ଭୁବନେଶ୍ବର,୦୨/୦୭: ଝାରପଡା ଜେଲରେ HIV ଆତଙ୍କ। ଝାରପଡା ଜେଲରେ ବଢୁଛି HIV ପଜିଟିଭ ସଂଖ୍ୟା । କିଛିଦିନ ତଳେ ମହିଳା ଥାନା ଦ୍ୱାରା ଦୁଷ୍କର୍ମ ଅଭିଯୋଗରେ କୋର୍ଟଚାଲାଣ ହୋଇଥିବା ଅଭିଯୁକ୍ତ ଏଡସ୍ ଆକ୍ରାନ୍ତ ବୋଲି ଜଣାପଡିଛି । କୋଚିଂ ସେଣ୍ଟରରେ ନାବାଳିକାକୁ ଦୁଷ୍କର୍ମ ଅଭିଯୋଗରେ କୋର୍ଟଚାଲାଣ କରିଥିଲା ମହିଳା ଥାନା ପୋଲିସ । ଅଭିଯୁକ୍ତ ଜଣଙ୍କ HIV ପଜିଟିଭ ଜଣାପଡିବା ପରେ ଏ ନେଇ ଚିଠି ଲେଖିଛନ୍ତି ଜେଲ କର୍ତ୍ତୃପକ୍ଷ । ସ୍ୱତନ୍ତ୍ର ପୋକ୍ସୋ କୋର୍ଟ ଓ ଡିସିପିଙ୍କୁ ଚିଠି ଲେଖି ଏ ସମ୍ପର୍କରେ ଅବଗତ କରାଯାଇଛି । ବର୍ତ୍ତମାନ ଝାରପଡା ଜେଲରେ ୮ ଜଣ HIV ପଜିଟିଭ ଅନ୍ତେବାସୀ ଥିବା କଥା ଜଣାପଡିଛି । ଏଭଳି ଖବର ଜଣାପଡିବା ପରେ ଜେଲରେ ଭୟର ବାତାବରଣ ଖେଳିଯାଇଛି।

ପୁର୍ବରୁ ରାଜଧାନୀର ହାଇପ୍ରୋଫାଇଲ୍ ଝାରପଡ଼ା ସ୍ପେଶାଲ ଜେଲ୍‌ର ସୁରକ୍ଷା ବ୍ୟବସ୍ଥାକୁ ନେଇ ଉଠିଥିଲା ବଡ଼ ପ୍ରଶ୍ନବାଚୀ। ଜେଲ୍ ଭିତରେ ନିଶା ପାଇଁ ବ୍ୟବହାର ହେଉଛି କଫ୍ ସିରଫ୍ ଓ ଏକ୍ସପାୟରୀ ମେଡିସିନ୍ । ଯାହାକୁ ଅତ୍ୟଧିକ ମାତ୍ରାରେ ସେବନ କରି ୭ ଜଣ କଏଦୀ ଗୁରୁତର ହୋଇଥିଲେ। ପ୍ରଥମେ ଫୁଡ୍ ପଏଜନିଂ କୁହାଯାଉଥିବା ବେଳେ ଚିକିତ୍ସା କରୁଥିବା ଡାକ୍ତରଙ୍କ ବୟାନ ପରେ ଘଟଣାରେ ଆସିଥିଲା ସାଙ୍ଘାତିକ ଟ୍ୱିଷ୍ଟ । ପ୍ରଶ୍ନ ଉଠୁଛି, ଜେଲ୍ ଭିତରେ ନିଶାର ଜାଗା ନେଲାଣି କି କଫ୍ ସିରଫ୍ ?

ପଢନ୍ତୁ ଏହି ଖବର: ଝାରପଡ଼ା ଜେଲ୍‌ରେ କଏଦୀ ଅସୁସ୍ଥ ଘଟଣା.: ଜେଲ୍‌ ହସ୍ପିଟାଲର ମେଡିସିନ୍ ଖାଇ କଏଦୀ ଅସୁସ୍ଥ ସୁଚନା

ଭୁଷୁଡ଼ି ପଡ଼ିଲା ଜେଲ୍‌ର ସୁରକ୍ଷା ପ୍ରାଚୀର । ରାତି ଅଧରେ ଝାରପଡ଼ା ସ୍ପେଶାଲ ଜେଲ୍‌ର ଢିଲା ସୁରକ୍ଷା ବ୍ୟବସ୍ଥାର ପୋଲ୍ ଖୋଲିଦେଲେ ୭ କଏଦୀ । ପ୍ରଶାସନର ବିନା ଅନୁମତିରେ ଜେଲ୍ ଭିତରକୁ ଛୁଞ୍ଚିଟିଏ ବି ଗଲିପାରିବ ନାହିଁ ବୋଲି ଡିଣ୍ଡିମ ପିଟୁଥିବା ଜେଲ୍ କର୍ତ୍ତୃପକ୍ଷଙ୍କ ସୁରକ୍ଷା ପ୍ରାଚୀର ଏବେ ଭୁଷୁଡ଼ି ପଡ଼ିଛି । ନିଶା ପାଇଁ କଫ୍ ସିରଫ୍ ଓ ମେଡିସିନ୍‌କୁ ମାଧ୍ୟମ କରି ଗୁରୁତର ହୋଇଥିଲେ ୭ ଅନ୍ତେବାସୀ ।

ଗତ ୨୩ ତାରିଖରେ ହଠାତ୍ ଅସୁସ୍ଥ ହେବା ପରେ ଗୁରୁତର ଅବସ୍ଥାରେ ସେମାନଙ୍କୁ କ୍ୟାପିଟାଲ ହସ୍ପିଟାଲ ଓ ଏମ୍ସରେ ଭର୍ତ୍ତି କରାଯାଇଛି । ୧୨ ଘଣ୍ଟା ପରେ କଏଦୀଙ୍କ ସ୍ୱାସ୍ଥ୍ୟାବସ୍ଥା ସିନା ସାମାନ୍ୟ ସୁଧୁରୁଛି, କିନ୍ତୁ ବିଗିଡ଼ି ଯାଇଛି ଜେଲ୍ ବିଭାଗର ଅବସ୍ଥା । ଚିକିତ୍ସା କରୁଥିବା ଡାକ୍ତରଙ୍କ ପ୍ରତିକ୍ରିୟା ଜେଲ୍ ପ୍ରଶାସନକୁ କାଠଗଡ଼ାକୁ ଟାଣି ଆଣିଛି ।
ଘଟଣାର ଗୁରୁତ୍ୱକୁ ଦେଖି ଗତକାଲି ରାତିରୁ ହିଁ ହସ୍ପିଟାଲ ପରିସରରେ ବ୍ୟାପକ ପୋଲିସ ଫୋର୍ସ ମୁତୟନ ହୋଇଛନ୍ତି । ଖୋଦ୍ ଭୁବନେଶ୍ୱର ଡିସିପି ମଧ୍ୟ ମେଡିକାଲରେ ପହଞ୍ଚି କଏଦୀଙ୍କ ସ୍ୱାସ୍ଥ୍ୟାବସ୍ଥା ଯାଞ୍ଚ କରିଥିଲେ।