କଟକ: ଜୟ ଶ୍ରୀରାମ ନାରାରେ ଫାଟି ପଡୁଛି ଗାଁ ଦାଣ୍ଡ । ଗେରୁଆ ମୟ ପୁରା ଗାଁ । ବାଜା ବାଜୁଛି...ଝାଞ୍ଜ ବାଜୁଛି । ସମସ୍ତଙ୍କ ମନରେ ପ୍ରବଳ ଉତ୍ସାହ । ଏ ହେୁଛି ଖଣ୍ଡୁଆ ପ୍ରସିଦ୍ଧ ଗ୍ରାମ ନୂଆପାଟଣା । ଯେଉଁଠୁ ପ୍ରଭୁ ଶ୍ରୀରାମଙ୍କ ପାଇଁ ଯାଉଛି ଖଣ୍ଡୁଆପାଟ । ଅହିଂସା ଖଣ୍ଡୁଆପାଟ ଶ୍ରୀଅଙ୍ଗ ବସ୍ତ୍ର ପ୍ରଭୁ ଶ୍ରୀରାମ ଲାଲାଙ୍କୁ ସମର୍ପଣ ଉଦ୍ଦେଶ୍ୟରେ ଅଯୋଧ୍ୟା ଯାତ୍ରାରେ ବାହାରିଛନ୍ତି ଖଣ୍ଡୁଆ କାରିଗର ।

ପାଞ୍ଚଶହ ବର୍ଷର ଅପେକ୍ଷା । ଅଦାଲତି ଲଢେଇ । ଅନେକ ବାଦବିବାଦ ପରେ ଉତ୍ତରପ୍ରଦେଶର ଅଯୋଧ୍ୟା ଠାରେ ଆସନ୍ତା ୨୨ରେ ରାମଲାଲା ଙ୍କ ପ୍ରାଣ ପ୍ରତିଷ୍ଠା ହେବ । ଏହା ପରଦିନ କଟକ ଜିଲ୍ଲା ତିଗିରିଆ ବ୍ଳକ ଅନ୍ତର୍ଗତ ନୂଆପାଟଣାର ଖଣ୍ଡୁଆ ପାଟ ବସ୍ତ୍ରକୁ ପରିଧାନ କରିବେ ପ୍ରଭୁ ରାମ ଲାଲା । ଏ ନେଇ ବୁଣାକାରମାନେ ଅହିଂସା ଖଣ୍ଡୁଆ ପାଟ ସୂତାରେ ପ୍ରସ୍ତୁତ ଅଙ୍ଗବସ୍ତ୍ର ଓ ଉତ୍ତରୀୟ ବୁଣା ଶେଷ କରିଛନ୍ତି । ଉକ୍ତ ବସ୍ତ୍ରକୁ ନେଇ ଅଯୋଧ୍ୟା ଯିବାର କାର୍ଯ୍ୟକ୍ରମ ଧୁମଧାମରେ ପାଳିତ ହେଉଛି ।

ନୂଆପାଟଣା ସ୍ଥିତ ନଂ ୧ ବୁଣାକାର ତନ୍ତୁବାୟ ସମିତିର ରାଷ୍ଟ୍ରପତି ପୁରସ୍କାର ପ୍ରାପ୍ତ ବାନ୍ଧକଳା କାରିଗର ଅର୍ଜ୍ଜନ ପାଳଙ୍କ ସହଯୋଗୀମାନଙ୍କ ପକ୍ଷରୁ ବାଳକ ରାମଲାଲଙ୍କ ପାଇଁ ଗୀତଗୋବିନ୍ଦ ଲେଖା ଥିବା ୫ ହାତ ଲମ୍ବର ଅଙ୍ଗବସ୍ତ୍ର ଓ ୩ ହାତ ଲମ୍ବର ଉତ୍ତରୀୟ ବୁଣା ଯାଇଛି ।

ଅଯୋଧ୍ୟା ରାମ ମନ୍ଦିର ଟ୍ରଷ୍ଟ ସହ ନୂଆପାଟଣା ନଂ.୧ ବୁଣାକାର ସମିତିର ଯୋଗାଯୋଗ ପରେ ଉକ୍ତ ବସ୍ତ୍ର ନିର୍ମାଣ ଆରମ୍ଭ ହୋଇଥିଲା । ସେହି ବସ୍ତ୍ରକୁ ନୂଆପାଟଣା ସ୍ଥିତ ରାମ ମନ୍ଦିରରେ ପୂଜାର୍ଚ୍ଚନା କରାଯାଇ ବୁଣାକାର ପରିବାରଙ୍କ ପ୍ରତିନିଧିଙ୍କ ଦ୍ଵାରା ଅଯୋଧ୍ୟା ଅଭିମୁଖେ ପ୍ରେରିତ କରାଯିବାର ବ୍ୟବସ୍ଥା କରାଯାଇଛି । ଉକ୍ତ ବସ୍ତ୍ର ୧୯ ତାରିଖରେ ଅଯୋଧ୍ୟାର ରାମ ମନ୍ଦିର ଟ୍ରଷ୍ଟ କମିଟି ନିକଟରେ ପହଞ୍ଚିବ ।୨୩ ତାରିଖରେ ରାମଲାଲ ଏହାକୁ ପରିଧାନ କରିବେ । ସତରେ ଆଠୁ ବଳି ବଡ କଥା ବା ଆଉ କଣ ।

ଆହୁରି ପଢନ୍ତୁ ଓଡିଶା ଖବର...

Argus News | argus news | Odisha Latest News, Breaking News, Trending News, Live TV