Bangalore Nuakhai Celebration / ବାଙ୍ଗାଲୋରରେ ମା' ସମଲେଶ୍ଵରୀଙ୍କ ସ୍ଵତନ୍ତ୍ର ମନ୍ଦିର; ଜୁହାର ପରିବାରର ନୂଆଁଖାଇ ଭେଟଘାଟରେ ଘୋଷଣା

ବାଙ୍ଗାଲୋର: ମାଟିଠାରୁ ଦୂରରେ ରହିଲେ ବି ମନରେ ରହିଛି ନିଜ ମାଟିର ମହକ । ନିଜ ରାଜ୍ୟ ଓଡ଼ିଶାଠାରୁ ଦୂରରେ କର୍ଣ୍ଣାଟକର ବାଙ୍ଗାଲୋରରେ ଏକାଠି ହୋଇ ନୂଆଁଖାଇ ପାଳନ କରିଛନ୍ତି ପ୍ରବାସୀ ଓଡ଼ିଆ । ଚଳିତ ବର୍ଷ ମଧ୍ୟ ପାରମ୍ପରିକ ରୀତିନୀତି, ଭାଇଚାରା ଓ ଉତ୍ସାହର ସହ ଆୟୋଜିତ ହୋଇଛି 'ଜୁହାର ପରିବାର ବାଙ୍ଗାଲୋର'ର ୨୭ତମ ନୂଆଁଖାଇ ଭେଟଘାଟ-୨୦୨୬ ।

ପ୍ରଥମେ ମା’ ସମଲେଶ୍ୱରୀଙ୍କ ନିକଟରେ ପାରମ୍ପରିକ ରୀତିନୀତି ଅନୁସାରେ ପୂଜାର୍ଚ୍ଚନା କରାଯିବା ପରେ ଭେଟଘାଟ କାର୍ଯ୍ୟକ୍ରମ ଆରମ୍ଭ ହୋଇଥିଲା । ନିଜ ମାଟିର ପରମ୍ପରା ଓ ସଂସ୍କୃତିକୁ ମନେ ପକାଇ ପ୍ରବାସୀ ଓଡ଼ିଆମାନେ ଏହି ଉତ୍ସବରେ ସାମିଲ ହୋଇଥିଲେ । ଏହାସହିତ ବାଙ୍ଗାଲୋରରେ ମା' ସମଲେଶ୍ଵରୀ ମନ୍ଦିର ନିର୍ମାଣ ପାଇଁ ମଧ୍ୟ ନିଷ୍ପତ୍ତି ହୋଇଛି । ଏହି କାର୍ଯ୍ୟକ୍ରମରେ ବାଙ୍ଗାଲୋର ସେଣ୍ଟ୍ରାଲର ଲୋକସଭା ସାଂସଦ ପି.ସି. ମୋହନ ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ସମାଜସେବୀ ସନ୍ଦୀପ ପଟ୍ଟନାୟକ, ବରିଷ୍ଠ ସାମ୍ବାଦିକ ବିରାଜ କୁମାର ମିଶ୍ର ଓ ସମାଜସେବୀ ଶୈଳେଶ ଦାନି ସମ୍ମାନିତ ଅତିଥି ଭାବେ ଉପସ୍ଥିତ ଥିଲେ।

• ନୂଆଁଖାଇରେ ସାମିଲ ହେଲେ ସ୍ଥାନୀୟ ସାଂସଦ

ମୁଖ୍ୟ ଅତିଥି ପି.ସି. ମୋହନ ଉପସ୍ଥିତ ସମସ୍ତଙ୍କୁ ନୂଆଁଖାଇର ଶୁଭେଚ୍ଛା ଜଣାଇଥିଲେ । ସେ କହିଥିଲେ, "୨୦୦୯ ମସିହାରୁ ନିରନ୍ତର ଏହି କାର୍ଯ୍ୟକ୍ରମରେ ଯୋଗଦେଇ ଆସୁଛି । ନୂଆଁଖାଇ ଏକ କୃଷିଭିତ୍ତିକ ପର୍ବ ହୋଇଥିବା ବେଳେ ବାଙ୍ଗାଲୋରରେ ରହୁଥିବା ଓଡ଼ିଆମାନେ ସ୍ଥାନୀୟ ସଂସ୍କୃତି ସହ ସମନ୍ୱୟ ରଖି ନିଜ ଅଞ୍ଚଳର ପରମ୍ପରାକୁ ଜୀବନ୍ତ ରଖିବା ଏକ ଉଲ୍ଲେଖନୀୟ ସଫଳତା ।" ମା’ ସମଲେଶ୍ୱରୀଙ୍କ ଆଶୀର୍ବାଦରୁ ଏହି ପରମ୍ପରା ଆଗକୁ ମଧ୍ୟ ଜାରି ରହୁ ବୋଲି ସେ କାମନା କରିଥିଲେ।

• ବାଙ୍ଗାଲୋରରେ ନିର୍ମାଣ ହେବ ସମଲେଶ୍ବରୀ ମନ୍ଦିର

ଏହି ଅବସରରେ ସମାଜସେବୀ ସନ୍ଦୀପ ପଟ୍ଟନାୟକ ବାଙ୍ଗାଲୋରରେ ମା’ ସମଲେଶ୍ୱରୀଙ୍କ ମନ୍ଦିର ନିର୍ମାଣ ପାଇଁ ୧୧ ଲକ୍ଷ ଟଙ୍କା ପ୍ରଦାନ କରିବାକୁ ଘୋଷଣା କରିଥିଲେ । ସୁଦୂର ବାଙ୍ଗାଲୋରରେ ଏକାଠି ହୋଇ ନୂଆଁଖାଇ ପାଳନ କରିବା ପଶ୍ଚିମ ଓଡ଼ିଶାର ସମୃଦ୍ଧ ସାଂସ୍କୃତିକ ପରମ୍ପରା ଓ ଏକତାର ପ୍ରତୀକ ବୋଲି ସେ କହିଥିଲେ ।

ପଢନ୍ତୁ ଏହି ଖବର: ଭକ୍ତିରେ ଭିଜିଲା ବାହାରିନ; ଧୁମଧାମରେ ଗଣେଶ ପୂଜା ପାଳିଲା ବାହାରିନ ଓଡ଼ିଆ ସମାଜ

ସେହିପରି ବରିଷ୍ଠ ସାମ୍ବାଦିକ ବିରାଜ କୁମାର ମିଶ୍ର ନୂଆଁଖାଇକୁ କେବଳ ଏକ କୃଷିଭିତ୍ତିକ ପର୍ବ ନୁହେଁ, ବରଂ ପଶ୍ଚିମ ଓଡ଼ିଶାର ଭାଇଚାରା, ସମୃଦ୍ଧ ସଂସ୍କୃତି ଓ ପରମ୍ପରାର ପ୍ରତୀକ ବୋଲି ଅଭିହିତ କରିଥିଲେ । ରାଜ୍ୟ ବାହାରେ ଏତେ ବଡ଼ ଆୟୋଜନକୁ ଶୃଙ୍ଖଳିତ ଭାବେ ସମ୍ପନ୍ନ କରିବା ଏକ ବଡ଼ ସଫଳତା ବୋଲି ସେ ମତ ଦେଇଥିଲେ । ଏହି ଅବସରରେ ମାନସ ରଞ୍ଜନ ମିଶ୍ର ଉଦଘୋଷକ ଦାୟିତ୍ୱ ତୁଲାଇ ଥିବାବେଳେ ସ୍ମରଣିକା ଓ ପ୍ରିୟା ସହଯୋଗ କରିଥିଲେ । ବଲାଙ୍ଗିର ଦୁଲଫୁଲ ଦଳ, ଏକାଗ୍ର ସ୍ୱରସା ଏକାଡେମୀ, ମମତା ଓ ବିନିଶା, ନିଭିଶିକା ଓ ତନିଷ୍କା ସମ୍ବଲପୁରୀ ଲୋକ ନୃତ୍ୟ ପରିବେଷଣ କରିଥିଲେ । ସମଲେଇ ଭଜନ ପ୍ରସନ୍ନ ପାଢ଼ୀ ପରିବେଷଣ କରିଥିଲେ । ସୁରେଖା ମେହେର ସମ୍ବଲପୁରୀ ଗୀତ ପରିବେଷଣ କରିଥିଲେ ।

• ରୁକୁ ସୁନାଙ୍କ ଗୀତରେ କମ୍ପିଲା ବାଙ୍ଗାଲୋର

ଯୋଗେଶ ଜୋଜୋଙ୍କ କମେଡି ସହିତ ଲୋକପ୍ରିୟ ସମ୍ବଲପୁରୀ ଗାୟକ ରୁକୁ ସୁନା, ଜୟଶ୍ରୀ ଷଡ଼ଙ୍ଗୀ, ସଞ୍ଜୁ ମହାନ୍ତି, ସମ୍ବଲପୁରୀ ରାପର୍ ଆଲେକ୍ସ ବାବା ଓ ଗ୍ରୁପ୍ ଦର୍ଶକମାନଙ୍କୁ ଝୁମାଇ ଦେଇଥିଲେ । ସନ୍ଦିପ୍ତ ଓ ଚନ୍ଦନ ମେହେରଙ୍କ ନେତୃତ୍ୱ ବିୟୁ ମଡେଲ ଓ ତୋସନି ଫେସନ୍ ଅନୁଷ୍ଠାନର ସହଯୋଗରେ ସମ୍ବଲପୁରୀ ଫେଶନ ସୋ' ଆୟୋଜିତ ହୋଇଥିଲା । ଏହି ଅବସରରେ ସମ୍ବଲପୁରରୁ ଆସିଥିବା ମଧୁଙ୍କ ଦ୍ଵାରା ପ୍ରସ୍ତୁତ ପାରମ୍ପରିକ ସମ୍ବଲପୁରୀ ଖାଦ୍ୟ ଯଥା ଚାଉଳ ବରା, ଆରିସା ପିଠା, ମାଲପୁଆ, ଆମ୍ବିଳ, ଘାଣ୍ଟ, ରସ ବରା ଆଦି ବିଭିନ୍ନ ଖାଦ୍ୟପେୟ ଗୁଡ଼ିକର ମଜା ନେଇଥିଲେ।

• ସାମିଲ ହେଲେ ୫୦୦୦ ଲୋକ

କାର୍ଯ୍ୟକ୍ରମରେ ରାଜନେତା, ପ୍ରଶାସକ, ଶିକ୍ଷାବିତ, ସଂସ୍କୃତିପ୍ରେମୀଙ୍କ ସମେତ ୫ ହଜାରରୁ ଅଧିକ ଲୋକ ଯୋଗ ଦେଇଥିଲେ । କାର୍ଯ୍ୟକ୍ରମ ଆୟୋଜନରେ ସଭାପତି ଶୋଭନ ଦାଶ, ଉପ ସଭାପତି ପ୍ରିୟା ନାୟକ, ସାଧାରଣ ସମ୍ପାଦକ ସତ୍ୟଜିତ୍ ଚଇନି, କୋଷାଧ୍ୟକ୍ଷ ଅନିଲ କୁମାର ଦାଶ, ସହକୋଷାଧ୍ୟକ୍ଷ ମଳୟ ସାହୁ, ପ୍ରତିଷ୍ଠାତା ସଦସ୍ୟ ବିଶ୍ୱଜିତ୍ ପ୍ରଧାନ, ପୀତାମ୍ବର ପରିଚ୍ଛା, ପ୍ରଭାତ ମିଶ୍ର, ସିଞ୍ଚାନ ମିଶ୍ର, ସଚ୍ଚିଦାନନ୍ଦ କର, ଗଣମାଧ୍ୟମ ସଂଯୋଜକ ସୁଦୀପ୍ତ ପଣ୍ଡା, ଚିନ୍ମୟ ଭୋଇ, ଅଂଶୁମାନ ପାତ୍ରଙ୍କ ସମେତ ସମସ୍ତ ସଦସ୍ୟମାନେ ପ୍ରମୁଖ ଭୂମିକା ଗ୍ରହଣ କରିଥିଲେ ।

ନିଜ ଜନ୍ମମାଟିଠାରୁ ଦୂରରେ ରହି ମଧ୍ୟ ଭାଷା, ସଂସ୍କୃତି ଓ ପରମ୍ପରାକୁ ଆପଣାର କରି ରଖିବାର ଏକ ସୁନ୍ଦର ଉଦାହରଣ ପାଲଟିଛି ଜୁହାର ପରିବାର ବାଙ୍ଗାଲୋରର ଏହି ନୂଆଁଖାଇ ଭେଟଘାଟ । ଏହି ଆୟୋଜନ ପ୍ରବାସୀ ଓଡ଼ିଆଙ୍କ ମଧ୍ୟରେ ଏକତା ଓ ଭାଇଚାରାକୁ ଆହୁରି ମଜଭୁତ କରିବା ସହ ଆଗାମୀ ପିଢ଼ି ପାଖରେ ଓଡ଼ିଆ ପରମ୍ପରାକୁ ପହଞ୍ଚାଇବାର ବାର୍ତ୍ତା ଦେଇଛି ।