ଅର୍ଗସ ବ୍ୟୁରୋ : ଦୀର୍ଘ ୧୨ ବର୍ଷ ହେବ ଗାଁର ଧାର୍ମିକ, ସାଂସ୍କୃତିକ ଓ ସାମାଜିକ ଅନୁଷ୍ଠାନରୁ ବାସନ୍ଦ ହେଲେ ଆଶାକର୍ମୀ ଏବଂ ତାଙ୍କ ପରିବାର । ଏପରିକି ଆଶାକର୍ମୀ ଜଣକ ତାଙ୍କ କର୍ତ୍ତବ୍ୟ ସମୟରେ ବି ଅସୁବିଧାର ସମ୍ମୁଖୀନ ହେଉଛନ୍ତି । ଏତେ ସବୁ ପରେ ବି ଆଇନ ଚୁପ । ଏଭଳି ଅମାନୁଷିକ ଘଟଣା ଦେଖିବାକୁ ରାଜନଗର ଥାନା ଅନ୍ତର୍ଗତ କୃଷ୍ଣପ୍ରିୟାପୂର ଗ୍ରାମରେ ।

ଉକ୍ତ ଗ୍ରାମର ପାର୍ବତୀବାଳା ମାଝୀ ପେସାରେ ଜଣେ ଆଶାକର୍ମୀ । ୧୨ ବର୍ଷ ପୂର୍ବରୁ ତାଙ୍କ ସ୍ୱାମୀଙ୍କ ସହ ଶତ୍ରୁତା ରଖି ଗ୍ରାମର କିଛି ଅସାମାଜିକ ବ୍ୟକ୍ତି, ପାର୍ବତୀଙ୍କ ସମ୍ପୂର୍ଣ୍ଣ ପରିବାରକୁ ଆଜି ପର୍ଯ୍ୟନ୍ତ ବାସନ୍ଦ ରଖିଛନ୍ତି । ଗ୍ରାମରେ ହେଉଥିବା ପ୍ରତ୍ୟକ ପର୍ବ ପର୍ବାଣି, ସାଂସ୍କୃତିକ ଅନୁଷ୍ଠାନରେ ପାର୍ବତୀଙ୍କ ପରିବାରକୁ ସାମିଲ ନକରେଇଦେବା ସହ ପାର୍ବତୀ ଆଶାକର୍ମୀ ସ୍ୱରୂପ ସମ୍ପାଦନ କରୁଥିବା ତାଙ୍କ କର୍ତ୍ତବ୍ୟରେ ମଧ୍ୟ ଗ୍ରାମବାସୀ ସହଯୋଗ କରୁନାହାନ୍ତି ।

ଯାହାଫଳରେ ରାଜନଗର ଥାନାରେ ଏନେଇ ପାର୍ବତୀ ଗୁହାରି କରିଥିଲେ । ପୋଲିସ ଏକତରଫା ଭାବେ ଏହି ଘଟଣାର କୌଣସି ସମାଧାନ ନକରିବାରୁ ଆଜି ପାର୍ବତୀ ଏବଂ ତାଙ୍କ ସମ୍ପୂର୍ଣ୍ଣ ପରିବାର କେନ୍ଦ୍ରାପଡା ଜିଲ୍ଲାପାଳଙ୍କ ନିକଟରେ ଅନଶନରେ ବସିଛନ୍ତି ।