ଅର୍ଗସ ବ୍ୟୁରୋ: ଲ'ଲେସ୍ ଓଡ଼ିଶା । ରାଜ୍ୟରେ ବିପର୍ଯ୍ୟସ୍ତ ପାଲଟିଛି ଆଇନ ଶୃଙ୍ଖଳା ସ୍ଥିତି । ଦଣ୍ଡକୁ ଭୟ ନାହିଁ । ପୋଲିସର ନିଷ୍କ୍ରିୟତା ଓ ସରକାରଙ୍କ ଉଦାସୀନତା କାରଣରୁ ବିଜେଡି ଶାସନରେ ଏବେ ରାଜ୍ୟରେ ଚାଲିଛି ଅପରାଧୀଙ୍କ ରାଜ୍ । ରାଜଧାନୀର ଏୟାରପୋର୍ଟ ଛକରେ ଯୁବକଙ୍କୁ ଗୋଡେଇ ଗୋଡେଇ ହାଣିଲେ ଦୁର୍ବୃତ୍ତ । ଗୁରୁତର ଅବସ୍ଥାରେ ଶିବା ଓରଫ ମଦନ ମହାରଣାଙ୍କୁ ଏସସିବି ସ୍ଥାନାନ୍ତର କରାଯାଇଛି । ପୂର୍ବ ଶତ୍ରୁତାକୁ କେନ୍ଦ୍ର କରି ଏହି ଜଘନ୍ୟ ଅପରାଧ ଘଟିଛି । ଆକ୍ରମଣର ଶିକାର ଶିବା ନାଁରେ ଥାନାରେ ଏକାଧିକ ମାମଲା ରହିଛି ।

ସେହିପରି ଖୋଦ୍ ମୁଖ୍ୟମନ୍ତ୍ରୀଙ୍କ ଜିଲ୍ଲା ଗଞ୍ଜାମ ପାଲଟିଛି ଅପରାଧୀଙ୍କ ଚରାଭୂଇଁ । ଗଡୁଛି ଗୋଟିଏ ପରେ ଗୋଟିଏ ମୁଣ୍ଡ । ୨ମାସ ବ୍ୟବଧାନରେ ଦୁଇ ବ୍ଲକ ଜିଆରଏସଙ୍କୁ ହତ୍ୟା ଆଉ ଜଣେ ବର୍ଷାଧିକ କାଳ ନିଖୋଜ । ଗଞ୍ଜାମ ପୁଲିସ ଜିଲ୍ଲାରେ ଚଳିତ ବର୍ଷ ଏଯାବତ୍ ୫୯ଟି ହତ୍ୟାକାଣ୍ଡ ଘଟିଛି । ଏହାରି ମଧ୍ୟରେ ରହିଛନ୍ତି ପଞ୍ଚାୟତସ୍ତରରେ କାମ କରୁଥିବା ୨ ଜଣ ଗ୍ରାମ ରୋଜଗାର ସେବକ । ବୁଗୁଡା ବ୍ଲକର ଜିଆରଏସ ସୁକାନ୍ତ ପାଣିଗ୍ରାହୀ ଏବଂ ବେଗୁନିଆପଡ଼ା ବ୍ଲକର ଜିଆରଏସ ସୁଶୀଲ ମହାନ୍ତିଙ୍କୁ ହତ୍ୟା କରାଯାଇଥିବାବେଳେ ପୁରୁଷୋତ୍ତମପୁର ବ୍ଲକର ଜିଆରଏସ ସ୍ବାଗତ ପଣ୍ଡା ୧୫ ମାସ ହେଲା ନିଖୋଜ ଅଛନ୍ତି । ପୋଲସରା ଥାନା କଳମ୍ବ ଠାରେ ସୁକାନ୍ତ ପାଣିଗ୍ରାହୀ ନାମକ ଜିଆର୍‌ଏସ୍‌ଙ୍କୁ ଦୁର୍ବୃତ୍ତମାନେ ଛୁରୀ ଭୁସି ସ୍ପଷ୍ଟ ଦିବାଲୋକରେ ହତ୍ୟା କରିଛନ୍ତି ।

ସେହିପରି ଗତ ଅକ୍ଟୋବର ୪ ତାରିଖରେ ବେଗୁନିଆପଡା ବୁରୁଝୁରି ପଞ୍ଚାୟତର ଜିଆର୍‌ଏସ୍ ସୁଶୀଲ ମହାନ୍ତିଙ୍କୁ ହତ୍ୟା କରି କନିଆରୀ ଜଙ୍ଗଲ ବୁଦାରେ ଫିଙ୍ଗି ଦିଆଯାଇଥିଲା । ଅପରପକ୍ଷେ ପୁରୁଷୋତ୍ତମପୁର ସୁନାଥର ପଞ୍ଚାୟତର ଜିଆର୍‌ଏସ୍ ସ୍ବାଗତ ପଣ୍ଡା ଗତବର୍ଷ ଅଗଷ୍ଟ ୮ରେ ପଞ୍ଚାୟତରୁ ନିଖୋଜ ହୋଇଯାଇଥିଲେ । ୧୫ ମାସରୁ ଅଧିକ ସମୟ ହେଲାଣି ତାଙ୍କର କୌଣସି ଖୋଜଖବର ମିଳିପାରୁ ନାହିଁ ।

ଅଧିକ ପଢ଼ନ୍ତୁ ଓଡିଶା ଖବର:

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV