Kalinga Ghat / କଳିଙ୍ଗା ଘାଟିରେ ଧୋଇଗଲା ଗାର୍ଡୱାଲ, ଅନିର୍ଦ୍ଧିଷ୍ଟ କାଳ ପାଇଁ ବନ୍ଦ ରାସ୍ତା

ଲଗାତାର ବର୍ଷା ଯୋଗୁଁ କଳିଙ୍ଗା ଘାଟିରେ ନିର୍ମାଣାଧୀନ ଗାର୍ଡୱାଲ ଧୋଇଯାଇ ଭୁଶୁଡ଼ି ପଡ଼ିଛି । ଘାଟି ଅଞ୍ଚଳରେ ବର୍ଷା କାରଣରୁ ବିପଦ ଆଶଙ୍କା କରି ପ୍ରଶାସନ ପୂର୍ବରୁ ନେଇଥିବା ସତର୍କତା ଏବେ ସତ ପ୍ରମାଣିତ ହୋଇଛି । ଘଟଣା ପରେ ସୁରକ୍ଷା ଦୃଷ୍ଟିରୁ ଘାଟି ରାସ୍ତାକୁ ଅନିର୍ଦ୍ଧିଷ୍ଟ କାଳ ପାଇଁ ସିଲ୍ କରାଯାଇଛି ।

ତୁହାକୁ ତୁହା ବର୍ଷା ଯୋଗୁଁ ଘାଟିରେ ଚାଲିଥିବା ଗାର୍ଡୱାଲ ନିର୍ମାଣ ସ୍ଥଳରେ ମାଟି ଧସିବା ସହ ଗାର୍ଡୱାଲର ଏକ ବଡ଼ ଅଂଶ ଭୁଶୁଡ଼ି ପଡ଼ିଛି । ଘାଟି ଅଞ୍ଚଳରେ ବର୍ଷା ଯୋଗୁଁ ବିପଦର ଆଶଙ୍କା ଥିବାରୁ ପ୍ରଶାସନ ପକ୍ଷରୁ ସେପ୍ଟେମ୍ବର ୨୩ ଓ ୨୪ ତାରିଖରେ ଦୁଇ ଦିନ ପାଇଁ ଘାଟି ରାସ୍ତାକୁ ଉଭୟ ପାର୍ଶ୍ୱରୁ ବନ୍ଦ କରାଯାଇଥିଲା । ଏହି ସତର୍କତା ଯୋଗୁଁ ବଡ଼ ଧରଣର ଧନଜୀବନ କ୍ଷୟକ୍ଷତିକୁ ଏଡ଼ାଇ ଦିଆଯାଇପାରିଛି ।

ସୂଚନା ଅନୁସାରେ, ପ୍ରାୟ ୨୫ କୋଟି ଟଙ୍କା ବ୍ୟୟରେ ଘାଟିରେ ଗାର୍ଡୱାଲ ନିର୍ମାଣ କାମ ଚାଲିଛି । ତେବେ ଏହି ନିର୍ମାଣାଧୀନ ଗାର୍ଡୱାଲ ପୂର୍ବରୁ ମଧ୍ୟ ଦୁଇଥର ଭାଙ୍ଗିଥିବା ଅଭିଯୋଗ ରହିଛି । ଏବେ ପୁଣି ବଡ଼ ଧରଣର କ୍ଷତି ହେବା ପରେ ନିର୍ମାଣର ଗୁଣବତ୍ତା ନେଇ ପ୍ରଶ୍ନ ଉଠିଛି ।

ଘଟଣା ପରେ ଜିଲ୍ଲା ପ୍ରଶାସନ ଘାଟି ରାସ୍ତାକୁ ଅନିର୍ଦ୍ଧିଷ୍ଟ କାଳ ପାଇଁ ସମ୍ପୂର୍ଣ୍ଣ ନାକାବନ୍ଦୀ କରିଛି । ଘାଟିର ପାଦଦେଶରେ ପୋଲିସ ମୁତୟନ କରାଯାଇ ଯାତାୟାତ ଉପରେ କଡ଼ା ନଜର ରଖାଯାଉଛି । ରାସ୍ତା ସୁରକ୍ଷିତ ହେବା ପର୍ଯ୍ୟନ୍ତ ଲୋକଙ୍କୁ ଘାଟି ଦେଇ ଯାତାୟାତ ନକରିବାକୁ ପ୍ରଶାସନ ପକ୍ଷରୁ ସତର୍କ କରାଯାଇଛି ।

ବର୍ତ୍ତମାନ ଭୁଶୁଡ଼ିଥିବା ଗାର୍ଡୱାଲର ସ୍ଥିତି ଓ ରାସ୍ତାର ସୁରକ୍ଷା ଯାଞ୍ଚ କରାଯାଉଛି । ନିର୍ମାଣ କାମରେ କୌଣସି ତ୍ରୁଟି ରହିଛି କି ନାହିଁ, ତାହା ମଧ୍ୟ ତଦନ୍ତ ପରେ ସ୍ପଷ୍ଟ ହେବ ।
 
ସେପଟେ ମାଲକାନଗିରି କୋରୁକୋଣ୍ଡା ବାୟାପଡା ଘାଟିରେ ଭୂସ୍ଖଳନ... ବାହ୍ୟ ଜଗତରୁ ବିଛିନ୍ନ ହେଲା ୧୮ଟି ଗାଁ । ଗଞ୍ଜାମ ଖଲ୍ଲିକୋଟ ଥାନା ୧୬ ନମ୍ବର ଜାତୀୟ ରାଜପଥ ବଡ଼ ଘାଟି ପାହାଡରୁ ଧସିଲା ପଥର । ବ୍ରହ୍ମପୁର-ଭୁବନେଶ୍ୱର ଯାତାୟତ ଠପ୍ । ଗଗଜପତି ମୋହନା ବ୍ଲକ ବିରିକୋଟ ସାପ ଶିଳା ଘାଟିରେ ପାହାଡ଼ରୁ ରାସ୍ତା ଉପରକୁ ଖସିଲା ପଥର ।  ଗାଡି ଚଳାଚଳ ବନ୍ଦ ।