ଅର୍ଗସ ବ୍ୟୁରୋ : ପାଖଉଛି ନିର୍ବାଚନ, ଅଧୈର୍ଯ୍ୟ ହେଲେଣି ବିଜେଡି ଆଶାୟୀ । । ଏବେଠୁ ସରଗରମ ନିର୍ବାଚନ ମଣ୍ଡଳୀ । ନିଜନିଜ ପତିଆରା ଜାହିର କରିବା ପାଇଁ ଆରମ୍ଭ ହୋଇଯାଇଛି ଶକ୍ତି ପ୍ରଦର୍ଶନ । ନିର୍ବାଚନ ଯେତିକି ପାଖଉଛି ଜଗତସିଂହପୁର ନିର୍ବାଚନ ମଣ୍ଡଳୀରେ ବିଜେଡ଼ି ଗୋଷ୍ଠୀ କନ୍ଦଳ ସେତେ ଉଗ୍ର ହେବାରେ ଲାଗିଛି । ଦଳୀୟ ଟିକେଟ ପାଇଁ ଆରମ୍ଭ ହୋଇଯାଇଛି ଲଢେଇ ।

ଏପଟେ ଦମ ଦେଖାଇଛନ୍ତି ଜଗତସିଂହପୁର ବିଜେଡି ନେତା ଅମରେନ୍ଦ୍ର ଦାସ । ଖାଲି ଦମ ଦେଖାଇନାହାନ୍ତି ୨୦୨୪ ସାଧାରଣ ନିର୍ବାଚନ ପାଇଁ ବିଜେଡି ଏକ ପ୍ରମୁଖ ଦାବିଦାର ବୋଲି କହିଛନ୍ତି । ହଜାର ହଜାର ଯୁବକ, ମହିଳା ମାନଙ୍କୁ ନେଇ ବିରାଟ ଶୋଭାଯାତ୍ରା କରିଥିଲେ । ଆଉ କଥା ବାଣରେ ଘାଇଲା କରିଥିଲେ ବିଜେଡି ବିଧାୟକ ପ୍ରଶାନ୍ତ ମୁଦୁଲିଙ୍କୁ । ବିଜେଡ଼ି ନେତାଙ୍କ ପ୍ରଚାର ପ୍ରସାର ପାଇଁ ଏବେ ଅର୍ପଣ ରଥ ସାଜିଛି ସାହାରା । ଆଉ କିଏ ନୂଆବର୍ଷ ବନ୍ଧୁମିଳନ ବାହାନାରେ ଶକ୍ତି ପ୍ରଦର୍ଶନ କରୁଥିବା ଦେଖିବାକୁ ମିଳିଛି ।

ନାଁ ନ ନେଇ ପାଞ୍ଚ ବର୍ଷ ଭିତରେ ଜଗତସିଂହପୁରର କୌଣସି ଉନ୍ନତି କରାଯାଇନାହିଁ ବୋଲି କହିଛନ୍ତି ଅମରେନ୍ଦ୍ର । ବନ୍ୟା ସମୟରେ ଲୋକେ ପାଣି ଘେରରେ ଥିବାବେଳେ ବିଜେଡ଼ି ବିଧାୟକ ପଇସା ଆଦାୟ କରିବାରେ ବ୍ୟବସ୍ଥ ରହିଲେ । ସାଧାରଣ ଲୋକଙ୍କ ପାଖକୁ ଗଲେ ନାହିଁ । ଏପରି ଅନେକ କଥା କହିଛନ୍ତି ।

ଜଗତସିଂହପୁର ନିର୍ବାଚନ ମଣ୍ଡଳୀରେ ଦେଖିବାକୁ ମିଳିଛି ବିଧାୟକ ବିରୋଧୀ ମେଳି । ଜଗତସିଂହପୁରରେ ଟିକେଟ୍ କଳି ଏବେ ଉଗ୍ର ରୂପ ନେଇଛି । ବିଧାୟକ ପ୍ରଶାନ୍ତ ମୁଦୁଲି ଓ ପୂର୍ବତନ ବିଜେଡି ଜିଲ୍ଲା ସଭାପତି ଅମରେନ୍ଦ୍ର ଦାସ ମୁହାଁମୁହିଁ । ୨୦୧୯ରେ ଅମରେନ୍ଦ୍ରଙ୍କ ଟିକେଟ୍ କଟିଥିଲା । ଏଥର କିନ୍ତୁ ସେ ନଛୋଡବନ୍ଧା । ରକ୍ତମୁଖା ଅମରେନ୍ଦ୍ର ସିଧାସଳଖ ବିଜେଡ଼ି ବିଧାୟକଙ୍କ କାର୍ଯ୍ୟଧାରାକୁ ବିରୋଧ କରିଛନ୍ତି । ଆଉ କହୁକହୁ ଖୋଲିଦେଲେ ବିଜେଡ଼ିର ଗୁମର । ଅମରେନ୍ଦ୍ର ଆଜି ବିରାଟ ରାଲିକରି ଜଗତସିଂହପୁର ପାଣିପାଗକୁ ସରଗରମ କରିଦେଇଛନ୍ତି । ଏବେ ଦେଖିବାକୁ ବାକି ରହିଲା ଜଗତସିଂହପୁର ରାଜନୀତି କୁଆଡକୁ ଗତିକରୁଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV