ହ୍ୟୁମାନ ସାଗର ମୃତ୍ୟୁକୁ ନେଇ ମା’ ଶେଫାଳୀଙ୍କ ଏତଲା ପ୍ରସଙ୍ଗ । ବଡ଼ ବୟାନ ରଖିଛନ୍ତି କଟକ ଡିସିପି ଋଷିକେଶ ଖିଲାରୀ । ସେ କହିଛନ୍ତି, ଏତଲା ଆଧାରରେ ତଦନ୍ତ କରାଯାଉଛି । ଏତଲାରେ ଥିବା ବ୍ୟକ୍ତି ତଦନ୍ତ ପରିସରଭୁକ୍ତ ହେବେ । ମେଡିକାଲ୍ କର୍ତ୍ତୃପକ୍ଷଙ୍କ ସହ ଯୋଗାଯୋଗ କରାଯାଇଛି । ରିପୋର୍ଟ ଆସିବା ପରେ ତର୍ଜମା କରାଯିବ ବୋଲି କଟକ ଡିସିପି କହିଛନ୍ତି ।

ହ୍ୟୁମାନଙ୍କ ମୃତ୍ୟୁକୁ ନେଇ ତାଙ୍କ ମା’ ଶେଫାଳି ସୁନା କଟକ ମର୍କତ ନଗର ଥାନାରେ ୯ ଜଣଙ୍କ ନାଁରେ ଏତଲା ଦେଇଥିଲେ। ଅର୍ପିତା ଚୌଧୁରୀ ଓ ତାଙ୍କ ପରିବାର, ହ୍ୟୁମାନଙ୍କ ୨ ମ୍ୟାନେଜର ଦିନେଶ ଓ ପ୍ରଶାନ୍ତ, ସଙ୍ଗୀତ ନିର୍ଦ୍ଦେଶକ ସୋମେଶ ଶତପଥୀ, ଡାକ୍ତର ଶୁଭେନ୍ଦୁ ମିଶ୍ର ଓ ହ୍ୟୁମାନଙ୍କ ପତ୍ନୀ ଶ୍ରେୟା ମିଶ୍ର ଓ ତାଙ୍କ ପରିବାର ନାଁରେ ବି FIR କରିଥିଲେ ହ୍ୟୁମାନଙ୍କ ମାଆ । ଆଉ ଏହି ଏତଲା ପରେ ତନାଘନା ଆରମ୍ଭ କରିଛି ପୋଲିସ ।

ସେପଟେ କିଏ କେମିତି ହ୍ୟୁମାନଙ୍କୁ ମାନସିକ ଚାପ ଦେଉଥିଲେ ? ନିର୍ଯାତନା, ବିଷକ୍ରିୟା ଓ ନିଶାଦ୍ରବ୍ୟ ପ୍ରୟୋଗ ହେଉଥିଲା କି ? କିଏ ଓ କାହିଁକି ହ୍ୟୁମାନଙ୍କୁ ଦେଉଥିଲେ ଧମକଚମକ ? ତାଙ୍କ ଟଙ୍କା ଆତ୍ମସାତ ହୋଇଛି କି ? କିଛି ଚଞ୍ଚକତା କରିଥିଲେ କି ଦୁଇ ମ୍ୟାନେଜର ? ଡିଜିଟାଲ ପ୍ରମାଣ ଆଉ କିଏ ନଷ୍ଟ କରିଛନ୍ତି ? ହ୍ୟୁମାନଙ୍କ ସହ ଅର୍ପିତାଙ୍କ ସମ୍ପର୍କ ଓ ମୃତ୍ୟୁ ପାଇଁ ସେ କିଭଳି ଦାୟୀ ? ଶ୍ରେୟାଙ୍କ ସହ ଦାମ୍ପତ୍ୟ ବିବାଦ, ଅଲଗା ହେବା ଓ ଝିଅ ସହ ଭେଟ କରାଇ ଦେଉ ନଥିବା ଅଭିଯୋଗର ସତ ଜାଣିବାକୁ ତଦନ୍ତର ମୂଳକୁ ଯିବ ପୋଲିସ ।

ସେହିପରି ହ୍ୟୁମାନଙ୍କ ମାଆ ଦେଇଥିବା ଏତଲାରେ ଥିବା ୯ ଜଣଙ୍କର ପ୍ରତ୍ୟକ୍ଷ ଓ ପରୋକ୍ଷରେ କ'ଣ ଭୂମିକା ରହିଛି ? ଏମିତି ତମାମ ଦିଗରେ ତଦନ୍ତକୁ ବ୍ୟାପକ କରିବା ସହ ନିଷ୍କର୍ଷରେ ପହଞ୍ଚିବାକୁ ଲକ୍ଷ୍ୟ ରଖିଛି ପୋଲିସ । ଏବେ ସମସ୍ତଙ୍କ ନଜର ହ୍ୟୁମାନ ମୃତ୍ୟୁ ପଛର ରହସ୍ୟକୁ ପୋଲିସ କେବେ ଲୋକଲୋଚନକୁ ଆଣିବ ।

ସୂଚନା ଅନୁସାରେ, ଡିସେମ୍ବର ୨୧ରେ କଣ୍ଠଶିଳ୍ପୀ ହ୍ୟୁମାନ ସାଗର ମୃତ୍ୟୁ ମାମଲାରେ ଥାନାରେ ଏତଲା ଦେଇଥିଲେ ମାଆ ଶେଫାଳି ସୁନା । କଟକ ମର୍କତ ନଗର ଥାନାରେ ସେ ଏତଲା ଦେଇ ପୁଅକୁ ନିର୍ଯାତନା ଦିଆଯାଇଥିବା ଅଭିଯୋଗ କରିଥିଲେ । ହ୍ୟୁମାନଙ୍କ ସନ୍ଦେହଜନକ ମୃତ୍ୟୁର ତଦନ୍ତ ଦାବି କରିଥିଲେ ହ୍ୟୁମାନଙ୍କ ମାଆ ।