ଅର୍ଗସ ବ୍ୟୁରୋ:  ଆନ୍ତଃରାଜ୍ୟ ସୁବର୍ଣ୍ଣରେଖା ବୃହତ୍ ଜଳସେଚନ ପ୍ରକଳ୍ପ । ବିଶ୍ବ ବ୍ୟାଙ୍କ ସହାୟତାରେ ୧୯୮୨-୮୩ ମସିହାରୁ ଆରମ୍ଭ ହୋଇଥିଲା ପ୍ରାରମ୍ଭିକ କାର୍ଯ୍ୟ। ଏହି ପ୍ରକଳ୍ପ ମାଧ୍ୟମରେ ମୟୂରଭଞ୍ଜ ଓ ବାଲେଶ୍ଵର ଜିଲ୍ଲାର 1,09, 627 ହେକ୍ଟର ଚାଷ ଜମିକୁ ଜଳସେଚିତ କରାଯିବାର ଲକ୍ଷ୍ୟ ଧାର୍ଯ୍ୟ ହୋଇଥିଲା । ନବୀନ ସରକାରର 25 ବର୍ଷ ଭିତରେ ଏହି ପ୍ରକଳ୍ପର 4-4 ଥର ଲୋକାର୍ପଣ ହେଲାଣି। କିନ୍ତୁ ସରୁନି ପ୍ରକଳ୍ପ କାମ। ଏ ନେଇ ବାରିପଦା ଜନସଭାରେ ଉଦବେଗ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। 

ଅବିଭକ୍ତ ବିହାର (ବର୍ତ୍ତମାନର ଝାଡ଼ଖଣ୍ଡ), ପଶ୍ଚିମବଙ୍ଗ ଏବଂ ଓଡିଶା ମଧ୍ୟରେ ତ୍ରିପାକ୍ଷିକ ଚୁକ୍ତି ସ୍ବାକ୍ଷର କରାଯାଇ ଏହି ପ୍ରକଳ୍ପର ଆରମ୍ଭ କରାଯାଇଥିଲା । ସୁବର୍ଣ୍ଣରେଖା ନଦୀ ଜଳକୁ ତିନିଟି ରାଜ୍ୟ ନିଜର ଅଂଶ ଅନୁସାରେ ଉପଯୋଗ କରିବା ପାଇଁ ଚୁକ୍ତି ହୋଇଥିଲା । ଝାଡ଼ଖଣ୍ଡ ଗାଲୁଡିହ ବନ୍ଧରୁ କେନାଲ ଯୋଗେ ପାଣି ଅଣାଯାଇ ମୟୂରଭଞ୍ଜ ଜିଲ୍ଲାର ହଳଦିଆ ଜଳଭଣ୍ଡାର, ଜମ୍ଭୀରା ଜଳଭଣ୍ଡାର ଓ ବାଉରା ଜଳଭଣ୍ଡାରରେ ଗଚ୍ଛିତ ରଖାଯାଇ ଶାଖା କେନାଲ ମାଧ୍ୟମରେ ଏହାକୁ ଚାଷକାମରେ ବ୍ୟବହାର ପାଇଁ ଉପଯୋଗର ବ୍ୟବସ୍ଥା ହୋଇଥିଲା ।  

୨୦୧୭-୧୮ ଆର୍ଥିକ ବର୍ଷର ଜୁନ୍ ଶେଷ ସୁଦ୍ଧା ଏହି ପ୍ରକଳ୍ପରେ ରାଜ୍ୟ ସରକାର, ନାବାର୍ଡ ଓ ଏଆଇବିପି ପକ୍ଷରୁ ମୋଟ ୩୯୧୫ କୋଟି ଟଙ୍କା ଖର୍ଚ୍ଚ ହୋଇସାରିଛି। ଗୋଟିଏ ପଟେ ପ୍ରକଳ୍ପ ଖର୍ଚ୍ଚ ବଢ଼ିବାରେ ଲାଗିଛି । ଅନ୍ୟପଟେ କେବଳ ଖରିଫ ଋତୁରେ ଅଳ୍ପ କିଛି ସ୍ଥାନରେ ଜମିକୁ ପାଣି ମାଡୁଥିବାବେଳେ ରବି ଋତୁରେ ପାଣି ମିଳେନାହିଁ । ଏବେ ମୋଦି ପ୍ରତିଶ୍ରୁତି ଦେଇଛନ୍ତି ବିଜେପି ସରକାର ଆସିଲେ ଏହି ପ୍ରକଳ୍ପ ତୁରନ୍ତ ସମ୍ପୂର୍ଣ୍ଣ କରିବାକୁ ବ୍ୟବସ୍ଥା କରାଯିବ। 

ଭବିଷ୍ୟତକୁ ନଜରରେ ରଖି ଡ୍ୟାମ୍ ଓ କେନାଲ ପାଇଁ ଜମି ଦେଇଥିବା ଶତାଧିକ ଚାଷୀ ଆଖି ବୁଜିଲେଣି । ହେଲେ ଆଜି ପର୍ଯ୍ୟନ୍ତ କେବଳ କାମ ହିଁ ଚାଲିଛି କିନ୍ତୁ କେନାଲରେ ପାଣିର ଦର୍ଶନ ନାହିଁ । ଏବେ ମୋଦିଙ୍କ ପ୍ରତିଶ୍ରୁତି ପରେ ଚାଷୀଙ୍କ ମନରେ ସୃଷ୍ଟି ହୋଇଛି ଆଶା।

ଆହୁରି ପଢନ୍ତୁ ରାଜନୀତି ଖବର...