ଅର୍ଗସ ବ୍ୟୁରୋ:  ଭୁବନେଶ୍ୱର IIT ପାର୍କରେ ହଣ୍ଡ୍ରେଡ୍ କ୍ୟୁବ୍ ଷ୍ଟାର୍ଟଅପ୍ କନକ୍ଲେଭ୍‌ର ଶୁଭାରମ୍ଭ କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଏହି ଅବସରରେ ସେ କହିଛନ୍ତି, ଏକ ଭାରତ, ଶ୍ରେଷ୍ଠ ଭାରତର ନାରା ଦେଇଛନ୍ତି ପ୍ରଧାନମନ୍ତ୍ରୀ । ଏବେ ସାରା ବିଶ୍ଵ ଭାରତକୁ ଦେଖୁଛି । ବୈଶ୍ଵିକ ଆବଶ୍ୟକତାକୁ ଦୃଷ୍ଟିରେ ରଖି ଛାତ୍ରଛାତ୍ରୀ କାମ କରୁଛନ୍ତି । ମହିଳାଙ୍କ ନେତୃତ୍ବରେ ତିଆରି ହେବ ବିକଶିତ ଭାରତ । ଦେଶରେ  ଷ୍ଟାର୍ଟ ଅପ୍ ସଂଖ୍ୟା 1 ଲକ୍ଷ 20 ହଜାରରେ ପହଞ୍ଚିଲାଣି । ଦେଖୁ ଦେଖୁ 10ରୁ 15 ଲକ୍ଷ ଷ୍ଟାର୍ଟ ଅପ୍ ତିଆରି ହୋଇଯିବ । ଏଥିରେ ଓଡ଼ିଶାର ମଧ୍ୟ ଅନେକ ଷ୍ଟାର୍ଟ ଅପ୍ ସ୍ଥାନ ପାଇବ । ବିଶ୍ବର କୋଣ ଅନୁକୋଣରେ ଥିବା ସମସ୍ତ ଓଡ଼ିଆଙ୍କୁ ଷ୍ଟାର୍ଟ ଅପ୍ କରିବା ଦିଗରେ ଆହ୍ଵାନ ଦେବା ସହ ଓଡ଼ିଶାର ଷ୍ଟାର୍ଟ ଅପ୍ ବିଶ୍ଵ ସ୍ତରକୁ ଯିବ ବୋଲି କହିଛନ୍ତି ଧର୍ମେନ୍ଦ୍ର ପ୍ରଧାନ ।

କାର୍ଯ୍ୟକ୍ରମରେ ପିଲାଙ୍କର ବିଭିନ୍ନ ପ୍ରୋଜେକ୍ଟ ବୁଲି ଦେଖିଥିଲେ କେନ୍ଦ୍ରମନ୍ତ୍ରୀ । ଆଇଆଇଟି ଭୁବନେଶ୍ବରର ୧୫୦୦ ସିଟ୍ ବିଶିଷ୍ଟ ଅଡିଟୋରିୟମର ଉଦଘାଟନ ସହ ୪୫୦ କୋଟି ଟଙ୍କା ମୂଲ୍ୟର ପ୍ରକଳ୍ପର ଶିଳାନ୍ୟାସ କରିଛନ୍ତି ଧର୍ମେନ୍ଦ୍ର । ଏଥିସହ ପ୍ରାୟ ୨୦ଟି ଶିଳ୍ପସଂସ୍ଥା, ୩୦ଟି ଷ୍ଟାର୍ଟଅପ୍ ଏବଂ ୩୦ ପୁଞ୍ଜିନିବେଶକାରୀଙ୍କ ସହ ଚୁକ୍ତି ସ୍ବାକ୍ଷରିତ ହୋଇଛି । ଏହି କାର୍ଯ୍ୟକ୍ରମରେ ବିଭିନ୍ନ କମ୍ପାନୀର ଉଚ୍ଚ ପଦସ୍ତ ଅଧିକାରୀଙ୍କ ସହ ଫିନଲାଣ୍ଡ, ଆମେରିକା, କେନିଆ ଭଳି ଦେଶରୁ ପ୍ରତିନିଧି ଯୋଗ ଦେଇଥିଲେ ।

୧୦୦-କ୍ୟୁବ୍ ଷ୍ଟାର୍ଟ ଅପ୍ ପଦକ୍ଷେପ ଆଇଆଇଟି ଭୁବନେଶ୍ବରକୁ ଓଡ଼ିଶାର ଏକ ଉଦ୍ୟୋଗ ହବ୍ ଭାବେ ପ୍ରତିଷ୍ଠିତ କରିବ । ଏଥିସହ ଦେଶରେ ଷ୍ଟାର୍ଟ ଅପ୍ ସଂସ୍କୃତି ପ୍ରତିପୋଷଣ ଦିଗରେ ଏକ ଗୁରୁତ୍ବପୂର୍ଣ୍ଣ ମାଇଲଖୁଣ୍ଟ ଭାବେ ଉଭାହେବ।

ଅଧିକ ପଢ଼ନ୍ତୁ ଓଡିଶା ଖବର: