ସମ୍ବଲପୁର: ସମ୍ବଲପୁରରେ ଆଇଆଇଏମର ସ୍ଥାୟୀ କ୍ୟାମ୍ପସର ଲୋକାର୍ପଣ ।  ୪୦୦ କୋଟି ଟଙ୍କା ବ୍ୟୟରେ ନିର୍ମିତ କ୍ୟାମ୍ପସର  ଲୋକପର୍ଣ କଲେ ପ୍ରଧାନମନ୍ତ୍ରୀ॥  ଓଡିଶାବାସୀଙ୍କୁ ଭେଟି ଦେଲେ ୬୮ ହଜାର ୧୬୦ କୋଟିର ୧୮ଟି ପ୍ରକଳ୍ପ ଆଇଆଈଏମ କ୍ୟା୍ମ୍ପସରେ  ପ୍ରଧାନମନ୍ତ୍ରୀ କହିଛନ୍ତି, ଓଡ଼ିଶାର ବିକାଶ ଯାତ୍ରାରେ ଆଜିର ଦିନ ମହତ୍ତ୍ଵପୂର୍ଣ୍ଣ । ଓଡ଼ିଶାକୁ ପ୍ରାୟ 70 ହଜାର କୋଟିର ପ୍ରକଳ୍ପ ଗୁଡିକ ପାଇଁ ବଧାଇ ଜଣାଉଛି । ବିଦ୍ୟୁତ୍‍, ଶିକ୍ଷା, ରେଳ ପରି ଅନେକ ପ୍ରକଳ୍ପର ଶୁଭାରମ୍ଭ ହୋଇଛି । ଯାହାଦ୍ଵାରା ରୋଜଗାର ସୃଷ୍ଟି ହେବା ସହ ଯୁବବର୍ଗ ସଶକ୍ତ ହେବେ । ସମ୍ବଲପୁରରେ ସ୍ଥାୟୀ କ୍ୟାମ୍ପସ ହେବା ଦ୍ଵାରା IIM କ୍ଷେତ୍ରରେ ଓଡ଼ିଶା ଆହୁରି ସଶକ୍ତ ହୋଇଛି । ପ୍ରତି ରାଜ୍ୟର ବିକାଶ ହେଲେ ବିକଶିତ ଭାରତର ସ୍ଵପ୍ନ ସଫଳ ହେବ । ଏବେ ଯାଏଁ ଓଡ଼ିଶାର ଗ୍ରାମାଞ୍ଚଳରେ ତିଆରି ହୋଇଛି 50 ହଜାର କିଲୋମିଟର ରାସ୍ତା । ଓଡିଶାରେ ନିର୍ମିତ ହୋଇଛି ୪ ହଜାର କିଲୋମିଟର ଜାତୀୟ ରାଜପଥ । ରେଳ ବିକାଶ କ୍ଷେତ୍ରରେ ଓଡ଼ିଶାକୁ 12 ଗୁଣ ଅଧିକ ବଜେଟ୍ ଦିଆଯାଇଛି । ଗତ 10 ବର୍ଷ ମଧ୍ୟରେ ଓଡ଼ିଶାକୁ ମିଳିଛି ରେକର୍ଡ ଅନୁଦାନ । ସୁବର୍ଣ୍ଣପୁର ଜିଲ୍ଲାକୁ ରେଳ ସଂଯୋଗ ଖୁସି ଆଣିଛି ।

ପୁରୀ-ସୋନପୁର-ପୁରୀ ଏକ୍ସପ୍ରେସ୍ ଟ୍ରେନ୍‌ର ଶୁଭାରମ୍ଭ ହୋଇଛି । ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ କରିବାରେ ଶ୍ରଦ୍ଧାଳୁଙ୍କୁ ସୁବିଧା ହେବ ଏହି ଟ୍ରେନ । କେନ୍ଦ୍ର ସରକାରଙ୍କ DMF ଫଣ୍ଡରେ ଓଡ଼ିଶା ବେଶି ଲାଭାନ୍ଵିତ ହୋଇଛି ।DMF ଫଣ୍ଡରେ ଓଡ଼ିଶାକୁ ମିଳିଛି 25 ହଜାର କୋଟିର ଅନୁଦାନ । ଓଡ଼ିଶାକୁ ମହତ୍ତ୍ଵପୂର୍ଣ୍ଣ ସ୍ଥାନକୁ ନେବା ଓ ବିକାଶ ପାଇଁ କେନ୍ଦ୍ରର ପ୍ରୟାସ ନିରନ୍ତର ଜାରି ରହିଛି ବୋଲି କହିଛନ୍ତି ପ୍ରଧାନମନ୍ତ୍ରୀ ମୋଦି । ସମ୍ବଲପୁର ଆଇଆଇଏମର ସ୍ଥାୟୀ କ୍ୟାମ୍ପସ ଉଦଘାଟନ କାର୍ଯ୍ୟକ୍ରମରେ ଯୋଗ ଦେଇ ପ୍ରଧାନମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ପ୍ରଧାନମନ୍ତ୍ରୀ ଦେଶକୁ ନୂଆ ଦିଗ ଦେଇଛନ୍ତି । ଦେଶକୁ ଅର୍ଥନୀତିର ପାୱାର ହାଉସ ପରିଣତ କରିବା ଦିଗରେ କାର୍ଯ୍ୟ କରିଛନ୍ତି ପ୍ରଧାନମନ୍ତ୍ରୀ ।

ଦେଶରେ ଗୋଲଡେନ ସମୟ ଚାଲିଥିବା ବେଳେ ଓଡ଼ିଶା ଏଥିରେ ଆଗୁଆ ରହିଛି । ଷ୍ଟାର୍ଟଅପ ପାଇଁ ଏହା ସୁବର୍ଣ୍ଣ ସମୟ ବୋଲି ନିଜ ଅଭିଭାଷଣରେ କହିଛନ୍ତି ନବୀନ । ଆଇଆଇଏମ ଉଦଘାଟନୀ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର  ପ୍ରଧାନ । ମୋଦୀ ସରକାରଙ୍କ ଓଡ଼ିଶା ପ୍ରତି ଅବଦାନ କଥା କହିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ର କହିଛନ୍ତି, ୨୦୦୪ରୁ ୨୦୧୪ ମଧ୍ୟରେ ତକକାଳୀନ କେନ୍ଦ୍ର ସରକାର ୩ ଲକ୍ଷ କୋଟି ଟଙ୍କା ଦେଇଥିବା ବେଳେ ଗତ ୧୦ ବର୍ଷରେ ଓଡ଼ିଶାକୁ ୧୮ ଲକ୍ଷ କୋଟି ଟଙ୍କା ପ୍ରଦାନ କରିଛନ୍ତି ମୋଦି । ସମ୍ବଲପୁର ଆଇଆଇଏମର ନୂଆ କ୍ୟାମ୍ପସର ଉଦଘାଟନ ଉତ୍ସବରେ ପୂର୍ବ ଭାରତ ବିକାଶ କରିବା ଉପରେ ମୋଦି ଗୁରୁତ୍ୱ ଦେଇଛନ୍ତି ।  ଆଇଆଇଏମ ସମ୍ବଲପୁରର ଉଦାହରଣ ଦେଇ ଧର୍ମେନ୍ଦ୍ର କହିଛନ୍ତି, ପ୍ରଧାନମନ୍ତ୍ରୀ ଯେଉଁ ପ୍ରକଳ୍ପର ଶିଳାନ୍ୟାସ କରନ୍ତି ସେହି ପ୍ରକଳ୍ପର ଲୋକାର୍ପଣ ମଧ୍ୟ କରନ୍ତି । ତେବେ ଓଡ଼ିଶାର ବିଦ୍ୟୁତ୍ ଶକ୍ତି କ୍ଷେତ୍ରରେ ୫୭ ହଜାର କୋଟି ନିବେଶ ହେବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ । ଗତ ୨୦୨୧ରେ କୋଭିଡ୍ ସମୟରେ ପ୍ରଧାନମନ୍ତ୍ରୀ ମୋଦି ନିଜେ ଭିଡିଓ କନଫରେନ୍ସିଂ ଜରିଆରେ ଆଇଆଇଏମ୍‌ ସମ୍ବଲପୁରର ନୂତନ କ୍ୟାମ୍ପସ ଶିଳାନ୍ୟାସ କରିଥିଲେ । ଲୋକାର୍ପଣ ଉତ୍ସବରେ ପ୍ରଧାନମନ୍ତ୍ରୀ ମୁଖ୍ୟ ଅତିଥି ଭାବେ ଯୋଗ ଦେଇଥିବା ବେଳେ ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ରେଳ ଅଶ୍ୱିନୀ ବୈଷ୍ଣବ, କେନ୍ଦ୍ରମନ୍ତ୍ରୀ ବିଶେଶ୍ୱର ଟୁଡୁ ପ୍ରମୁଖ ଯୋଗ ଦେଇଥିଲେ ।

ଅଧିକ ପଢନ୍ତୁ ଓଡ଼ିଶା ଖବର