Kotia Border Dispute / ସଫଳ ହୋଇପାରିଲାନି ପଡ଼ୋଶୀର ଷଡ଼ଯନ୍ତ୍ର, ଓଡ଼ିଶାର ଏକତା ଆଗରେ ହାର ମାନିଲା ଆନ୍ଧ୍ର

କୋଟିଆରେ ଓଡ଼ିଶାର ଏକତା ଆଗରେ ମୁଣ୍ଡ ନୁଆଁଇଲା ଆନ୍ଧ୍ରପ୍ରଦେଶ । ରାଜନୀତିରୁ ଉର୍ଦ୍ଧ୍ୱରେ ରହି ମା’ ମାଟିର ସୁରକ୍ଷା ପାଇଁ ଏକାଠି ହୋଇଛନ୍ତି ସର୍ବଦଳୀୟ ନେତା, ପ୍ରଶାସନ ଓ ସ୍ଥାନୀୟ ଜନସାଧାରଣ । ଓଡ଼ିଶାର କଡ଼ା ବିରୋଧ ଓ ସୀମାନ୍ତରେ ରାତିସାରା ପହରା ପରେ ନରେଡ଼ିୱାଲ୍ସାରୁ ପୋଲିଂ ବୁଥ୍ ଘୁଞ୍ଚାଇ ଆନ୍ଧ୍ର ନିଜ ସୀମା ସାରିକିରେ ବୁଥ୍ କରିବାକୁ ବାଧ୍ୟ ହୋଇଛି । କୋରାପୁଟର ନୂଆ ଉପଜିଲ୍ଲାପାଳ ଫାବି ରସିଦ ସମ୍ମୁଖ ଯୋଦ୍ଧା ସାଜି ଆନ୍ଧ୍ରର ସବୁ ଚାଲ୍‌କୁ ଭଣ୍ଡୁର କରିଥିବା ବେଳେ ତାଙ୍କ ସାହସ ଓ ଦୃଢ଼ତାକୁ ଚାରିଆଡ଼ୁ ମିଳିଛି ଛୁଟିଛି ପ୍ରଶଂସା । ଯଦିଓ କିଛି ଲୋକଙ୍କୁ ଜଙ୍ଗଲ ଗଳାବାଟ ଦେଇ ନେଇ ଆନ୍ଧ୍ର ଭୋଟ୍ କରାଇବାରେ ସଫଳ ହୋଇଛି, ହେଲେ ରାଜସ୍ୱ ମନ୍ତ୍ରୀଙ୍କ ସମେତ ସବୁ ଦଳର ନେତା କହିଛନ୍ତି - କୋଟିଆରେ ଆନ୍ଧ୍ରର ଷଡ଼ଯନ୍ତ୍ର ସମ୍ପୂର୍ଣ୍ଣ ଫେଲ୍ ମାରିଛି ।

କୋରାପୁଟ ଜିଲ୍ଲା କୋଟିଆରେ ଦେଖିବାକୁ ମିଳିଛି ଓଡ଼ିଶାର ଅଦ୍ଭୁତପୂର୍ବ ଏକତା । ରାଜନୀତିରୁ ଉର୍ଦ୍ଧ୍ୱରେ ରହି ମା’ ମାଟିର ସୁରକ୍ଷା ପାଇଁ ଏକାଠି ହୋଇଛନ୍ତି ନେତାଙ୍କ ସହ ସାଧାରଣ ଜନତା ଓ ପ୍ରଶାସନ । ସୀମାନ୍ତରେ ଆନ୍ଧ୍ରପ୍ରଦେଶର ନିର୍ବାଚନୀ ଚାଲ୍‌କୁ ଭଣ୍ଡୁର କରିବା ପାଇଁ ସାରାରାତି ଜଗିରହିଥିଲା କୋରାପୁଟ ପ୍ରଶାସନ ।

ଓଡ଼ିଶାର କଡ଼ା ପ୍ରତିବାଦ ଓ ଦୃଢ଼ ଆଭିମୁଖ୍ୟ ଆଗରେ ଛାନିଆ ହୋଇ ନିଜର ବୁଥ୍ ସ୍ଥାନାନ୍ତର କରିବାକୁ ବାଧ୍ୟ ହୋଇଥିଲା ଆନ୍ଧ୍ର । ନରେଡ଼ିବାଲାସାରେ ବୁଥ୍ କରିବାକୁ ଆନ୍ଧ୍ର ଯୋଜନା କରିଥିଲା । ହେଲେ ଓଡ଼ିଶା ପ୍ରଶାସନ, ସର୍ବଦଳୀୟ ନେତା ଓ ସ୍ଥାନୀୟ ଲୋକଙ୍କ କଡ଼ା ବିରୋଧ ପରେ ଆନ୍ଧ୍ର ବାଧ୍ୟ ହୋଇ ୨ କିଲୋମିଟର ଦୂର ଆନ୍ଧ୍ରପ୍ରଦେଶର ସାରିକି ଗ୍ରାମକୁ ବୁଥ୍ ଘୁଞ୍ଚାଇ ଦେଇଛି ।

ଆନ୍ଧ୍ର କିଛି କୋଟିଆବାସୀଙ୍କୁ ପ୍ରଲୋଭିତ କରି ଜଙ୍ଗଲର ଗଳାବାଟ ଦେଇ ନେବା ସହ ଭୋଟ୍ କରାଇଥିବା ଅଭିଯୋଗ ହୋଇଛି । ତେବେ ପ୍ରଶାସନ ଓ ସ୍ଥାନୀୟ ଲୋକେ ଏହା ଉପରେ କଡ଼ା ନଜର ରଖିଛନ୍ତି । ଯେଉଁମାନେ ଓଡ଼ିଶାର ସୁବିଧା ନେଇ ଆନ୍ଧ୍ରକୁ ଭୋଟ୍ ଦେବାକୁ ଯାଉଛନ୍ତି, ସେମାନଙ୍କର ଭୋଟ୍‌ ଓ ରାସନ୍ କାର୍ଡ କାଟି ଦିଆଯାଉ । ଏହି ସୀମା ବିବାଦର ସ୍ଥାୟୀ ସମାଧାନ ପାଇଁ ଉଚ୍ଚସ୍ତରରେ ଆଲୋଚନା ହେଉ ବୋଲି ଦାବି କରିଛନ୍ତି ବିରୋଧୀ । ସରକାର କହିଛନ୍ତି ଆନ୍ଧ୍ରର ଚକ୍ରାନ୍ତକୁ ଭଣ୍ଡୁର କରିବାରେ ସଫଳ ହୋଇଛି ଓଡ଼ିଶା ।

କୋରାପୁଟ ଉପଜିଲ୍ଲାପାଳ ଫାବି ରସିଦଙ୍କ ନେତୃତ୍ୱରେ ପ୍ରଶାସନିକ ଟିମ୍ ସୀମାନ୍ତରେ ଡେରା ପକାଇଛନ୍ତି । ଜଣେ ମହିଳା ଅଫିସରଙ୍କ ଏହି ସାହସ ଓ ଦୃଢ଼ତାକୁ ସବୁ ଦଳର ନେତା ବେଶ୍ ପ୍ରଶଂସା କରିଛନ୍ତି । ସବୁଠାରୁ ବଡ଼କଥା ହେଉଛି ଝାରସୁଗୁଡ଼ାରେ ପ୍ରୋବେସନ୍ ଶେଷ କରିବା ପରେ କୋରାପୁଟରେ ଉପଜିଲ୍ଲାପାଳ ଫାବି ରସିଦଙ୍କ ଏହା ପ୍ରଥମ ପୋଷ୍ଟିଂ । ତାଙ୍କ ସହ କୋରାପୁଟ ଏସଡିପିଓ ମଧ୍ୟ ସୀମାରେ ସମ୍ଭାଳିଛନ୍ତି ମୋର୍ଚ୍ଚା ।

ରାଜସ୍ବ ମନ୍ତ୍ରୀ କହିଛନ୍ତି ଆନ୍ଧ୍ର ସରକାର କିଛି ଲୋକଙ୍କୁ ଆଗୁଆ ନେଇ ହେପାଜତରେ ରଖିଥିଲେ । ସେମାନଙ୍କୁ ପ୍ରଲୋଭିତ କରି ଜଙ୍ଗଲ ବାଟରେ ଲୁଚିଛପି ଭୋଟ୍ ଦେବାକୁ ନେଇଥିଲେ । ସେମାନଙ୍କ ସଂଖ୍ୟା ଅତି କମ୍ । ଗାଁ ଲୋକେ ସେମାନଙ୍କୁ ପ୍ରତ୍ୟାବର୍ତ୍ତନ ସମୟରେ ଭର୍ତ୍ସନା କରିଛନ୍ତି । ଆନ୍ଧ୍ରର କୁଚକ୍ରାନ୍ତ ସମ୍ପୂର୍ଣ୍ଣ ଫେଲ୍ ମାରିଛି ।
ସୀମାନ୍ତରେ ଓଡ଼ିଶାର ସ୍ୱାର୍ଥ ଓ ସ୍ୱାଭିମାନ ରକ୍ଷା ପାଇଁ ପ୍ରଶାସନ, ଜନପ୍ରତିନିଧି ଏବଂ ସ୍ଥାନୀୟ ଜନସାଧାରଣଙ୍କ ଏହି ମିଳିତ ଉଦ୍ୟମ ସାରା ରାଜ୍ୟ ପାଇଁ ଏକ ଉଦାହରଣ ପାଲଟିଛି । ଆନ୍ଧ୍ରର ସବୁ ପ୍ରକାର ଷଡ଼ଯନ୍ତ୍ରକୁ ଭଣ୍ଡୁର କରିବାକୁ କୋଟିଆ ମାଟିରେ ଆଜି ଓଡ଼ିଶାବାସୀ ଗୋଟିଏ ସ୍ୱରରେ କହିଛନ୍ତି- କୋଟିଆ ଆମର ।