ନୟାଗଡ: ସୀମା ଟପିଲା କଙ୍ଗାରୁ କୋର୍ଟ । ଜବରଦଖଲ ଉଚ୍ଛେଦ ନାଁରେ କଙ୍ଗାରୁ କୋର୍ଟ କରି ଗ୍ରାମବାସୀ ଆଇନକୁ ହାତକୁ ନେଇଥିବା ଅଭିଯୋଗ ହୋଇଛି l ଜୋରଜବରଦସ୍ତ ଘର ଭାଙ୍ଗିବାର ଭିଡ଼ିଓ ଏବେ ଭାଇରାଲ ହୋଇଛି l ନୟାଗଡ଼ ଜିଲ୍ଲା ସଦର ଥାନା ଦେଉଳୀ ଗାଁରେ ଜବରଦଖଲ ଉଚ୍ଛେଦକୁ ନେଇ ପ୍ରବଳ ଉତ୍ତେଜନା ଦେଖାଯାଇଛି l ଏହି ଗାଁରେ ଭାସ୍କର ସାହୁ ଗାଁ କୋଠ ଜମିକୁ ଅକ୍ତିଆର କରି ଏକ ଆଇସକ୍ରିମ ଫ୍ୟାକ୍ଟ୍ରି କରିଥିଲେ l ଏହି ସ୍ଥାନରୁ ଫ୍ୟାକ୍ଟ୍ରି ହଟାଇବା ପାଇଁ ଗ୍ରାମବାସୀ ବାରମ୍ବାର କହିଥିଲେ l କଥାକୁ ଭୃକ୍ଷେପ କରୁନଥିବା କାରଣରୁ ଗ୍ରାମବାସୀ ଭାସ୍କରଙ୍କ କାରଖାନାକୁ ଭାଙ୍ଗି ମାଟିରେ ମିଶାଇ ଦେଇଛନ୍ତି l

ଏପଟେ ଭାସ୍କର କହିଛନ୍ତି ତାଙ୍କ ଝିଅର ଫଟୋ ସୋସିଆଲ ମିଡିଆରେ ଭାଇରାଲ୍ ହୋଇଥିଲା l ଏ ନେଇ ସେ ସଦର ଥାନାରେ ଅଭିଯୋଗ କରିବାରୁ, କାହିଁକି ଥାନାକୁ ଗଲ କହି ଗ୍ରାମବାସୀମାନେ ତାଙ୍କୁ ବିରୋଧ କରିଥିଲେ l ସେବେ ଠାରୁ ତିକ୍ତତା ଲାଗି ରହିଛି l ଏବେ ବିଭିନ୍ନ ଆସବାପତ୍ର ଭାଙ୍ଗିବା ସହ ପରିବାର ଲୋକଙ୍କୁ ମାଡ଼ ମାରିଥିବା ଅଭିଯୋଗ ହୋଇଛି l ଏପରିକି ଘର ଉପରକୁ ଟେକା ପଥର ମାଡ଼ କରାଯାଇଛି l ଅଳ୍ପକେ ବର୍ତ୍ତୀ ଯାଇଥିବା କହିଛନ୍ତି ପରିବାର ଲୋକେ l ଗ୍ରାମବାସୀମାନେ ଏହି ସ୍ଥାନକୁ ଜବରଦଖଲ ମୁକ୍ତ କରିବାକୁ ନେଇ ଗାଁରେ ପ୍ରବଳ ଉତ୍ତେଜନା ସୃଷ୍ଟି ହୋଇଛି । ଏନେଇ ଭାସ୍କର ନୟାଗଡ଼ ସଦର ଥାନାରେ ଲିଖତ ଅଭିଯୋଗ କରିବା ସହ ନ୍ୟାୟ ପାଇଁ ନୟାଗଡ଼ ଏସପିଙ୍କୁ ସାକ୍ଷାତ କରିଛନ୍ତି l ଆପୋଷ ବୁଝାମଣା ପାଇଁ ସଦରଥାନା ପୋଲିସ ଉଦ୍ୟମ ଜାରି ରଖିଛି l

ଅଧିକ ପଢନ୍ତୁ ଓଡିଶା ଖବର