Leave Cancelled / ଆଜି ରାତିରେ ବାତ୍ୟା 'ମୁରାସୁ'ର ଲ୍ୟାଣ୍ଡଫଲ୍‌; କଳାହାଣ୍ଡିରେ ସମସ୍ତ କର୍ମଚାରୀଙ୍କ ଛୁଟି ବାତିଲ

କଳାହାଣ୍ଡି: ଅର୍ଣ୍ଣବ୍ ବାତ୍ୟା ପରେ, ଡରାଉଛି 'ମୁରାସୁ'। ବଙ୍ଗୋପସାଗରରେ ସୃଷ୍ଟି ହୋଇଥିବା ଭୀଷଣ ବାତ୍ୟା 'ମୁରାସୁ' ବର୍ତ୍ତମାନ ପଶ୍ଚିମ-କେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ରହିଛି । ଆଜି ରାତି ଆନ୍ଧ୍ରପ୍ରଦେଶ ଉପକୂଳର ନେଲୋର ଓ ନରସାପୁର ମଧ୍ୟବର୍ତ୍ତୀ ଅଞ୍ଚଳରେ ଲ୍ୟାଣ୍ଡଫଲ୍ କରିବାକୁ ଯାଉଛି ବାତ୍ୟା ମୁରାସୁ । ଏହାର ପ୍ରଭାବ କଳାହାଣ୍ଡି ଜିଲ୍ଲାରେ କମ୍ ରହିବାର ଆଶଙ୍କା ଥିଲେ ମଧ୍ୟ, ସମ୍ଭାବ୍ୟ ପରିସ୍ଥିତିର ମୁକାବିଲା ପାଇଁ ସମ୍ପୂର୍ଣ୍ଣ ସଜାଗ ଜିଲ୍ଲା ପ୍ରଶାସନ । ସମସ୍ତ ସରକାରୀ କର୍ମଚାରୀଙ୍କ ଛୁଟି ବାତିଲ କରାଯାାଇଛି ।

• କଳାହାଣ୍ଡିରେ ବାତ୍ୟାର ପ୍ରଭାବ ବିଶେଷ ନାହିଁ

ଏହାସହ ଆସନ୍ତାକାଲି ଅର୍ଥାତ୍ ନଭେମ୍ବର ୩ ତାରିଖ ପାଇଁ ଜିଲ୍ଲାର ସମସ୍ତ ସ୍କୁଲକୁ ଛୁଟି ଘୋଷଣା କରିଛନ୍ତି କଳାହାଣ୍ଡି ଜିଲ୍ଲାପାଳ ପାୱାର ସଚିନ ପ୍ରକାଶ । ବନ୍ୟା ଓ ଭୂସ୍ଖଳନକୁ ଦୃଷ୍ଟିରେ ରଖି ଜିଲ୍ଲାର ୧୧୭ଟି ସମ୍ବେଦନଶୀଳ ଗାଁ ଉପରେ ସ୍ୱତନ୍ତ୍ର ନଜର ରଖାଯାଇଛି । ବାତ୍ୟା ମୁରାସୁ ପାଇଁ କଳାହାଣ୍ଡି ଜିଲ୍ଲାକୁ ଏବେ ଗ୍ରୀନ୍ ୱାର୍ଣ୍ଣିଂ ରହିଛି । ହାତୀ ଓ ତେଲ ନଦୀ କୂଳରେ ଥିବା ଜୁନାଗଡ଼, କଳାମପୁର ଏବଂ ବେଲଖଣ୍ଡି ଭଳି ତଳିଆ ଅଞ୍ଚଳରେ ଲଗାତାର ମାଇକିଂ କରାଯାଉଛି । ବର୍ଷା ପାଇଁ ବଙ୍କାପଲା ଓ ଦେପୁର ଭଳି ପ୍ରଭାବିତ ଅଞ୍ଚଳରୁ ଲୋକଙ୍କୁ ସୁରକ୍ଷିତ ବହୁମୁଖୀ ଆଶ୍ରୟସ୍ଥଳୀକୁ ସ୍ଥାନାନ୍ତର କାମ ଜାରି ରହିଛି ।

• ଗର୍ଭବତୀ, ରୋଗୀଙ୍କୁ ସ୍ଥାନାନ୍ତର

ସେହିପରି ଥୁଆମୂଳ ରାମପୁର, ଏମ୍. ରାମପୁର, କୋକସରା ଏବଂ ଲାଞ୍ଜିଗଡ଼ ଭଳି ଭୂସ୍ଖଳନ ପ୍ରବଣ ଅଞ୍ଚଳରେ ରାସ୍ତାଘାଟ ସଫା କରିବା ପାଇଁ ପୂର୍ତ୍ତ ଓ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ଜେସିବି ମେସିନ୍ ମୁତୟନ କରାଯାଇଛି । ଅନ୍ୟପଟେ ନଭେମ୍ବର ୧୦ ତାରିଖ ସୁଦ୍ଧା ପ୍ରସବ ତାରିଖ ଥିବା ଗର୍ଭବତୀ ମହିଳାମାନଙ୍କୁ ଚିହ୍ନଟ କରାଯାଇ ସୁରକ୍ଷିତ ଭାବେ ନିକଟସ୍ଥ 'ମାଆ ଗୃହ' କିମ୍ବା ମେଡିକାଲକୁ ସ୍ଥାନାନ୍ତର କରାଯାଉଛି । ଜିଲ୍ଲାର ୧୩ଟି ଅଗ୍ନିଶମ ଟିମ୍‌କୁ ସଜାଗ ରଖାଯିବା ସହ, ଜିଲ୍ଲା ଓ ବ୍ଲକ୍ ସ୍ତରରେ ୨୪ ଘଣ୍ଟିଆ କଣ୍ଟ୍ରୋଲ ରୁମ୍ କାର୍ଯ୍ୟକ୍ଷମ ହୋଇଛି ।

ପଢନ୍ତୁ ଏହି ଖବର: ଆନ୍ଧ୍ର ଉପକୂଳ ଅତିକ୍ରମ କରିବ ବାତ୍ୟା, ଓଡ଼ିଶାରେ ପ୍ରବଳ ବର୍ଷା ସମ୍ଭାବନା

• ଆଜି ରାତିରେ ଲ୍ୟାଣ୍ଡଫଲ୍

ବଙ୍ଗୋପସାଗରରେ ଦାନା ବାନ୍ଧିଥିବା ଭୀଷଣ ବାତ୍ୟା ‘ମୁରାସୁ’ ଏବେ ସ୍ଥଳଭାଗ ଆଡ଼କୁ ମୁହାଁଇଛି । ଗତ ୬ ଘଣ୍ଟା ମଧ୍ୟରେ ଏହା ଘଣ୍ଟାପ୍ରତି ୨୨ କିଲୋମିଟର ବେଗରେ ପଶ୍ଚିମ-ଉତ୍ତରପଶ୍ଚିମ ଦିଗକୁ ଗତି କରୁଛି । ଆନ୍ଧ୍ରପ୍ରଦେଶ ଉପକୂଳର ନେଲୋର ଓ ନରସାପୁର ମଧ୍ୟବର୍ତ୍ତୀ ଅଞ୍ଚଳରେ ଏହା ସ୍ଥଳଭାଗ ଅତିକ୍ରମ କରିବାର ସମ୍ଭାବନା ରହିଛି । ଆଜି ରାତି ସାଢ଼େ ୧୧ଟାରୁ ଆସନ୍ତାକାଲି ଭୋର୍ ୪ଟା ବେଶ୍ ଗୁରୁତ୍ୱପୂର୍ଣ୍ଣ । ଘଣ୍ଟା ପ୍ରତି ପବନର ବେଗ ରହିବ ଘଣ୍ଟାପ୍ରତି ୧୦୦ ରୁ ୧୧୦ ଏବଂ ଝଟକା ପବନ ୧୨୦ କିଲୋମିଟର ପର୍ଯ୍ୟନ୍ତ ରହିପାରେ । ଏହାର ପ୍ରଭାବରେ ଦକ୍ଷିଣ ଓ ପଶ୍ଚିମାଞ୍ଚଳର କିଛି ଜିଲ୍ଲାରେ ପ୍ରବଳ ବର୍ଷା ନେଇ ପାଣିପାଗ ବିଭାଗ ପକ୍ଷରୁ ସତର୍କତା ଜାରି କରାଯାଇଛି।