦ୍ଧାରକାରୀ ଦଳ । ନୌସେନାର ଅତ୍ୟାଧୁନିକ ଉପକରଣ ସହ ଉଦ୍ଧାର କାର୍ଯ୍ୟ ତ୍ୱରାନ୍ୱିତ ହୋଇଛି । ଗଞ୍ଜାମ ଜିଲ୍ଲା ବାଇବିଲି ପଞ୍ଚାୟତ ତଡ଼ମା ରାଜସ୍ୱ ଗ୍ରାମ ଅନ୍ତର୍ଗତ ଗିଡ଼ିପାବଳିଠାରେ ଘଟିଥିବା ଭୟଙ୍କର ଭୂସ୍ଖଳନରେ ନିଖୋଜ ବ୍ୟକ୍ତିମାନଙ୍କୁ ଠାବ କରିବା ପାଇଁ ଉଦ୍ଧାର କାର୍ଯ୍ୟକୁ ବ୍ୟାପକ ଓ ତ୍ୱରାନ୍ୱିତ କରାଯାଇଛି ।

ନିଖୋଜଙ୍କ ସନ୍ଧାନ ପାଇଁ ଭାରତୀୟ ନୌସେନାର ଏକ ହେଲିକପ୍ଟର ମାଧ୍ୟମରେ ୩ଟି ଅତ୍ୟାଧୁନିକ ସର୍ଚ୍ଚ ଉପକରଣ -'ଲାଇଭ୍-ଡିଟେକ୍ସନ୍ ୟୁନିଟ୍ ସିସ୍ମିକ୍', 'ଭାବ୍ରେସନ୍ ଡିଟେକ୍ସନ୍ ୟୁନିଟ୍' ଏବଂ 'ଭିକ୍ଟିମ୍ ଲୋକେସନ୍ କ୍ୟାମେରା'ଜି. ଉଦୟଗିରିରେ ପହଞ୍ଚିଛି ।

ତେବେ ଅତ୍ୟନ୍ତ ଖରାପ ପାଣିପାଗ ଯୋଗୁଁ ହେଲିକପ୍ଟର ସେଠାରେ ଅବତରଣ କରିପାରି ନଥିଲା । ଫଳରେ ସେହି ଅତ୍ୟାଧୁନିକ ଉପକରଣଗୁଡ଼ିକୁ ସଡ଼କ ପଥରେ ଘଟଣାସ୍ଥଳକୁ ପଠାଯାଇଛି । ଭୋରରୁ ଉଦ୍ଧାର କାର୍ଯ୍ୟ ଜାରି ରଖିଛନ୍ତି ଟିମ୍ । ଅନ୍ୟପକ୍ଷରେ ଭୂସ୍ଖଳନ ହୋଇଥିବା ଅଞ୍ଚଳରେ ପ୍ରବଳ ବର୍ଷା ଜାରି ରହିଥିବାରୁ ଉଦ୍ଧାର କାର୍ଯ୍ୟ ବେଶ୍ କଷ୍ଟକର ହୋଇପଡ଼ିଛି ।

NDRF, ODRAF ଏବଂ ଓଡ଼ିଶା ଅଗ୍ନିଶମ ବାହିନୀ ସହିତ ଭାରତୀୟ ରେଳବାଇର ବିଶେଷଜ୍ଞ ଦଳ ମିଶି ମିଳିତ ଭାବେ ଏହି ସର୍ଚ୍ଚ ଅପରେସନ୍‌ରେ ଶାମିଲ ହୋଇଛନ୍ତି । ଘଟଣାସ୍ଥଳକୁ ଯିବା ପାଇଁ ରାସ୍ତାଘାଟ ଶୋଚନୀୟ ଥିବା ଏବଂ ପ୍ରତିକୂଳ ପାଣିପାଗ ସତ୍ତ୍ୱେ, ବିଶେଷଜ୍ଞମାନଙ୍କ ପରାମର୍ଶ କ୍ରମେ ଉଦ୍ଧାର ଅଭିଯାନକୁ ଦ୍ରୁତଗାମୀ କରିବା ପାଇଁ ସମସ୍ତ ସମ୍ଭାବ୍ୟ ଉଦ୍ୟମ ଜାରି ରହିଛି ।

ବାତ୍ୟା ଅର୍ଣ୍ଣବ ପରବର୍ତ୍ତୀ ବିପର୍ଯ୍ୟୟ ପରିଚାଳନା ନେଇ ଗଂଜାମ ଜିଲ୍ଲାପ୍ରଶାସନ ତତ୍ପର । ଯେଉଁ ସବୁ ଗ୍ରାମପଞ୍ଚାୟତ ଗୁଡ଼ିକରେ ବନ୍ୟାର ପ୍ରଭାବ ଅତ୍ୟନ୍ତ ଗମ୍ଭୀର ରହିଛି, ସେଠାରେ ୩୬୭ଟି ସ୍ଥାନରେ ଫ୍ରି କିଚେନ୍ ଖୋଲାଯାଇଛି । ସମୁଦାୟ ବାତ୍ୟା ଏବଂ ବନ୍ୟା ପରବର୍ତ୍ତୀ ସମୟରେ ୫୬ ହଜାରରୁ ଅଧିକ ଲୋକଙ୍କୁ ବାତ୍ୟା ଆଶ୍ରୟସ୍ଥଳକୁ ସ୍ଥାନାନ୍ତରିତ କରାଯାଇଛି ।

ଚାରିଚକିଆ ଯାନ ଏବଂ ଅନ୍ୟାନ୍ୟ ଜରୁରୀ ଗାଡ଼ି ନେଇ ଏପର୍ଯ୍ୟନ୍ତ ତିନୋଟି ଗ୍ରାମକୁ ଯାଇହେଉନାହିଁ । ଜିଲ୍ଲା ନିୟନ୍ତ୍ରଣ କକ୍ଷ ଦିନରାତି କାର୍ଯ୍ୟ କରୁଛି ଏବଂ ସମସ୍ତ ବ୍ଲକ ସ୍ତରୀୟ ନିୟନ୍ତ୍ରଣ କକ୍ଷଗୁଡ଼ିକ ମଧ୍ୟ ସକ୍ରିୟ ଭାବରେ କାର୍ଯ୍ୟ କରୁଛନ୍ତି ବୋଲି କହିଛନ୍ତି ଗଂଜାମ ଜିଲ୍ଲାପାଳ ।