Tiger Rescue / କରଞ୍ଜିଆରୁ ଉଦ୍ଧାର ମାଈ ବାଘ ଶାବକ ସୁସ୍ଥ

ମୟୂରଭଞ୍ଜ ଜିଲ୍ଲା କରଞ୍ଜିଆ ଅଞ୍ଚଳର ଖପରାଖାଇ ଗାଁରୁ ଉଦ୍ଧାର ହୋଇଥିବା ମାଈ ବାଘ ଶାବକର ସ୍ୱାସ୍ଥ୍ୟାବସ୍ଥାରେ ଉନ୍ନତି ଆସିଛି । ଚିକିତ୍ସା ଓ ନିୟମିତ ଯତ୍ନ ପରେ ଶାବକଟିକୁ ଜଙ୍ଗଲ ମଧ୍ୟରେ ଥିବା ଜମୁନା ଏନକ୍ଲୋଜରରେ ଛଡ଼ାଯାଇଛି । ଏହାକୁ ନେଇ ବନ ବିଭାଗ ଓ ସ୍ଥାନୀୟ ଲୋକଙ୍କ ମଧ୍ୟରେ ଖୁସି ପ୍ରକାଶ ପାଇଛି ।

ଶିମିଳିପାଳ ବ୍ୟାଘ୍ର ସଂରକ୍ଷଣ ପ୍ରକଳ୍ପ ଅଧୀନ କରଞ୍ଜିଆ ବନଖଣ୍ଡର ଠାକୁରମୁଣ୍ଡା ରେଞ୍ଜ ଅନ୍ତର୍ଗତ ଖପରାଖାଇ ଗାଁରୁ ଏହି ବାଘ ଶାବକକୁ ଉଦ୍ଧାର କରାଯାଇଥିଲା । ଉଦ୍ଧାର ପରେ ଠାକୁରମୁଣ୍ଡା ରେଞ୍ଜ କାର୍ଯ୍ୟାଳୟ ପରିସରରେ ତାକୁ ରଖାଯାଇ ପ୍ରାଣୀ ଚିକିତ୍ସା ଯୋଗାଇ ଦିଆଯାଇଥିଲା ।

ଗତ ସାତ ଦିନ ଧରି ବାଘ ଶାବକକୁ ନିୟମିତ ଖାଦ୍ୟ ସହ ପୁଷ୍ଟିକର ସପ୍ଲିମେଣ୍ଟ ଦିଆଯାଇଥିଲା । ଏହାର ପ୍ରଭାବରେ ଶାବକଟିର ସ୍ୱାସ୍ଥ୍ୟରେ ଦ୍ରୁତ ଉନ୍ନତି ହୋଇଥିଲା । ଏହାସହ ଭୁବନେଶ୍ୱରସ୍ଥିତ ଓୟୁଏଟିରେ ବାଘ ଶାବକର ରକ୍ତ ଓ ମଳ ନମୁନା ପରୀକ୍ଷା କରାଯାଇଥିଲା । ପରୀକ୍ଷା ରିପୋର୍ଟରେ ଶରୀରରେ କୌଣସି ରୋଗ କିମ୍ବା ସଂକ୍ରମଣ ନଥିବା ଜଣାପଡ଼ିଛି ।

ସୂଚନାଯୋଗ୍ୟ, ଗତମାସ ୨୫ ତାରିଖରେ ଖପରାଖାଇ ଗାଁରେ ବାଘ ଆତଙ୍କ ଦେଖାଦେଇଥିଲା । ଗାଁର ଯୋଗେନ ଗାଗରାଇଙ୍କ ଅଧାପନ୍ତରିଆ ଘର ଭିତରେ ଏକ ବାଘ ଶାବକ ପଶିଯାଇଥିଲା । ଏହାକୁ ନେଇ ଗ୍ରାମବାସୀ ଭୟଭୀତ ହୋଇପଡ଼ିଥିଲେ । ରାତି ତମାମ ପହରା ଦେବା ସହ ଡିଏଫ୍‌ଓ, ରେଞ୍ଜର ଓ ବନ ସୁରକ୍ଷା ଟିମ୍‌ର ଦୀର୍ଘ ୧୨ ଘଣ୍ଟାର ଅଭିଯାନ ପରେ ଶାବକଟିକୁ ସୁରକ୍ଷିତ ଭାବେ ଉଦ୍ଧାର କରାଯାଇଥିଲା । ଏବେ ତାହାର ସ୍ୱାସ୍ଥ୍ୟରେ ସୁଧାର ଆସିବା ପରେ ଜମୁନା ଏନକ୍ଲୋଜରରେ ନୂଆ ପରିବେଶରେ ରଖାଯାଇଛି ।