Lord Jagannath Mines / ମହାପ୍ରଭୁଙ୍କର ଶହେ ଖଣି, କିନ୍ତୁ ଦେଢ ବର୍ଷ ହେଲାଣି ଟଙ୍କାଟିଏ ବି ହେଉନି ଆୟ

ଜଗତର ନାଥ ମହାପ୍ରଭୁ ଶ୍ରୀଜଗନ୍ନାଥଙ୍କ ଅଚଳାଚଳ ସମ୍ପତ୍ତି ଏବଂ ଖଣିକୁ ନେଇ ଏକ ବଡ଼ ଚିନ୍ତାଜନକ ଖବର ସାମ୍ନାକୁ ଆସିଛି । ମହାପ୍ରଭୁଙ୍କ ନାଁରେ ଶତାଧିକ ଖଣି ଥିଲେ ସୁଦ୍ଧା, ଗତ ଦେଢ଼ ବର୍ଷ ହେବ ଏହାର ଆୟ ସମ୍ପୂର୍ଣ୍ଣ ଶୂନ୍ୟ ହୋଇଯାଇଛି । ପୂର୍ବରୁ ମନ୍ଦିର ପ୍ରଶାସନ ଏହି ଖଣି ଏବଂ ସୈରାତ ନିଲାମରୁ ବର୍ଷକୁ ପ୍ରାୟ ୩୦ କୋଟି ଟଙ୍କା ରାଜସ୍ୱ ପାଉଥିଲା, କିନ୍ତୁ ବର୍ତ୍ତମାନ ଏହି ଆୟ ସମ୍ପୂର୍ଣ୍ଣ ବନ୍ଦ ରହିଛି ।

ଜଗତର ନାଥ ମହାପ୍ରଭୁ ଶ୍ରୀଜଗନ୍ନାଥଙ୍କ ଅଚଳାଚଳ ସମ୍ପତ୍ତି । ବିଭିନ୍ନ ସ୍ଥାନରେ ରହିଛି ଶହେଟି ଖଣି । ଖୋର୍ଦ୍ଧାରେ ମହାପ୍ରଭୁଙ୍କ ନାମରେ ୭୦ଟି କୋଠାବାଡ଼ି ନିର୍ମାଣ ଉପଯୋଗୀ ପଥର ଖଣି ରହିଥିବା ବେଳେ ମହାପ୍ରଭୁଙ୍କ ନାମରେ ଚିହ୍ନଟ ଜମି ମଧ୍ୟରୁ ୬୦ ଭାଗ ଜମିରେ ଖଣି ରହିଛି । ଯାହାକି ବଡ଼ ବଡ଼ ପଥର ଖଚିତ ପାହାଡ଼ ଖଣ୍ଡେଲାଇଟ୍ ପଥର ଖଣି ରହିଛି । ପୂର୍ବରୁ ମନ୍ଦିର ପ୍ରଶାସନ ଖଣି ନିଲାମ ଦେଇ ବର୍ଷକୁ ପ୍ରାୟ ୩୦ କୋଟି ଟଙ୍କା ରାଜସ୍ବ ପାଉଥିଲା । କିନ୍ତୁ ଗତ ଦେଢ ବର୍ଷ ହେବ ନିଲାମ ପ୍ରକ୍ରିୟା ନହେବାରୁ ରାଜସ୍ୱ ହରାଉଛି ଶ୍ରୀମନ୍ଦିର ପ୍ରଶାସନ । ନିଲାମ ନହେବାରୁ ଲୁଚାଛପାରେ ଚୋରା ଚାଲାଣ ଚାଲିଥିବା ଅଭିଯୋଗ ହୋଇଛି । ପୁରୀ କଣାସ ଭାନ୍ସରରେ ମହାପ୍ରଭୁଙ୍କ ନାମରେ ଥିବା ନଦୀ ଶଯ୍ୟା ବାଲି ସୈରାତର ନିଲାମ ୨୦୨୩ରୁ ବନ୍ଦ ହେବାପରେ ରାଜସ୍ୱ ହାନି ହେବା ସହ ବାଲି ଚୋରା ଚାଲାଣ ଜୋର୍ ଧରିଛି ।

ଦୁଇ ବର୍ଷ ତଳେ ଖଣି ନିଲାମ ନେଇଥିବା ବ୍ୟକ୍ତି ଓ ସଂସ୍ଥାମାନେ ନିର୍ଦ୍ଧାରିତ ପରିମାଣଠାରୁ ଅଧିକ ଉତ୍ତୋଳନ କରିଥିବା ଅଭିଯୋଗ ହେବା ପରେ କୋଟି କୋଟି ଟଙ୍କା ଜରିମାନା ନୋଟିସ ଦିଆଯାଇଥିଲା । ଏବେ କିନ୍ତୁ ଖଣି ନିଲାମ ପ୍ରକ୍ରିୟା ବନ୍ଦ ହୋଇଯାଇଥିବାରୁ ରାଜସ୍ୱହାନି ହେଉଥିବା ଏବଂ ବ୍ୟାପକ ଚୋରା ଚାଲାଣ ହେଉଥିବା ଅଭିଯୋଗ ହେଉଛି । ସେପଟେ ବୈଷୟିକ ଅସଙ୍ଗତି ତଥା ନ୍ୟାୟିକ ମାମଲା ଯୋଗୁଁ ଖଣି ନିଲାମ ହୋଇ ପାରିନଥିବା କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ପୂର୍ବରୁ ତହସିଲଦାର ଖଣି ନିଲାମ କରୁଥିବା ବେଳେ ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ ଖଣି ଅଧିକାରୀ ବା ଡେପୁଟି ଡିରେକ୍ଟର ମାଇନ୍ସଙ୍କ ଦ୍ବାରା ନିଲାମ କରାଯିବ । ଏହାକୁ ରାଜ୍ୟ ସରକାର ଅନୁମୋଦନ କରି ସାରିଛନ୍ତି ।

ପୁରୀ, ଖୋର୍ଦ୍ଧା ସମେତ ରାଜ୍ୟର ୭ ଜିଲ୍ଲାରେ ପ୍ରାୟ ୨୭୨ ଏକର ମହାପ୍ରଭୁଙ୍କ ଜମି ଜବରଦଖଲ ହୋଇଥିବା ନେଇ ୯୯୧ ମାମଲା ରହିଛି । ପୁରୀରେ ସର୍ବାଧିକ ୪ ଶହ ମାମଲା ଥିବା ବେଳେ ଖୋର୍ଦ୍ଧାର ୨୨୬ଟି ମାମଲା ରହିଛି ।