DJ Sound Pollution / ଡିଜେ ନୁହେଁ ଡେଥ୍ ମେସିନ୍‌, ଜୀବନ ନେଉଛି ଡିଜେର ବିକଟାଳ ଶବ୍ଦ

ଗତକାଲି ରାତିରେ ଖୋର୍ଦ୍ଧା ଜିଲ୍ଲା ଜଟଣୀରେ ସମୂହ ଗଣେଶ ଭଷାଣି ଅବସରରେ ଘଟିଛି ଏକ ବଡ଼ଧରଣର ଅଘଟଣ । ଭଷାଣିରେ ବାଜୁଥିବା ଡିଜେର ଭୟଙ୍କର ଶବ୍ଦ ଓ କମ୍ପନ ଯୋଗୁଁ ଏକ କୋଠା ଛାତ ଭୁଶୁଡ଼ି ପଡ଼ିବାରୁ ଜଣଙ୍କର ମୃତ୍ୟୁ ହୋଇଥିବାବେଳେ ଅନେକ ଆହତ ହୋଇଛନ୍ତି । ପୂଜା ପୂର୍ବରୁ କମିଶନରେଟ ପୋଲିସ ପକ୍ଷରୁ ଡିଜେ ବାରଣ କରାଯାଇଥିଲେ ମଧ୍ୟ ଏହା କିଭଳି ବାଜିଲା, ତାକୁ ନେଇ ଏବେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି ।

ରବିବାର ରାତିରେ ଜଟଣୀରେ ଚାଲିଥିଲା ଗଣେଶ ପୂଜା ଭଷାଣି । ଏହି ସମୟରେ ପଞ୍ଜାବ ନ୍ୟାସନାଲ ବ୍ୟାଙ୍କ୍ ଉପର ଘରର ଛାତ ଭାଙ୍ଗି ପଡିଥିଲା । ଆଉ ପଡିଥିଲା ଭଷାଣି ଦେଖୁଥିବା ଦର୍ଶକଙ୍କ ଉପରେ । ଏହି ଦୁର୍ଘଟଣାରେ ହରିରାଜପୁର ଗ୍ରାମର ବିଶ୍ୱଜିତ ବାରିକଙ୍କର ମୃତ୍ୟୁ ହୋଇଛି । ଏହାସହ ୭ ଜଣ ଗୁରୁତର ଆହତ ହୋଇ ଚିକିତ୍ସିତ ହେଉଛନ୍ତି । ତେବେ ଅତ୍ୟଧିକ ଡିଜେ ସାଉଣ୍ଡ ପାଇଁ ଛାତର କଂକ୍ରିଟ ତାଜା ଭୁଶୁଡିଥିବା ଅଭିଯୋଗ ହୋଇଛି । ଘଟଣାସ୍ଥଳରେ ଡିସିପି ଓ ଅତିରିକ୍ତ କମିଶନର ପ୍ରମୁଖ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି ।

ଶବ୍ଦ ପ୍ରଦୂଷଣ ଭିତରେ ମୁଖ୍ୟ ମେସିନ ଏବେ ଡିଜେ । ମଣିଷ ପାଇଁ ସାଧାରଣ ଏବଂ ନିରାପଦ ଶବ୍ଦ ସୀମା ୭୦ ଡେସିବଲ୍ । ଏହାଠାରୁ ଅଧିକ ଶବ୍ଦ ଦୀର୍ଘ ସମୟ ପର୍ଯ୍ୟନ୍ତ ଶୁଣିଲେ ଶ୍ରବଣ ଶକ୍ତି ଉପରେ କୁପ୍ରଭାବ ପଡ଼େ । ସାଧାରଣତଃ ବିବାହ, ପର୍ବପର୍ବାଣୀ କିମ୍ବା ବିଭିନ୍ନ ଉତ୍ସବରେ ବ୍ୟବହାର ହେଉଥିବା ଡିଜେ ସାଉଣ୍ଡ ସିଷ୍ଟମର ଶବ୍ଦ ମାତ୍ରା ୧୦୦ ରୁ ୧୨୦ ଡେସିବଲ୍ ବା ତାହାଠାରୁ ମଧ୍ୟ ଅଧିକ ହୋଇଥାଏ । ଯାହା ନିର୍ଦ୍ଧାରିତ ସୀମାଠାରୁ ବହୁଗୁଣ ଅଧିକ । ମଣିଷର କାନ ପ୍ରାୟ ୮୫ ଡେସିବଲ୍ ପର୍ଯ୍ୟନ୍ତ ଶବ୍ଦ ଏକ ନିର୍ଦ୍ଦିଷ୍ଟ ସମୟ ଯାଏଁ ସହ୍ୟ କରିପାରେ । କିନ୍ତୁ ଯେତେବେଳେ ଶବ୍ଦ ୧୨୦ ଡେସିବଲ୍ ଅତିକ୍ରମ କରେ, ସେତେବେଳେ କାନରେ ଯନ୍ତ୍ରଣା ଅନୁଭବ ହୁଏ ଏବଂ ଏହା କାନର ପରଦାକୁ ତତକ୍ଷଣାତ୍ କ୍ଷତି ପହଞ୍ଚାଇପାରେ । ଡିଜେର ପ୍ରଚଣ୍ଡ ଶବ୍ଦରେ ଦୀର୍ଘ ସମୟ ଧରି ରହିଲେ କାନର ସମ୍ବେଦନଶୀଳ କୋଷଗୁଡ଼ିକ ସବୁଦିନ ପାଇଁ ନଷ୍ଟ ହୋଇଯାଏ । ଯାହାଫଳରେ ବ୍ୟକ୍ତିଜଣକ ଆଂଶିକ ବା ସମ୍ପୂର୍ଣ୍ଣ ଭାବେ ବଧିର ହୋଇପାରନ୍ତି ।

ଶବ୍ଦ ପ୍ରଦୂଷଣ ରୋକିବାକୁ ସୁପ୍ରିମକୋର୍ଟ ଏବଂ ପ୍ରଦୂଷଣ ନିୟନ୍ତ୍ରଣ ବୋର୍ଡଙ୍କ କଡ଼ା ନିୟମ ରହିଛି । ବିନା ଅନୁମତିରେ ବା ରାତି ୧୦ଟା ପରେ ଡିଜେ ବଜାଇବା ଆଇନଗତ ଭାବେ ଦଣ୍ଡନୀୟ । ଜରିମାନା ସହିତ ଜେଲ୍ ଦଣ୍ଡ ମଧ୍ୟ ହୋଇପାରେ । ରାଜ୍ୟରେ ଡିଜେ ଉପରେ କଡ଼ା କଟକଣା ଲାଗିଛି । ମାତ୍ର ସୁପ୍ରିମକୋର୍ଟ ଏବଂ ପ୍ରଦୂଷଣ ନିୟନ୍ତ୍ରଣ ବୋର୍ଡଙ୍କ କଡ଼ା ନିୟମ ସତ୍ତ୍ୱେ ରାଜ୍ୟରେ ବିନା ଅନୁମତିରେ ଡିଜେ ବାଜୁଛି କେମିତି ? ରାତି ୧୦ଟା ପରେ ଡିଜେ ବଜାଇବା ଆଇନଗତ ଭାବେ ଦଣ୍ଡନୀୟ ଥିଲେ ମଧ୍ୟ ପ୍ରଶାସନ ପକ୍ଷରୁ କଡ଼ା କାର୍ଯ୍ୟାନୁଷ୍ଠାନ କାହିଁକି ନିଆଯାଉ ନାହିଁ ? ଡିଜେ ଶବ୍ଦ ପ୍ରଦୂଷଣକୁ ନେଇ ଏଭଳି ବିଭିନ୍ନ ପ୍ରଶ୍ନ ଏବେ ପୁଣି ଚିନ୍ତାର କାରଣ ସାଜିଛି ।