ଅର୍ଗସ ବ୍ୟୁରୋ: ଦିନ ଥିଲା ବେଶ ଚଳଚଞ୍ଚଳ ଥିଲା ବ୍ରହ୍ମୁପୁରର ଏହି ଶିଳ୍ପାଞ୍ଚଳ । କାମ କରୁଥିଲେ ହଜାର ହଜାର କୁଶଳୀ ଶ୍ରମିକ ହେଲେ ଏବେ ଚାରି ଆଡେ ଖାଁ ଖାଁ । ଯେଉଁଠି ହ୍ୟାଣ୍ଡଲୁମ କାରଖାନା ଥିଲା ସେଠି ବଣ ବୁଦା ଜଙ୍ଗଲ । 50ରୁ ଉର୍ଦ୍ଦ ଶିଳ୍ପ ଗଢି ଉଠିଥିଲା ଏହି ଶିଳ୍ପାଞ୍ଚଳରେ । ହାତ ଘଣ୍ଟା କାରଖାନାରୁ ନେଇ ସୁତାରେ ରଙ୍ଗଦିଆ ଶିଳ୍ପ, ବରଫ କଳ, ବିଭିନ୍ନ ତେଲ କାରଖାନା, କାଚ କାରଖାନା, ଔଷଧୀୟ କାରଖାନା ଚାଲୁଥିଲା ଏହି ଶିଳ୍ପାଞ୍ଚଳରେ । ଏବେ କେଉଁଠି ତାଲା ଝୁଲୁଛି ତ ଆଉ କେଉଁଠି ଅସମାଜିକ ଲୋକଙ୍କ ଆଡ୍ଡା ପାଲଟିଛି । ହାତ ଗଣତି 4- 5 ଟି ଶିଳ୍ପ ମରି ମରି ବଞ୍ଚିଛି ।

ପୂର୍ବତନ ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମର ଏହି ଶିଳ୍ପାଞ୍ଚଳର ଦୁରାବସ୍ଥାକୁ ନେଇ ପ୍ରଶ୍ନ ଉଠାଇଛନ୍ତି ସ୍ଥାନୀୟ ଲୋକ । 24 ବର୍ଷର ସ୍ଥିର ସରକାର ରହିବା ପରେ ବି ପୁନରଉଦ୍ଦାର ହୋଇପାରିଲାନି ଏଠାକାର କ୍ଷୁଦ୍ର ଓ ମଧ୍ୟମ ଶିଳ୍ପ । ସରକାରୀ ତଥ୍ୟ କହୁଛି ଗଞ୍ଜାମରୁ ସବୁଠୁ ଅଧିକ ଶ୍ରମିକି ଦାଦନ ଖଟିବାକୁ ସୁରଟ ଯାଉଛନ୍ତି । କରୋନା ବେଳେ ରାଜ୍ୟକୁ ଫେରିଥିବା ମୋଟ 10 ଲକ୍ଷ 7 ହଜାର ଶ୍ରମିକରୁ କେବଳ ଗଞ୍ଜାମର ଥିଲେ ଅଧାରୁ ଅଧିକ । ଏମାନଙ୍କୁ କାମ ଦେବେ ବୋଲି କହିଥିଲେ ପୂର୍ବ ସରକାର । ଏହି ଶିଳ୍ପାଞ୍ଚଳରେ ଥିବା ଶିଳ୍ପ କାର୍ଯ୍ୟକ୍ଷମ ହୋଇଥିଲେ ଅନେକ ଶ୍ରମିକ କାମ ପାଇଥାନ୍ତେ । ହେଲେ ନବୀନ ବାବୁ ନା ଏ ଶିଳ୍ପର ପୁନରଉଦ୍ଦାର କଲେ ନା ଶ୍ରମିକଙ୍କ କାମ ଦେଲେ ।

1981ମସିହା ରେ ପ୍ରତିଷ୍ଠା ହୋଇଥିଲା ଏହି ଶିଳ୍ପାଞ୍ଚଳର । 13 ଏକର ରୁ ଅଧିକ ଜମିରେ ଥିଲା 54 ଟି ସେଡ । ଏବେ ସରକାର ବଦଳିଛି ଗୋପାଳପୁର ନିର୍ବାଚନମଣ୍ଡଳୀରେ ଥିବା ଏହି ଶିଳ୍ପାଞ୍ଚଳର ପୁନରଉଦ୍ଦାର ପାଇଁ ଯୋଜନା ପ୍ରସ୍ତୁତ ହୋଇଛି ବୋଲି କହିଛନ୍ତି ଏଠାକାର ବିଧାୟକ ତଥା ବାଣିଜ୍ୟ ଓ ପରିବହନ ମନ୍ତ୍ରୀ ବିଭୁତି ଭୂଷଣ ଜେନା ।

କେବଳ ବ୍ରହ୍ମପୁରର ଏହି ଶିଳ୍ପଞ୍ଚଳର ବନ୍ଦ ଶିଳ୍ପ ନୁହେଁ ପୁରା ରାଜ୍ୟରେ ଏମିତି 15 ହଜାର 315 କ୍ଷୁଦ୍ର ଓ ମଧ୍ୟମ ଶିଳ୍ପ ବନ୍ଦ ହୋଇଯାଇଛି । 15 ଟି ବଡ ଶିଳ୍ପରେ ବି ଝୁଲୁଛି ତାଲା । ଏବେ ନୂଆ ସରକାର ପାଖରେ ଶିଳ୍ପାୟନ ଓ ରୋଜଗାରର ଆହ୍ବାନ । 100 ଦିନର ସରକାର ଏହା ଭିତରେ 45 ହଜାର କୋଟିର ନିବେଶ ଆଣିଛନ୍ତି ବୋଲି କହୁଛନ୍ତି । ଏବେ ନଜର ପୂର୍ବ ସରକାର ସମୟରେ ବନ୍ଦ ହୋଇପଡିଥିବା ଶିଳ୍ପର ପୁନର ଉଦ୍ଦାର କରି ରାଜ୍ୟ ବାହାରେ ଦାଦନ ଖଟୁଥିବା ଶ୍ରମିକଙ୍କୁ ରାଜ୍ୟ ଭିତରେ କାମ ଦେବେ କି ନୂଆ ସରକାର ।

ଅଧିକ ପଢନ୍ତୁ ଓଡିଶା ଖବର...

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV