Missing Commission Files / ପୁଣି ଚର୍ଚ୍ଚାରେ କମିଶନ ଫାଇଲ ହଜିବା ଘଟଣା, କ୍ରାଇମବ୍ରାଞ୍ଚ ତଦନ୍ତକୁ ନେଇ ପ୍ରଶ୍ନ ଉଠାଇଲେ ବିରୋଧୀ

ସ୍ବାମୀ ଲକ୍ଷ୍ମଣାନନ୍ଦ ସରସ୍ଵତୀ ଫାଇଲକୁ ନେଇ ପୁଣି ତେଜିଲା ରାଜନୀତି । କ୍ରାଇମବ୍ରାଞ୍ଚର ତଦନ୍ତ ବାଟବଣା ଓ ଶିଥିଳ ହେଲା କି ବୋଲି ପ୍ରଶ୍ନ କରି ବିରୋଧୀ ସରକାରଙ୍କୁ ଘେରିଥିବା ବେଳେ ଜବାବ ରଖିଛି ବିଜେପି । ପ୍ରଥମେ ପୋଲିସ ତଦନ୍ତ ଆରମ୍ଭ କରି ପୂର୍ବ ସରକାରର ପାୱାରଫୁଲ ଅଫିସରଙ୍କୁ ନୋଟିସ କରିଛି କ୍ରାଇମବ୍ରାଞ୍ଚ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଫିସରେ କାମ କରୁଥିବା କିରାଣୀଙ୍କ ଘରେ ଚଢାଉ କରିଛି ।

୨୭ ଜୁଲାଇ ସ୍ଵାମୀ ଲକ୍ଷ୍ମଣାନନ୍ଦ ସରସ୍ଵତୀଙ୍କ ଜନ୍ମ ଶତ ବାର୍ଷିକୀ ପାଳନର ଠିକ ଗୋଟିଏ ଦିନ ପୂର୍ବରୁ କମିଶନ ଫାଇଲ ହଜିବା ଘଟଣାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ । ଆଉ ୨ ଦିନ ପରେ ତଦନ୍ତ ନିର୍ଦ୍ଦେଶକୁ ପୂରିବ ମାସେ । କିନ୍ତୁ ଏଯାଏଁ ତଦନ୍ତର ଷ୍ଟାଟସ କ'ଣ ? କାହାକୁ ତଦନ୍ତ ପରିସରଭୁକ୍ତ କଲାଣି କ୍ରାଇମବ୍ରାଞ୍ଚ ? ଆଉ କାହାକୁ କଲାଣି ନୋଟିସ ? ତାକୁ ନେଇ ତେଜିଛି ରାଜନୀତି । କଂଗ୍ରେସର ଅଭିଯୋଗ ପୋଲିସ ଠିକ୍‌ ତଦନ୍ତ କରୁଥିଲା ଘଟଣା ଚାପିଦେବାକୁ କ୍ରାଇମବ୍ରାଞ୍ଚକୁ ଦିଆଗଲା । ବିଜେଡି କ୍ରାଇମବ୍ରାଞ୍ଚ ତଦନ୍ତକୁ ନାଟକ ବୋଲି କହିଛି । ଯାହାକୁ କାଉଣ୍ଟର କରି ବିଜେପି କହିଛି ସରକାରରେ କୌଣସି କଥା ଲୁଚିବନି । କ୍ରାଇମବ୍ରାଞ୍ଚ ସତ ନିହାତି ପଦାକୁ ଆଣିବ ।

ବଡ଼ କଥା ହେଉଛି କମିଶନରେଟ ପୋଲିସ ତଦନ୍ତ ଆରମ୍ଭ କରୁ କରୁ ଗୃହ ବିଭାଗ, ସାଧାରଣ ପ୍ରଶାସନ ବିଭାଗ ସହ ମୁଖ୍ୟ ଶାସନ ସଚିବଙ୍କ କାର୍ଯ୍ୟାଳୟ ବି ଛାନଭିନ କରିଥିଲା । ଏହା ସହ ପୂର୍ବ ସରକାରଙ୍କ ପାୱାରଫୁଲ ଅଫିସର ଭୈରବ ପାଣ୍ଡିଆନ, ରାଜେଶ ବର୍ମା, ମନୋଜ ମିଶ୍ର, ୟୁଏନ ବେହେରାଙ୍କୁ ହାଜର ପାଇଁ ନୋଟିସ ହୋଇଥିଲା । ମନୋଜ ମିଶ୍ର ଥାନାରେ ହାଜର ହୋଇ ତଥ୍ୟ ରଖିଥିବା ବେଳେ ପାଣ୍ଡିଆନ ବିଦେଶରେ ଥିବାରୁ ସମୟ ମାଗିଥିଲେ । ଅନ୍ୟ କାରଣ ଦର୍ଶାଇ ନୋଟିସକୁ ଏଡାଇ ଯାଇଥିଲେ ରାଜେଶ ବର୍ମା ଏବଂ ୟୁଏନ ବେହେରା । କିନ୍ତୁ କ୍ରାଇମବ୍ରାଞ୍ଚ ତଦନ୍ତ ଆରମ୍ଭ କରିବା ପରେ କେବଳ ୪ ଅଗଷ୍ଟରେ ପୂର୍ବତନ ମୁଖ୍ୟମନ୍ତ୍ରୀ ନବାନ ପଟ୍ଟନାୟକଙ୍କ କାର୍ଯ୍ୟାଳୟରେ କିରାଣୀ ଥିବା ବିଏନ ମହାରଣାଙ୍କ ଘରେ ରେଡ୍‌ କରିଥିଲା । ତେବେ ସେଠାରୁ କ୍ରାଇମବ୍ରାଞ୍ଚ ହାତରେ କ'ଣ ଲାଗିଲା । ତାପରେ କେମିତି ଆଗକୁ ବଢୁଛି କ୍ରାଇମବ୍ରାଞ୍ଚ ସେନେଇ ସ୍ପଷ୍ଟ ହେଉନି । ଅନ୍ୟ ପଟେ ସ୍ଵାମୀଜୀଙ୍କ ଶତବାର୍ଷିକୀର ଯୋଗ ଦେଇ ନିଜେ ମୁଖ୍ୟମନ୍ତ୍ରୀ ଷଡଯନ୍ତ୍ର କରି ଫାଇଲ ଗାଏବ କରାଯାଇଥିବା ଭଳି ସଙ୍ଗୀନ କଥା ସାମ୍ନାକୁ ଆଣିଥିଲେ ।

ଅନ୍ୟପଟେ ତଦନ୍ତ ଆରମ୍ଭରୁ ପ୍ରଥମେ ସାଧାରଣ ପ୍ରଶାସନ ଏବଂ ଗୃହ ବିଭାଗକୁ ମଗାଯାଇଥିବା ତଥ୍ୟ ମିଳିନଥିଲା ବୋଲି କହିଥିଲା କ୍ରାଇମବ୍ରାଞ୍ଚ । ତେବେ ପୁଣି ଥରେ ସାନି ରିମାଇଣ୍ଡର ପଠାଇବା କଥା କହିଥିଲା କ୍ରାଇମବ୍ରାଞ୍ଚ । ତେବେ ଦେଖିବାର କଥା ହେଉଛି କମିଶନରେଟ ପୋଲିସ ଢଙ୍ଗରେ କ୍ରାଇମବ୍ରାଞ୍ଚ ଆଗକୁ ବଢୁଛି ନା ନାହିଁ ।