IIWM Odisha / ଜଳ ସଙ୍କଟ ରୋକିବାକୁ ବଡ଼ ପଦକ୍ଷେପ, ଚାଷୀଙ୍କ ଆୟ ବଢ଼ାଇବ ନୂଆ ଜଳ ପରିଚାଳନା ଟେକ୍ନୋଲୋଜି

୩୯ ତମ ପ୍ରତିଷ୍ଠା ଦିବସ ପାଳନ କରିଛି ଭାରତୀୟ କୃଷି ଅନୁସନ୍ଧାନ ପରିଷଦ ଅନ୍ତର୍ଗତ ଭାରତୀୟ ଜଳ ପରିଚାଳନା ପ୍ରତିଷ୍ଠାନ । ଓୟୁଏଟିର କୁଳପତି ପ୍ରଫେସର ପ୍ରଭାତ କୁମାର ରାଉଳ ମୁଖ୍ୟ ଅତିଥି ଭାବେ ଯୋଗ ଦେଇ ଏହି କାର୍ଯ୍ୟକ୍ରମକୁ ଉଦଘାଟନ୍ କରିଥିଲେ ।

ସେ ତାଙ୍କ ବକ୍ତବ୍ୟରେ କହିଲେ ଯେ ବର୍ତ୍ତମାନ ଗ୍ରୀଷ୍ମ ଋତୁ । ଓଡ଼ିଶା ସମେତ ଦେଶର ବିଭିନ୍ନ ଭାଗରେ ଭୂତଳ ଜଳ ସ୍ତର ହ୍ରାସ ଏକ ବଡ଼ ଚିନ୍ତାର କାରଣ ପାଲଟିଛି । ଆମ ସମସ୍ତଙ୍କ ମିଳିତ ପ୍ରୟାସରେ ଭୂଜଳ ସ୍ତର ହ୍ରାସ ରୋକିବାକୁ ହେବ । IIWM ଦ୍ଵାରା ବିକଶିତ କୃତ୍ରିମ ଭୂଜଳ ଭରଣ ଟେକ୍ନୋଲୋଜି ଏ ଦିଗରେ ନିଶ୍ଚୟ ସହାୟକ ହେବ ।
ସେହିପରି ଆଇସିଏଆର – ସିଫାର ନିର୍ଦ୍ଦେଶକ ଡକ୍ଟର ପ୍ରମୋଦ କୁମାର ସାହୁ ସମ୍ମାନିତ ଅତିଥି ରୂପେ ଯୋଗ ଦେଇ ସ୍ଥାପନା ଦିବସ ଅଭିଭାଷଣ ରଖିଥିଲେ । ସେ କହିଥିଲେ ଯେ ବର୍ଷା ଜଳ ସଂରକ୍ଷଣ କରି ସେଥିରେ କୃଷି କାର୍ଯ୍ୟ ସହିତ ମାଛ ଚାଷ ଦ୍ଵାରା ଚାଷୀ ତାଙ୍କର ଆୟକୁ ବହୁ ଗୁଣିତ କରିପାରିବେ ।

ଅନ୍ୟତମ ସମ୍ମାନିତ ଅତିଥି ଓଡ଼ିଶା ସରକାରଙ୍କ କୃଷି ବିଭାଗର ମୁଖ୍ୟ ଯନ୍ତ୍ରୀ ଇଞ୍ଜିନିୟର ବିଷ୍ଣୁ ପ୍ରସାଦ ମିଶ୍ର ତାଙ୍କ ଅଭିଭାଷଣରେ କହିଲେ ଯେ ଆଗାମୀ ଦିନରେ ଜଳ ସଙ୍କଟ ନ ଆସିବା ପାଇଁ ଚାଷୀଭାଇମାନଙ୍କୁ ଆଇଆଇଡବ୍ଲ୍ୟୁଏମ ଦ୍ଵାରା ବିକଶିତ ଜଳ ସଞ୍ଚୟକାରୀ କୃଷି ପଦ୍ଧତି ଆପଣେଇବାକୁ ପଡ଼ିବ ।

ସର୍ବ ପ୍ରଥମେ ପ୍ରତିଷ୍ଠାନର ନିର୍ଦ୍ଦେଶକ ଡକ୍ଟର ଅର୍ଜମାଦତ୍ତ ଷଡଙ୍ଗୀ ଅତିଥିମାନଙ୍କୁ ସ୍ଵାଗତ କରିବା ସହିତ ତାଙ୍କ ପରିଚୟ ପ୍ରଦାନ କରିଥିଲେ । ଡକ୍ଟର ଷଡ଼ଙ୍ଗୀ ତାଙ୍କ ପ୍ରାରମ୍ଭିକ ବକ୍ତବ୍ୟରେ ଆଇଆଇଡବ୍ଲ୍ୟୁଏମର ବୈଜ୍ଞାନିକ ମାନଙ୍କ ଦ୍ଵାରା ବିକଶିତ ଟେକ୍ନୋଲୋଜି ଗୁଡିକର ଉପକାରିତା ବିଷୟରେ ଉପସ୍ଥିତ ଜନତାଙ୍କୁ ଅବଗତ କରାଇଥିଲେ ।
ସେ କହିଥିଲେ ଯେ ଆମେ ଜଳସେଚନରେ ଆଧୁନିକ ଟେକ୍ନୋଲୋଜି ଯଥା ସମ୍ମନ୍ଵିତ ସେନ୍ସିଂ ସିଷ୍ଟମ ଓ କେନାଲ ସ୍ଵୟଂ ଚାଳିତ ସିଷ୍ଟମ ଇତ୍ୟାଦିରେ ଚାଷୀ ମାନଙ୍କୁ ଅଭ୍ୟସ୍ତ କରାଉଛୁ । ସ୍ଥାପନା ଦିବସ ଅବସରରେ ବିଭିନ୍ନ ଜିଲ୍ଲାରୁ ଆସିଥିବା ୧୧ ଜଣ ଶ୍ରେଷ୍ଠ କୃଷକଙ୍କୁ ସମ୍ମାନିତ କରାଯାଇଥିଲା । ଉତ୍କର୍ଷ କାର୍ଯ୍ୟ ପାଇଁ ଶ୍ରେଷ୍ଠ ବୈଜ୍ଞାନିକ ଓ ଶ୍ରେଷ୍ଠ କର୍ମଚାରୀଙ୍କୁ ପୁରସ୍କୃତ କରାଯାଇଥିଲା ।

ପ୍ରତିଷ୍ଠାନରୁ ପ୍ରକାଶିତ ବିଭିନ୍ନ ଟେକ୍ନୋଲୋଜି ବୁଲେଟିନକୁ ଅତିଥିମାନେ ଉନ୍ମୋଚନ କରିଥିଲେ । ଏହି କାର୍ଯ୍ୟକ୍ରମରେ ଓଡ଼ିଶାରେ ଅବସ୍ଥିତ ବିଭିନ୍ନ ଆଇସିଏଆର ସଂସ୍ଥାର ମୁଖ୍ୟ, ରାଜ୍ୟ ସରକାରଙ୍କ ବିଭିନ୍ନ ପଦାଧିକାରୀ, ବୈଜ୍ଞାନିକ, ବୈଷୟିକ ଅଧିକାରୀ, ପ୍ରଗତିଶୀଳ କୃଷକ ଓ ଛାତ୍ରଛାତ୍ରୀ ସାମିଲ ହୋଇଥିଲେ ।