Kotia Dispute / କୋଟିଆ ପାଇଁ ବସିବ ସର୍ବଦଳୀୟ ବୈଠକ, କାଲି ସବୁ ଦଳ ସହ ଆଲୋଚନା କରିବେ ମୁଖ୍ୟମନ୍ତ୍ରୀ

କୋଟିଆ ପାଇଁ ସର୍ବଦଳୀୟ ବୈଠକ ଡାକିଲେ ସରକାର । ଆସନ୍ତାକାଲି ବସିବ ବୈଠକ । ହେଲେ ସମସ୍ତଙ୍କୁ ସାଙ୍ଗରେ ନେଇ ସରକାର ସମାଧାନ ପାଇଁ ଉଦ୍ୟମ କରୁଥିବା ବେଳେ, ରାଜନୀତି ଆରମ୍ଭ କରିଛି ବିଜେଡି । ଆଜି ଗ୍ରାଉଣ୍ଡରେ ପହଞ୍ଚିଛନ୍ତି ବିଜେଡିର ୧୬ ଜଣିଆ ଟିମ୍ । ଯାହାକୁ ନେଇ ବିଜେଡିକୁ କଡ଼ା ଟାର୍ଗେଟ କରିଛି ବିଜେପି । ଗତ ୨୪ ବର୍ଷରେ ସରକାର କ'ଣ କରିଛନ୍ତି ବୋଲି ପ୍ରଶ୍ନ କରିବା ସହ କୋଟିଆରୁ ଇଞ୍ଚେ ବି ଜମି କାହାକୁ ଦିଆଯିବ ନାହିଁ ବୋଲି କହିଛି ଦଳ ।

କୋଟିଆର ବିବାଦର ସମାଧାନ ଲାଗି ଆସନ୍ତାକାଲି ବସିବ ସର୍ବଦଳୀୟ ବୈଠକ । ଆଜି ଏନେଇ ବିଭାଗୀୟ ସଚିବଙ୍କ ସହ ଆଲୋଚନା କରିବା ସହ ମୁଖ୍ୟମନ୍ତ୍ରୀଙ୍କ ଅନୁମତି ନେଇଛନ୍ତି ରାଜସ୍ଵ ମନ୍ତ୍ରୀ । ଗୋଟିଏ ପଟେ ରାଜ୍ୟ ସରକାର ସୁପ୍ରିମକୋର୍ଟ ଯିବାକୁ ପ୍ରସ୍ତୁତ ହେଉଥିବା ବେଳେ ଅନ୍ୟ ପଟେ ସର୍ବଦଳୀୟ ବୈଠକରେ ସମସ୍ତ ଦଳର ମତାମତ ନିଆଯିବ । ପଟାଙ୍ଗୀରେ ମଧ୍ୟ ସର୍ବଦଳୀୟ ବୈଠକ ହୋଇସାରିଥିବା ସୂଚନା ଦେଇଛନ୍ତି ରାଜସ୍ଵ ମନ୍ତ୍ରୀ । ଅନ୍ୟପଟେ ସୀମାନ୍ତ ଅଞ୍ଚଳରେ ପୁଣି ତତ୍ପର ହୋଇ ଉଠିଛି ଓଡ଼ିଶା ପ୍ରଶାସନ । ଗତକାଲିଠୁ ଗ୍ରାଉଣ୍ଡକୁ ଯାଇ ସ୍ଥିତି ଅନୁଧ୍ୟାନ କରିଛନ୍ତି ଉପଜିଲ୍ଲାପାଳ ।

ଏପଟେ କୋଟିଆକୁ ନେଇ ରାଜନୀତି ବି ତେଜିଛି । ୨୪ ବର୍ଷ ଶାସନ କାଳରେ ଚୁପ୍ ବସିଥିବା ବିଜେଡି ଆଜି ଗ୍ରାଉଣ୍ଡ ଜିରୋକୁ ଯାଇଛି । କିନ୍ତୁ ପଦାରେ ପଡ଼ିଛି କୋଟିଆକୁ ନେଇ ବିଜେଡିର ଡବଲ ଷ୍ଟାଣ୍ଡାର୍ଡ । ବିଧାନସଭାରେ ୨୦୨୩ରେ ତତ୍କାଳୀନ ରାଜସ୍ଵ ମନ୍ତ୍ରୀ ପ୍ରମିଳା ମଲ୍ଲିକଙ୍କ ଉତ୍ତର ରଖିଥିଲେ ଯେ, ଆନ୍ଧ୍ର ଅଧିକାରୀ କୋଟିଆକୁ ଅନୁପ୍ରବେଶ କରିନାହାନ୍ତି କି ଭତ୍ତା ବାଣ୍ଟିନାହାନ୍ତି ।

ସେହିପରି ପିକନିକ ବାହାନାରେ ଆନ୍ଧ୍ର ଅଧିକାରୀମାନେ ଦେଓମାଳିରେ ସ୍ଥିତି ଅନୁଧାନ କରିଥିବା ବେଳେ ବିଜେଡିର ତତ୍କାଳୀନ ପର୍ଯ୍ୟଟନ ମନ୍ତ୍ରୀ ଅଶ୍ଵିନୀ ପାତ୍ର କହିଥିଲେ ଦେଓମାଳି ଓଡ଼ିଶାର ରାଜସ୍ଵ କିମ୍ଭା ଜଙ୍ଗଲ ବିଭାଗର ଖତିଆନରେ ନାହିଁ । ଯାହାକୁ ନେଇ ଆଜି ସାମ୍ବାଦିକ ସମ୍ମିଳନୀ କରି ବିଜେଡି ଉପରେ ବର୍ଷିଛି ବିଜେପି । କହିଛି, ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସେ ସମୟରେ ଏକାଧିକ ବାର କୋଟିଆ ଗସ୍ତ କରି ସେ ଅଞ୍ଚଳରେ ବିକାଶ ପାଇଁ ପଦକ୍ଷେପ ନେଇଥିଲେ । ମୋବାଇଲ ନେଟୱାର୍କ ସମସ୍ୟା ଦୂର ପାଇଁ କେନ୍ଦ୍ର ସରକାରଙ୍କ ସହଯୋଗରେ ଟାୱାର ସ୍ଥାପନ କରିଥିଲେ । ବିଜେଡିର ନେତାମାନେ ନ୍ୟାରେଟିଭ ତିଆରି ପାଇଁ ଚେଷ୍ଟା କରୁଛନ୍ତି । ବିଜେପି ଓଡ଼ିଶାର ଇଞ୍ଚିଏ ଜମିକୁ ଅନ୍ୟ କାହାକୁ ଅଧିକାର କରିବାକୁ ଦେବ ନାହିଁ ।

କୋଟିଆକୁ ନେଇ ରାଜନୀତି ଭିତରେ ଆସନ୍ତାକାଳୀୟ ସର୍ବ ଦଳୀୟ ବୈଠକରେ କଣ ନିଷ୍କର୍ସ ବାହାରୁଛି ତାଉପରେ ନଜର ।