ଅର୍ଗସ ବ୍ୟୁରୋ: ଜେସିବି ଦ୍ୱାରା ଶତାଧିକ ଟ୍ରାକ୍ଟର ଓ ଟ୍ରିପରରେ ବାଲି ଉଠାଣ କରି ଚୋରା ଚାଲାଣ କରାଯାଉଥିବା ଅଭିଯୋଗ ହୋଇଛି । ଅନେକ ବାଲିଘାଟ ରାୟଗଡ଼ା ଜିଲ୍ଲା ସଦର ମହକୁମାରେ ଥିଲେ ମଧ୍ୟ ହାତ ଗୁଞ୍ଜl ନେଇ କେବଳ ଦୁଇଟି ଘାଟକୁ କେ. ଫର୍ମ ଯୋଗାଇଛି ପ୍ରଶାସନ । ବାକି ଘାଟରେ କେ. ଫର୍ମ ନଥିବା କାରଣରୁ ବାଲି ଟ୍ରାକ୍ଟର ଗୁଡିକ ଜବତ କରି ମୋଟା ଆକାରରେ ଫାଇନ୍‌ ଆଦାୟ କରିବା ଫଳରେ ଜିଲ୍ଲାର ଟ୍ରାକ୍ଟର ସଙ୍ଘ ଏବେ ଧର୍ମଘଟରେ ବସିଛି । ଜିଲ୍ଲାରେ ସମସ୍ତ ସରକାରୀ ଓ ବେସରକାରୀ ନିର୍ମାଣଧୀନ କାମ ବନ୍ଦ ପଡିଛି । ଫଳରେ ଅନେକ ଖଟିଖିଆଙ୍କ ଦାନା ପାଣି ମଧ୍ୟ ବନ୍ଦ ହୋଇଛି । ଯାହାକୁ ନେଇ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଛନ୍ତି ଟ୍ରାକ୍ଟର ୟୁନିଅନ ଓ ନିର୍ମାଣ ଶ୍ରମିକ ସଭାପତି ।

ରାୟଗଡ଼ା ବ୍ଲକରେ 5ଟି ବାଲିଘାଟ ଅଛି । କିନ୍ତୁ କୌଣସି ବି ଘାଟରେ ଲାଗିନି ଫଳକ । ବିଶେଷ ଭାବେ ହଂସା ବାଲିଘାଟରେ ବେନିଅମ ଭାବେ ନଦୀ ଗର୍ଭରୁ ଜେସିବି ଦ୍ବାରା ବାଲି ଉଠାଣ ଯୋଗୁ ନଦୀ ଗର୍ଭ ଏବଂ ପଠାଗୁଡ଼ିକରେ ବଡ଼ ବଡ଼ ଗର୍ତ୍ତ ସୃଷ୍ଟି କରୁଛି । ଫଳରେ ନଦୀ ଏହାର ଦିଗ ପରିବର୍ତ୍ତନ କରି କୂଳଲଙ୍ଘି ଜନବସତି ଆଡକୁ ମୁହାଁଉଛି । ଅନେକ ଲୋକଙ୍କ ଚାଷ ଜମି ନଷ୍ଟ ହେଉଛି । ନଦୀ ପଠାରୁ ଦୈନିକ ସହସ୍ରାଧିକ ଟ୍ରିପ ବାଲି ମେସିନ ଜରିଆରେ ଉତ୍ତୋଳନ କରାଯାଇ ଭାରି ଯାନ ଦ୍ବାରା ବାହାର ରାଜ୍ୟକୁ ଚାଲାଣ ହେଉଛି । ଆନ୍ଧ୍ର ବ୍ୟବସାୟୀ ରାୟଗଡ଼ାରେ ଡେରା ପକାଇ ବେଆଇନ ବାଲି ଉତ୍ତୋଳନ କରି ଆନ୍ଧ୍ରକୁ ଚୋରା ଚାଲାଣ କରୁଛନ୍ତି । ଫଳରେ ଓଡ଼ିଶା ସରକାର କୋଟି କୋଟି ଟଙ୍କା ରାଜସ୍ୱ ହରାଉ ଥିବାବେଳେ, ଆନ୍ଧ୍ର ବାଲି ମାଫିଆ ମାଲାମାଲ ହେଉଛନ୍ତି ।

ଓଡ଼ିଶାର ସୀମା ହେଉ କି ଶିକ୍ଷା ସବୁଠି ପଡ଼ୋଶୀଙ୍କ ଦବଦବା । କୋଟିଆ ହେଉ କି ଗଜପତି କି ରାୟଗଡ଼ ଦାଦାଗିରି ଦେଖାଉଛି ଆନ୍ଧ୍ର । ଆଉ ସବୁ ଜାଣି ଚୁପ୍ ୨୪ ବର୍ଷର ସ୍ଥିର ବିଜେଡି ସରକାର ।

ଅଧିକ ପଢ଼ନ୍ତୁ ଓଡିଶା ଖବର: